Simuluho 45

Josefa u izibahaza kwa banabahabo

1 # Lik 7.13 Josefa a palelwa ku iswala fapil'a bao kaufela ba ba ne ba inzi ni yena. Cwale a huweleza, a li, “Mu zwise batu kamukana.” Kamukwaocwalo ne ku si na mutu ya n'a inzi ni yena h'a izibahaza kwa bahulwani ba hae. 2A bulela a nz'a sikauka hahulu, mane Maegepita ba utwa, mi litaba za ba za y'o fita ku mulena. 3Josefa a li kwa bahulwani ba hae, “Ki na Josefa. Bo ndate kikuli ba sa pila, nji?” Kono bahulwani ba hae ne ba mu saba hahulu, mane ne ba palelwa ku alaba. 4Josefa kih'a li ku bona, “A mu sutelele kwanu.” Ba sutelela, mi a li, “Ki na munyan'a mina Josefa, ye ne mu lekisize kuli a isiwe mwa Egepita. 5Cwale mu si ke mwa bilaela kamba ku inyaza kakuli ne mu ni lekisize, batili! I n'e li Mulimu ya n'a ni tangetile ku t'o mi pilisa. 6Se, ki sona silimo sa bubeli feela sa tala mwa naha. Ku sa siyezi li ketalizoho fo ku si ke kwa limiwa kamba ku kutulwa. 7Mulimu u ni tangetile ku t'o kondisa lika, ni ku bonisa kuli mu ta ba ni baikulu. Ni tangetilwe ili kuli ni t'o pilisa ba bañata ba ku mina. 8Kono, ha si mina kasibili ba ba ni tisize kwanu, kono ki yena Mulimu luli. U til'o ni eza inge ki na ndat'ahe Faro mi ki na muzamaisi wa naha ya hae kaufela, ni mubusisi wa Egepita kamukana.

9 # Lik 7.14 “Cwale mu kutele kapili ku ndate, mu y'o mu bulelela, mu li, ‘S'a bulela Josefa mwan'a hao ki se, u li, Mulimu u ni ezize mubusisi wa naha ya Egepita kaufela. A ku tahe. U si ke wa liyeha. 10U ka t'o yaha mwa sibaka sa Gosheni, mo u ta ba fakaufi ni na, wena ni bana ba hao ni baikulu ba hao, lingu ni lipuli, likomu ni z'o luile kamukana. 11Haiba u yaha mwa Gosheni ni ta kona ku ku babalela. Ku ta ba ni lilimo li ketalizoho hape za tala, mi ha ni lati kuli wena, ni lubasi lwa hao ni ze mu na ni zona kamukana mu nyande.’

12“Cwalehe kaufel'a mina, bahulwani ba ka ni munyan'a ka Benjamine, mwa bona hande-nde kuli ki na luli ya bulela ni mina. 13Mu y'o bulelela ndate kuli ni na ni maata a matuna mwa Egepita. Mu y'o mu taluseza ka ze mu boni kamukana. Cwale mu akufe, mi mu y'o mu tisa kwanu.”

14Kiha s'a wela munyan'a hae Benjamine mwa mulala, mi a kala ku lila. Ni yena Benjamine a kala ku lila a nz'a nyangamezi mwa mulala wa hae. 15Kasamulaho, kihona bahulwani ba hae ba kala ku ambola ni yena cwale. A lila a nz'a ba humalela mwa milala.

16Litaba ha li y'o utwahala ku mulena Faro kuli bahulwani ba Josefa ba tile, Faro ni manduna ba hae ba taba. 17Faro a li ku Josefa, “Bulelela bahulwani ba hao kuli ba paheke lico za bona fa limbongolo, mi ba kutele kwa naha ya Kanana. 18Ba y'o nga ndat'a bona ni mabasi a bona, mi a tahe kwanu ku na. Ni ta ba fa naha ye nde ka ku fitisisa mwa Egepita mo, mi ba ta ca ze nde za mwa naha ye. 19U ba bulelele hape kuli ba ye ni likoloi ze ñwi za mwa Egepita mo, za ku y'o longa basali ni bana ba bona. U ba bulelele kuli ba y'o nga feela ndat'a bona, mi ba kutele kwanu. 20Ba si ke ba bilaela ka za bona ze ba ka siya. Naha ye fita manaha a mañwi kwa bunde, hona mwa Egepita mo, i ta ba ya bona.”

21Bana ba Jakobo ba eza cwalo. Josefa a ba fa likoloi, sina mw'a n'a bulelezi Faro, mi a ba fa ni mifaho. 22Hape, a fa yo muñwi ni yo muñwi wa bona siapalo sa bubeli, kono Benjamine yena a fiwa muwaya-waya wa silivela o eza mianda ye milalu ni liapalo li ketalizoho. 23A lumelela ndat'ahe limbongolo ze lishumi ze lwezi ze nde kamukana ze fumanwa mwa Egepita, ni ze lishumi ze lwezi lico za bukeke, mahobe ni lico za mufaho wa ndat'ahe. 24Cwale a fundula bahulwani ba hae, mi ha ba funduka, a li ku bona, “Mu be ni kutwano ha mu ya cwalo.”

25Ba zwa mwa Egepita, mi ba t'o fita mwa Kanana ku ndat'a bona Jakobo. 26Ha ba fita, ba li, “Ndate! Kanti Josefa u sa pila! Mane ki yena mubusisi wa naha ya Egepita, kaufel'a yona!” Kono Jakobo a eza inge ya mwa mandingwe, a sa kolwi.

27Kono ha ba se ba mu kandekezi litaba kamukana z'a n'a ba bulelezi Josefa, mi h'a bona likoloi ze lumelezwi ki Josefa za ku t'o mu isa kwa Egepita a nyakalala. 28Kiha s'a li, “Ku lukile! Josefa, mwan'a ka, u sa pila! Ni swanezi ku y'o mu bona ni si ka shwa kale!”

Currently Selected:

Simuluho 45: Lozi09

Highlight

Copy