Mateu 5

Tuto ya fa Lilundu

1Jesu h'a bona buñata bwa batu, a kambama fa lilundu. A ina fafasi, mi balutiwa ba hae ba sutelela ku yena. 2Kih'a kala ku ba luta, a li,

Tabo ya niti

(Luk 6.20-23)

3“Ba na ni limbuyoti ba ba ikutwa bubotana mwa moya, kakuli Mubuso wa Lihalimu ki wa bona!

4 # Isa 61.2 “Ba na ni limbuyoti ba ba lila, kakuli Mulimu u ta ba omba-omba!

5 # Lipi 37.11 “Ba na ni limbuyoti ba ba ishuwa, kakuli ba ta amuhela z'a sepisize Mulimu!

6 # Isa 55.1-2; Litu 24.21 “Ba na ni limbuyoti ba ba lakaza hahulu ku eza ze latwa ki Mulimu, kakuli Mulimu u ta ba fa maata a ku peta takazo ya bona!

7“Ba na ni limbuyoti ba ba na ni musa ku ba bañwi, kakuli Mulimu u ta ba ni musa ku bona!

8 # Lipi 24.3-4 “Ba na ni limbuyoti ba ba na ni pilu ye kenile, kakuli ba ta bona Mulimu!

9“Ba na ni limbuyoti ba ba batiseza batu kozo, kakuli Mulimu u ta ba biza bana ba hae!

10 # 1 Pit 3.14 “Ba na ni limbuyoti batu ba ba nyandiswa kabakala ku eza ze latwa ki Mulimu, kakuli Mubuso wa Lihalimu ki wa bona!

11 # 1 Pit 4.14 “Mu na ni limbuyoti batu ha ba mi lwahaka ni ku mi nyandisa ni ku mi tameleza bumaswe bwa mifuta-futa, kakuli mu balateleli ba ka. 12#2 Lita 36.16; Litu 2.8; Lik 7.52 Mu tabe mi mu nyakalale kakuli mu bulukezwi mupuzo o mutuna mwa lihalimu. Ki mo ne ku nyandiselizwe bapolofita ba ba ne ba itangetile.

Lizwai ni Liseli

(Mar 9.50; Luk 14.34-35)

13 # Mar 9.50; Luk 14.34-35 “Mina, mu lizwai la lifasi. Kono lizwai haiba li sampuka, li ka natifiswa kañi? Ha li sa na tuso konji ku latelwa kwande koo li ka y'o hatikelwa ki batu.

14 # Joa 8.12; 9.5 “Mu liseli la lifasi. Munzi o yahilwe fa lilundu ha u koni ku patwa. 15#Mar 4.21; Luk 8.16; 11.33 Ha ku na mutu ya ka tumbula lampi mi a i kwahela ka tubana, bakeñisa ku i beya fa ngandaleza, kuli i kone ku bonisa ba ba mwa ndu kamukana. 16#1 Pit 2.12 Kamukwaoswana, liseli la mina li swanezi ku monyehela batu, kuli ba bone misebezi ya mina ye minde, mi ba lumbeke Ndat'a mina ya kwa lihalimu.

Tuto bakeñisa Mulao

17“Mu si ke mwa hupula kuli ni til'o felisa Mulao wa Mushe ni tuto ya Bapolofita, batili! Ha ni si ka t'o li felisa kono ni til'o li kondisa. 18#Luk 16.17 Mu hupule nto ye! Lihalimu ni lifasi li si ka fela kale, ha ku na nto ni ye kana kamba nihaiba katakunyana feela ka Mulao ka ka ta sinyeha konji lika kaufela ha li se li petahalile. 19Hakulicwalo, ya ka tula nihaili o munyinyani wa milao yeo, mi a luta ba bañwi ku eza cwalo, u ta ba yo munyinyani mwa Mubuso wa Lihalimu. Kono ya ka buluka Mulao, mi a luta ba bañwi ku eza cwalo, u ta ba yo mutuna mwa Mubuso wa Lihalimu. 20Cwale na mi bulelela, ni li, mu ka kona ku kena mwa Mubuso wa Lihalimu feela ha mu ka eza se si latwa ki Mulimu, mi mu si eza hande ku fita mo ba si ezeza Baluti ba Mulao ni Bafalisi.

Tuto bakeñisa bunyemi

21 # Mut 20.13; Mul 5.17 “Mu utwile kuli baikale ne ba bulelezwi cwana, ‘U si ke wa bulaya mutu. Ya ka bulaya kaufela u ka tiswa fapil'a muatuli.’ 22Kono na, na mi bulelela kuli mutu kaufela ya ka halifela mwanahabo u ka tiswa fa katulo. Ya ka li ku yena, ‘Ha u na tuso wena!’ u ka tiswa fa kuta. Ya ka li ku yena, ‘U sikuba wena!’ u ka swanelwa ki lyangalilo la lihele. 23Cwalehe, mwendi u fa mpo ya hao ya hao fa katala ku Mulimu, mi kihona u hupula kuli mwanahenu u ku nyemezi. 24Siya mpo ya hao honafo fapil'a katala, mi u kutele kapili ku mwanahenu, mu y'o kutisana lipilu. Kihona u ka kuta, u ise mpo ya hao ku Mulimu.

