Mateu 7
7
Ku sa atula ba bañwi
(Luk 6.37-38, 41-42)
1“Mu si ke mwa atula ba bañwi, ili kuli Mulimu a si ke a mi atula ni mina. 2#Mar 4.24 Mulimu u ka mi atula ka mukwa o mu atula ba bañwi ka ona, mi u ka mi eza mo mu ezeza ba bañwi. 3Kikabakalañi, ha u talima kacwañi ka ka mwa liito la mwanahenu, kono u palelwa ku lemuha musumo o mwa liito la hao? 4U ka bulelela cwañi mwanahenu kuli, ‘Tuhela, ni ku zwise kacwañi ka ka mwa liito la hao,’ wena u nz'o na ni musumo ku la hao? 5Wena, muipi! Zwisa musumo o mwa liito la hao pili, kihona u ka kona ku bona ni ku zwisa kacwañi ka ka mwa liito la mwanahenu.
6“Mu si ke mwa fa linja lika ze kenile, li ka swana za mi fetuhela ni ku mi lwanisa. Mu si ke mwa nepela lika za butokwa fapil'a likulube kakuli li ka li hatikela feela.
Mu kupe, mu bate, mu ngongote
(Luk 11.9-13)
7“Mu kupe, mi mu ta fiwa. Mu bate, mi mu ta fumana. Mu ngongote, mi mu ta kwalulelwa. 8Kakuli mutu kaufela ya kupa wa fiwa, ya bata wa fumana, mi ya ngongota wa kwalulelwa. 9Kana u teñi ku mina ya ka fa mwan'a hae licwe, h'a kupile buhobe. 10Kamba u teñi ya ka mu fa noha, h'a kupile tapi? 11Mbali mina, niha mu li ba ba maswe, mu ziba ku fa bana ba mina lika ze nde, cwale Ndat'a mina ya kwa lihalimu bo! Kihona kuli u ta fa ze nde hahulu ni ku fita ku ba ba mu kupa.
12 #
Tob 4.15;
Luk 6.31
“Mu ezeze ba bañwi ze mu bata kuli ba mi ezeze zona, kakuli ki sona se si laelwa mwa Mulao wa Mushe ni Bapolofita.
Munyako o kumbani
(Luk 13.24)
13 #
Litu 15.17
“Mu kene ka munyako o kumbani, kakuli munyako o liba kwa lifu u atami, ni mukwakwa o liba kwateñi u bunolo, mi ba ba zamaya ku ona ki ba bañata. 14Kono munyako o isa kwa bupilo u kumbani, ni mukwakwa o liba kwateñi u tata, mi ki ba sikai feela ba ba u fumana.
Kota ni miselo ya yona
(Luk 6.43-44)
15“Mu tokomele bapolofita ba buhata. Ba bonahala sina lingu ha ba taha ku mina, kono mwahali ki maakanyani a pamula. 16#Litu 27.6 Mu ka ba ziba ka likezo ze ba eza. Mukakani ha u beyi miselo ya veine, mi mukona ha u beyi lifeiga. 17Kota ye nde i beya miselo ye minde, mi kota ye maswe i beya miselo ye maswe. 18Kota ye nde ha i koni ku beya miselo ye maswe, mi kota ye maswe ha i koni ku beya miselo ye minde. 19#Mat 3.10; Luk 3.9 Kota kaufela ye sa beyi miselo ye minde ya lemiwa ni ku nepelwa mwa mulilo. 20#Mat 12.33 Kamukwaocwalo, mu ka ziba bapolofita ba buhata ka likezo za bona.
Ku bulela ni ku eza
(Luk 13.25-27)
21“Ha si batu kaufela ba ba li ku na, ‘Mulena, Mulena,’ ba ba ta kena mwa Mubuso wa Lihalimu, konji feela ba ba eza se si latwa ki Ndate ya kwa lihalimu. 22Lizazi leo ha li ka fita, ba bañata ba ka li ku na, ‘Mulena, Mulena, lu lutile linzwi la Mulimu ka libizo la hao, mi ka libizo la hao lu lelekile mioya ye maswe ni ku eza limakazo ze ñata!’ 23#Lipi 6.8 Kiha ni ka li ku bona, ‘Ha ni si ka mi ziba ha i sa li. A mu zwe ku na, mina baezalibi!’
Nguli ya bayahi ba mandu
(Luk 6.47-49)
24“Cwalehe, mutu kaufela ya utwa manzwi a ka, mi a' mamela, u swana ni mutu ya butali ya yahile ndu ya hae fa licwe. 25Mi pula ya nela, linuka za tala, mañungwa a liba ku yona ndu yeo, kono ha i si ka wa kakuli ne i tomilwe fa licwe.
26“Kono mutu kaufela ya utwa manzwi a ka, mi a sa a mameli, u swana ni mutu wa sikuba ya yahile ndu ya hae fa lishabati. 27Pula ya nela, linuka za tala, mi mañungwa a liba ku yona ndu yeo, mi ya wa, mi ku wa kwa yona kwa ba sinyehelo ye tuna.”
Maata a Jesu
28 #
Mar 1.22; Luk 4.32 Jesu ha s'a felize ku bulela litaba ze, buñata bwa batu ba komokiswa ki mukwa w'a n'a luta ka ona. 29N'a sa swani ni Baluti ba Mulao, kono yena n'a ba luta ka maata.
Currently Selected:
Mateu 7: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
