Simuluho 46

Jakobo ni lubasi lwa hae ba ya kwa Egepita

1Jakobo a tama-tama za hae kamukana mi a ya kwa Beeresheba, kw'a il'o ezeza Mulimu wa Isaka ndat'ahe sitabelo. 2Mulimu a bulela ni yena mwa pono busihu, a li, “Jakobo, Jakobo.”

Jakobo a li, “Shangwe, n'a utwa.”

3Yena a li, “Ki na Mulimu, Mulimu wa ndat'aho. U si ke wa saba ku ya kwa Egepita, kakuli ni ta y'o atisa lusika lwa hao hona koo. 4Ni ta ya ni wena kwa Egepita, mi ni ta kutiseza lusika lwa hao hona kwanu hape. Zazi l'o ta shwa, Josefa ki yena ya ta ku kwahela meeto.”

5Jakobo a funduka mwa Beeresheba. Bana ba Isilaele ba longa ndat'a bona Jakobo, ni bana ba bona ba banyinyani ni basali ba bona mwa likoloi z'a n'a lumelezi Faro ku t'o ba nga. 6#Lik 7.15 Ba nga limunanu za bona ni liluwo le ne ba fumani mwa Kanana, mi ba ya kwa Egepita. Jakobo a nga lubasi lwa hae kamukana. 7Bana ba hae, baikulyaye, bana ba basizana ni baikulyaye ba basizana.

8A, ki ona mabizo a lusika lwa Isilaele ba ba ne ba ile kwa Egepita, ili Jakobo ni bana ba hae. I n'e li mweli wa Jakobo yena Rubeni, 9ni bana ba Rubeni, bo Hanoki, Palu, Hezironi ni Karimi. 10I n'e li bana ba Simioni, bo Jemuele, Jemini, Ohadi, Jakini, Zohari ni Shaule mwan'a musali wa Mukanana. 11I n'e li bana ba Livi, bo Gerishoni, Kohati ni Merari. 12I n'e li bana ba Juda, bo Eri, Onani, Shela, Perezi ni Zera, kono Eri ni Onani ne ba shwezi mwa Kanana. I n'e li bana ba Perezi, bo Herizoni ni Hamule. 13I n'e li bana ba Isakare, bo Rola, Puva, Jobo ni Shimironi. 14I n'e li bana ba Zebuloni, bo Seredi, Eloni ni Jaleele. 15Bao, ki bona bana ba bashimani b'a n'a pepile Jakobo ku Lea mwa Mesopotamia, kwand'a Dina wa musizana. Baikulyaye ni Lea ne ba eza mashumi a malalu ni ba balalu, kaufel'a bona.

16I n'e li bana ba Gadi, bo Zifioni, Hagi, Shuni, Eziboni, Eri, Arodi ni Areli. 17I n'e li bana ba Asere, bo Jimina, Ishiba, Ishibi, Beria ni Sera kaizel'a bona. I n'e li bana ba Beria, bo Hebere ni Malakiele. 18Bao ba lishumi ka silezi, ki lona lubasi lwa Jakobo ku Zilipa ya n'a filwe Lea ki ndat'ahe Labani.

19I n'e li bana ba Rahele, musal'a Jakobo, bo Josefa ni Benjamine. 20#Sim 41.50-52 Josefa yena a t'o pepa Manase ni Eferaimi mwa Egepita ku Asinati, mwan'a Potifera muprisita wa kwa Onu. 21I n'e li bana ba Benjamine, bo Bela, Bekeri, Ashibele, Gera, Naamani, Ehi, Roshi, Mupimi, Hupimi ni Areda. 22Bao ba lishumi ka ba bane, ki lona lubasi lwa Jakobo ku Rahele.

23I n'e li mwan'a Dani, bo Hushimi. 24I n'e li bana ba Nafetali, bo Jazeele, Guni, Jezeri ni Shilemi. 25Bao ba supile, ki lona lusika lwa Jakobo ku Biliha ya n'a filwe Rahele ki ndat'ahe Labani.

26Palo ya lusika lwa Jakobo kaufela lo lu ile kwa Egepita n'e li mashumi a silezi ka ba silezi, ku sa balwi basali ba bana ba hae. 27#Lik 7.14 Josefa a y'o pepa bana ba babeli mwa Egepita, mi palo ya taha fa mashumi a supile ya lubasi lwa Jakobo ba ba ne ba ile koo.

Jakobo ni lubasi lwa hae mwa Egepita

28Jakobo a tangeta Juda ku y'o kupa Josefa kuli a t'o bonana ni yena mwa Gosheni. Bao kaufela, ba t'o fita mwa naha ya Gosheni. 29Cwale Josefa a lumela koloi ya hae, mi a ya kwa Gosheni ku y'o katanyeza Isilaele ndat'ahe. A sa mu bona feela, a mu yongela mwa mulala, mi a lila nako ye telele a nz'a mu swalelezi cwalo. 30Jakobo a li ku Josefa, “Cwale niha ni ka shwa ha ku sa na pilaelo, kakuli ni ku boni, mi ni ziba kuli u sa pila.”

31Josefa kih'a li kwa bahulwani ba hae ni lubasi lwa ndat'ahe kaufela, “Ni swanezi ku y'o bulelela Faro kuli, ‘Bahulwani ba ka ni lubasi lwa ndate, ba ba ne ba pila mwa Kanana, ba fitile. 32Batu bao ki balisana ba lingu ni likomu, mi ba tile ni mitapi ya bona ya lingu ni likomu, ni ze ba na ni zona kamukana.’ 33Faro u ta mi biza, mi a mi buza, a li, ‘Mu ziba musebezi mañi?’ 34Mu alabe cwana, mu li, ‘Muñ'a ka, luna lu balisana ba likomu ku zwa fo lu pepezwi, sina bo ndat'a luna.’ Mu swanezi ku bulela cwalo ha mu lata ku pila mwa naha ya Gosheni, kakuli balisana ba lingu ba toilwe ki Maegepita.”

Currently Selected:

Simuluho 46: Lozi09

Highlight

Copy