25“Haiba mutu a ka ku zekisa, mi a ku isa kwa kuta, u utwane ni yena kapili, mu si ka fita kale kwa kuta, kakuli ha mu se mu fitile, u ka ku beya mwa mazoho a muatuli, yena a ku beye mwa mazoho a mapokola, mi u kenyiwe mwa tolongo. 26Na ku bulelela, u ka ina mwateñi ku fitela u lifa ngwee ya mafelelezo ya tifo ya hao.

Tuto bakeñisa bubuki

27 # Mut 20.14; Mul 5.18 “Mu utwile kuli ne ku bulezwi cwana, ‘U si ke wa buka.’ 28Kono na, na mi bulelela kuli mutu ufi kamba ufi ya talima musali, mi a mu lakaza, u s'a bukile kale ni yena mwa pilu ya hae. 29#Mat 18.9; Mar 9.47 Haiba liito la hao la silyo li ku fosisa, u li longole, mi u li latele kwahule, kakuli i ka ba hande ha u ka sinyehelwa ki silama si li siñwi feela sa mubili wa hao, ku fita kuli mubili wa hao kaufela u nepelwe mwa lyangalilo. 30#Mat 18.8; Mar 9.43 Mi haiba lizoho la hao la silyo li ku fosisa, u li pume, mi u li latele kwahule, kakuli i ka ba hande ha u ka sinyehelwa ki silama si li siñwi feela sa mubili wa hao, ku fita kuli mubili wa hao kaufela u nepelwe mwa lyangalilo.

Tuto bakeñisa telekano

(Mat 19.9; Mar 10.11-12; Luk 16.18)

31 # Mul 24.1-4; Mat 19.7; Mar 10.4 “Ne ku bulezwi hape kuli, ‘Ya leleka musal'a hae u swanezi ku mu fa liñolo la telekano.’ 32#Mat 19.9; Mar 10.11-12; Luk 16.18; 1 Bakor 7.10-11 Kono na, na mi bulelela kuli haiba munna a leleka musal'a hae, ka libaka lifi kapa lifi konji linyalo la bona ha ne li si ka mulao, munna yo u mu fetula mubuki haiba a nyalwa ki u sili hape. Mi ni yena munna ya nyala musali ya lelekilwe wa buka.

Tuto bakeñisa ku konka

33 # Malivi 19.12; Lipa 30.2; Mul 23.21 “Mu utwile hape kuli ne ku bulelezwi baikale kuli, ‘U si ke wa tula sepiso ya hao, kono u eze z'o itamile ka zona fapil'a Mulena.’ 34#Jak 5.12; Isa 66.1; Mat 23.22 Kono na, na mi bulelela kuli mu si ke mwa konka nihaiba hanyinyani ha mu sepisa. Mu si ke mwa konka nihaiba ka lihalimu, kakuli ki lubona lwa Mulimu. 35#Isa 66.1; Lipi 48.2 Mu si ke mwa konka nihaiba ka lifasi, kakuli ki sipula sa mahutu a hae, kapa ka Jerusalema, kakuli ki munzi wa Mulena yo mutuna. 36Mu si ke mwa konka ni ka litoho za mina, kakuli ha mu koni ku fetula lulili nihaili lu lu luñwi, ku lu eza busweu kapa bunsu. 37Mu bulele feela, mu li, ‘Eni,’ kapa ‘Batili.’ Se si ekezwa kwateñi si zwa ku Ya Maswe.

Tuto bakeñisa ku sa kutisa bumaswe

(Luk 6.29-30)

38 # Mut 21.24; Malivi 24.20; Mul 19.21 “Mu utwile kuli ne ku bulezwi kuli, ‘Liito ka liito, ni liino ka liino.’ 39Kono na, na mi bulelela kuli mu si ke mwa kutiseza mutu ya mi foselize bumaswe. Haiba mutu a ku bakula kwa lilama la kwa silyo, u mu tuhele, a ku bakule ni ku la nzohoto cwalo. 40Mi haiba mutu a ku isa kwa kuta, ku y'o ku zekisa bakeñisa hembe ya hao, u mu tuhele, a ngelele ni jansi ya hao. 41Mi haiba mutu a ku hapeleza ku lwala mutiyo wa hae sibima si li siñwi, u mu lwalele ona libima ze peli. 42Mutu h'a ku kupa sika, u mu fe. Mi h'a bata ku kalima sika, u mu kalime.

Ku latwe lila

(Luk 6.27-28, 32-36)

43 # Malivi 19.18; Litu 12.4-7 “Mu utwile kuli ne ku bulezwi cwana, ‘Lata wahenu, mi u toye ya ku toile!’ 44Kono na, ni li, ‘Mu late lila za mina, mi mu lapelele ba ba mi nyandisa. 45#Litu 4.10 Haiba mu eza cwalo mu ka ba luli bana ba Ndat'a mina ya kwa lihalimu. Kakuli yena u pazuliseza ba ba maswe ni ba bande lizazi la hae, mi u neliseza ba bande ni ba ba maswe pula ya hae ka ku swana. 46Haiba mu lata feela ba ba mi lata, ki ufi mupuzo o mu ka libelela ku Mulimu? Ni bona batelisi ba eza cwalo! 47Mi haiba mu lumelisanga feela bahabo mina, mu fita cwañi ba bañwi? Kana bahedeni ha ba ezi cwalo ni bona, nji? 48#Malivi 19.2; Mul 18.13 Cwalehe, mu be ba ba lukile sina Ndat'a mina ya kwa lihalimu h'a li ya petehile.

Currently Selected:

Mateu 5: Lozi09

Highlight

Copy