Mateu 3
3
Tuto ya Joani Mukolobezi
(Mar 1.1-8; Luk 3.1-18; Joa 1.19-29)
1Ka nako yeo Joani Mukolobezi a taha, mi a kala ku kutaza mwa matakanyani a Judea. 2#Mat 4.17; Mar 1.15 N'a li, “A mu bakele libi za mina kakuli Mubuso wa Lihalimu s'o li fakaufi!”
3 #
Isa 40.3
Joani ki yena ya n'a bulelwa ki mupolofita Isaya, ha n'a li,
“Ki linzwi la mutu ya huweleza mwa naheñi.
‘Mu bakanye mukwakwa wa Mulena!
Mu otolole linzila za hae, mw'a ka zamaya!’ ”
4 #
2 Male 1.8
Siapalo sa Joani ne si ezizwe ka boya bwa kamele, mi n'a itamile lukanda lwa litalo mwa teka. N'a pila nzie ni linosi la mwa naheñi. 5Batu ba Jerusalema, ba naha ya Judea kaufela, ni ba naha ye bapani ni Nuka ya Jordani kamukana, ne ba taha ku yena. 6Ne ba ipulela libi za bona fapil'a batu, mi Joani n'a ba kolobeza mwa Nuka ya Jordani.
7 #
Mat 12.34; 23.33 Joani h'a bona Bafalisi ni Basaduki ba bañata ba taha ku yena ku t'o kolobezwa, a li ku bona, “Yela mina, bana ba linoha! Ki mañi ya mi bulelezi kuli mu ka kona ku banduka kwa buhali bwa Mulimu bo bu ka tuha bu taha? 8Mu eze likezo ze ka bonahaza kuli mu bakezi libi za mina. 9#Joa 8.33 Mi mu si ke mwa hupula kuli mwa kona ku itatula ka ku bulela feela kuli, ‘Ndat'a luna ki Abrahama.’ Batili! Na mi bulelela kuli Mulimu wa kona ku nga macwe a, ni ku ezeza fateñi Abrahama bana! 10#Mat 7.19 Silepe si se si lukisizwe sa ku pumisa mibisi ya likota. Kota kaufela ye sa beyi miselo ye minde i ka lemiwa ni ku nepelwa mwa mulilo. 11Na, ni mi kolobeza ka mezi ku bonisa kuli mu bakile, kono ya ka taha mwamulaho wa ka, u ka mi kolobeza ka Moya o Kenile ni ka mulilo. Ki yo mutuna ku ni fita, mane ha ni swaneli nihaili ku lwala makatulo a hae. 12#But 5.14, 23 U sweli liselo la ku fefulisa mwa lizoho la hae, mi u ka fefula bubeke ku bu kauhanya kwa muuku. U ka beya buloto mwa lituli la hae, ni ku cisa muuku ka mulilo o sa timi!”
Kolobezo ya Jesu
(Mar 1.9-11; Luk 3.21-22)
13Ka nako yeo, Jesu a zwa mwa naha ya Galilea, a taha ku Joani kwa Jordani ku t'o kolobezwa ki yena. 14Kono Joani a lika ku hana, a li, “Na, ki na ya swanezi ku kolobezwa ki wena, cwale wena hape u taha ku na!”
15Kono Jesu a mu alaba, a li, “U lumele kuli ku be cwalo ka nako ye. Ka ku eza cwalo, kihona lu ka eza linto kaufela z'a bata Mulimu.” Mi Joani a lumela.
16Jesu a sin'o kolobezwa, a omboka. Honafo, lihalimu la kwaluluha, mi a bona Moya wa Mulimu, u shulumukela fahalimw'a hae sina liiba. 17#Sim 22.2; Lipi 2.7; Isa 42.1; Mat 12.18; 17.5; Mar 1.11; Luk 9.35 Mi linzwi le li zwa kwahalimu la li, “Yo, ki Mwan'a ka ye ni lata, ye ni katelwa hahulu.”
Currently Selected:
Mateu 3: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
