Mateu 4
4
Jesu wa likwa
(Mar 1.12-13; Luk 4.1-13)
1 #
Maheb 2.18; 4.15 Honafo, Moya o Kenile wa isa Jesu mwa naheñi ku y'o likwa ki Satani. 2Ha s'a inzi mazazi ni masihu a mashumi a mane a nz'a itima lico, Jesu a lapa. 3Muliki a taha ku yena, mi a mu bulelela, a li, “Haiba u Mwan'a Mulimu luli, laela macwe ao kuli a fetuhe mahobe.”
4 #
Mul 8.3
Jesu a alaba, a li, “Ku ñozwi kuli, ‘Mutu h'a koni ku pila ka buhobe feela, kono u pila ni ka linzwi lifi ni lifi l'a bulela Mulimu.’ ”
5Cwale Satani a isa Jesu mwa Munzi o Kenile, mi a mu beya fa muongola wa Tempele. 6#Lipi 91.11-12A li ku yena, “Haiba u Mwan'a Mulimu luli, ikwiseze fafasi, kakuli ku ñozwi kuli,
‘Mulimu u ka laela mangeloi a hae bakeñisa hao,
mi a ka ku lwala ka mazoho a ona
kuli lihutu la hao li si ke la kubwa ki licwe.’ ”
7 #
Mul 6.16
Jesu a mu alaba, a li, “Ku ñozwi hape kuli, ‘U si ke wa lika Mulena Mulimu wa hao.’ ”
8Cwale Satani a mu isa fa lilundu le litelele hahulu, mi a mu bonisa mibuso kaufela ya lifasi ni butuna bwa yona. 9A li ku yena, “Ni ta ku fa zona ze kaufela, haiba u kubama mi wa ni lapela.”
10 #
Mul 6.13
Cwale Jesu a mu alaba, a li, “Zwa, Satani! Kakuli ku ñozwi kuli, ‘Kubamela Mulena Mulimu wa hao, mi u sebeleze yena a nosi!’ ”
11Satani kiha mu siya, mi mangeloi a taha ku Jesu, a mu sebeleza.
Jesu u kala musebezi wa hae mwa Galilea
(Mar 1.14-15; Luk 4.14-15)
12 #
Mat 14.3; Mar 6.17; Luk 3.19-20 Jesu h'a utwa kuli Joani n'a beilwe mwa tolongo, a ya kwa Galilea. 13#Joa 2.12 H'a si ka y'o ina mwa Nazareta, kono a y'o pila mwa Kapernauma munzi o fa likamba la Lisa la Galilea, mwa naha ya Zebuloni ni Nafetali. 14Ku ezahalile cwalo kuli ku petahale z'a n'a bulezi mupolofita Isaya, ha n'a ize,
15 #
Isa 9.1-2
“Naha ya Zebuloni, naha ya Nafetali,
mwa nzila ye ya kwa liwate,
naha ye mwabuse bwa Jordani,
Galilea ya ba macaba!
16Sicaba se si pila mwa lififi
si ta bona liseli le lituna!
Ba ba pila mwa naha ya lififi la lifu,
liseli li ta ba benyeza!”
17 #
Mat 3.2
Ku zwa nako yeo, Jesu a kala ku luta, a nz'a li, “Mu bakele libi za mina, kakuli Mubuso wa Lihalimu u s'o li fakaufi!”
Jesu u biza mandui ba bane
(Mar 1.16-20; Luk 5.1-11)
18Jesu ha n'a nz'a zamaya fa munanga wa Lisa la Galilea, a bona mutu ni munyan'a hae, ba ba ne ba li mandui, ili bo Simoni ya n'a bizwa Pitrosi ni munyan'a hae Andreasi. Ne ba yamba mwa lisa ka kanyandi. 19Jesu a li ku bona, “Mu ni latelele, mi ni ta mi luta ku yamba batu.” 20Kapili-pili ba siya tunyandi twa bona, mi ba mu latelela.
21A zwelapili, mi a bona Jakobo ni munyan'a hae Joani, bana ba Zebedea. Ba ne ba li mwa mukolo ni ndat'a bona Zebedea, ba nze ba onga tunyandi twa bona. Jesu a ba biza. 22Kapili-pili ba siya mukolo ni ndat'a bona, ba mu latelela.
Jesu wa luta ni ku folisa
(Luk 6.17-19)
23 #
Mat 9.35; Mar 1.39 Jesu n'a zamaya mwa Galilea kaufela, a nz'a luta batu mwa masinagoge a bona. N'a bulela Litaba ze Nde za Mubuso wa Mulimu a nz'a folisa batu kwa matuku ni buyanga bwa bona kamukana. 24Libubo la hae la hasanela mwa naha ya Siria kaufela, mi batu ba tisa ku yena ba ba ne ba kula matuku a mifuta-futa, ba ba ne ba kenezwi ki maswenyeho, ba ba ne ba na ni madimona, ba kanono, ni ba ba ne ba omelezi luñañali, mi Jesu a ba folisa kaufela. 25Batu ba mu latelela ka buñata. Ne ba zwa mwa Galilea, mwa sibaka sa Minzi ye Lishumi, mwa Jerusalema, mwa Judea ni mwa naha ye mwabuse bwa Jordani.
Currently Selected:
Mateu 4: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
