Simuluho 39

Josefa ni musal'a Potifaro

1Josefa n'a isizwe kwa Egepita, ko Potifaro wa Muegepita, nduna ya Faro ni muzamaisi wa mapolisa ba lapa la mulena, a y'o mu leka kwa Maishimaele ba ba ne ba mu tisize mwa Egepita. 2#Lik 7.9 Muñ'a Bupilo n'a babalela Josefa, a nz'a mu lukiseza lika kamukana. N'a ina mwa ndu ya mulen'a hae wa Muegepita. 3Mulen'a hae a lemuha kuli n'a babalelwa ki Muñ'a Bupilo, ni kuli Muñ'a Bupilo n'a kondisa z'a n'a eza kaufela. 4Potifaro n'a lata Josefa, mi n'a tabiswa ki mukwa w'a n'a mu sebeleza ka ona. Kiha s'a mu eza sikombwa se situna sa ndu ya hae ni z'a n'a na ni zona kamukana. 5Ku zwa nako yeo, Muñ'a Bupilo a tohonolofaza ndu ya Muegepita kabakala Josefa. Muñ'a Bupilo a fuyaula z'a n'a na ni zona kaufela mwa ndu ya hae ni mwa masimu a hae. 6Potifaro a beya lika za hae kamukana mwa pabalelo ya Josefa, mi n'a si na taba ni zona konji lico z'a n'a ca.

Josefa n'a na ni siyemo se sinde, mi n'a li yo munde ni ka sifateho. 7Mwamulaho a nakonyana, musal'a mulen'a hae a kala ku talima Josefa ka takazo. A li, “Taha, u t'o fosa ni na.” 8A hana, mi a li ku yena, “Mulen'a ka u itatuzi mwa lika kamukana ze mwa ndu, kakuli na, ni teñi. U ni file maata a ku zamaisa z'a na ni zona kaufela. 9Ni na ni buikalabelo bo butuna mwa ndu mo, sina yena, mi ha ku na s'a ni hanisa, kwand'a hao, wena musal'a hae. Cwale se si ka ni ezisa nto ye maswe cwalo ki sifi, kuli ni be ni foseza Mulimu?” 10Niha n'a bizanga Josefa ka zazi ni zazi, yena n'a sa teelezi, kakuli n'a sa lati ku fosa ni yena.

11Kono zazi le liñwi, Josefa h'a kena mwa ndu ku y'o sebeza, ne ku si na mutu ku ba ba ne ba sebezanga mwateñi. 12Musali yo kih'a t'o mu swala kwa baki, a li, “Taha, u t'o fosa ni na.” Kono a mu bolomoka, mi a matela kwande, a mu siya a nz'a swalelezi baki mwa mazoho. 13A bona kuli u siile baki, mi u zwile mwa ndu ka lubilo. 14Kiha s'a biza batu ba hae, a li, “A mu bone! Munn'a ka u tisize Muheberu yo mwa ndu ya luna, mi cwale wa lu tompolola. U ni kenezi mwa ndu ya ka ku t'o ni kupa kuli ni fose ni yena, kono na huwa mo ne ni konela kaufela. 15Ha s'a ni utwa ni huwa, s'a matela kwande, ku siya baki ya hae kwatuko a ka.”

16A buluka baki yeo ku fitela muñ'a Josefa a fita. 17Kih'a mu kandekela yona taba yeo, a li, “Mutanga yo wa Muheberu, y'o lu tiselize, n'a tile mwa ndu ya ka ku t'o ni tompolola. 18Kono ha ni se ni huwa, s'a matela kwande, mane s'a siya baki ya hae kwatuko a ka.”

19Mulen'a Josefa a halifa hahulu h'a utwa z'a mu bulelela musal'a hae, h'a li, “Kihona mw'a ni ezelize mutang'a hao cwalo.” 20Kiha s'a tamisa Josefa ni ku mu kenya mwa tolongo ko ne ba inanga mapantiti ba mulena, mi a ina moo. 21#Lik 7.9 Kono Muñ'a Bupilo a babalela Josefa ka sishemo, mane mupolisa wa tolongo a ba a tabela Josefa hahulu. 22A mu eza muzamaisi wa mapantiti ba bañwi kaufela. A ba yena ya n'a na ni buikalabelo fa lika kamukana ze ne eziwa mwa tolongo. 23Mupolisa yo n'a sa talimi lika kaufela ze ne babalelwa ki Josefa, kakuli Muñ'a Bupilo n'a li fakaufi ni Josefa, mi n'a mu kondiseza z'a n'a eza kamukana.

Currently Selected:

Simuluho 39: Lozi09

Highlight

Copy