Simuluho 40

Josefa u talusa litolo za mapantiti

1Ha ku se ku fitile nako, ndun'a maweta ba mulena ni ndun'a ba lienga la mulena wa Egepita ba foseza muñ'a bona. 2Faro a nyemela manduna ba hae bao ba babeli. 3Cwale a ba kenya mwa tolongo, mwa ndu ya muzamaisi wa mupolisa, ili ndu i liñwi ni mw'a n'a beilwe Josefa. 4Muzamaisi yo a ba beya mwa pabalelo ya Josefa. Ba ina nako ye telele mwa tolongo.

5Zazi le liñwi, busihu hona mo mwa tolongo, ndun'a maweta ni ndun'a ba lienga la mulena wa Egepita ba lola mwa bubeli bwa bona. Yo muñwi ni yo muñwi n'a na ni tolo ya hae ni taluso ya yona. 6Josefa h'a taha ku bona kakusasana, a bona kuli ne ba filikani. 7A ba buza, a li, “Kiñi ha mu swabile cwana kacenu?”

8Ba alaba, ba li, “Yo muñwi ni yo muñwi wa luna u bile ni tolo, mi mo ha ku na ya ka lu bulelela ze li talusa.”

Josefa a li, “Ki Mulimu ya fa litaluso. A mu ni bulelele litolo za mina.”

9Cwale ndun'a maweta a bulela tolo ya hae, a li, “Na, ni lolile ni nze ni bona kota ya veine fapil'a ka. 10Kota i na ni mitai ye milalu. Matali a sa shoshela feela, lipalisa ni zona za bonahala i sa li hona fo, mi miselo ya buzwa. 11Ne ni swalelezi sinwiso sa Faro. Kiha se ni koyaula miselo, na i hamulela ku sona, mi na y'o fa Faro.”

12Josefa a li, “Taluso ki ye. Mitai ye milalu ki mazazi a malalu. 13Mwamulaho a mazazi a malalu Faro u ta ku zwisa, a ku swalele, mi a ku kutiseze mwa situlo sa hao. U ta y'o fanga Faro sinwiso sa hae sina pili, ha n'o sa li nduna wa waine. 14Kono u ni hupule ha u s'o iketile hande mi, mwanesu, u be ni musa wa ku y'o ni biha ku Faro kuli ni zwe mwa tolongo mo. 15Ne ni uzwizwe mwa naha ya Maheberu, mi ni kwanu ni til'o kenyiwa feela mwa tolongo ni si ka fosa se siñwi.”

16Ndun'a wa ba lienga, h'a utwa kuli taluso ya tolo ne li ye nde, a li ku Josefa, “Ni na, ni lolile cwana. Ne ni lwezi lizuma ze talu za mahobe fa toho. 17Mwa sizuma se si fahalimu, ne ku na ni mifuta-futa ya lico ze ne apehezwi Faro, kono ne li ciwa ki linyunywani.”

18Josefa a alaba, a li, “Taluso ki ye. Lizuma ze talu ki mazazi a malalu. 19Mwamulaho a mazazi a malalu, Faro u ta ku zwisa, mi u y'o pumiwa toho. Kihona a ta lepeleza mubili wa hao kwa kota, mi u ciwe ki linyunywani.”

20Ka lizazi la bulalu, ili la kupuzo ya ku pepwa kwa Faro, a ezeza manduna ba hae kaufela mukiti. A tisa ndun'a maweta ni ndun'a ba lienga fa pil'a manduna kamukana. 21A kutiseza ndun'a maweta mwa sibaka sa hae. 22Kono ndun'a ba lienga, yena, a bulaiwa, ili hona cwalo mw'a n'a taluselize Josefa litolo za bona. 23Kono ndun'a maweta h'a si ka hupula Josefa. N'a mu libezi.

Currently Selected:

Simuluho 40: Lozi09

Highlight

Copy