Simuluho 29

Jakobo h'a fita mwa munzi wa Labani

1Jakobo a zwelapili mwa musipili wa hae, wa ku ya kwa naha ya batu ba kwa Upa. 2Honafo a bona siliba mwa masimu ni mitapi ye milalu ya lingu i butile kwatukw'a sona. Mitapi yeo, i ne i nwiswa hona mwa siliba seo, se ne si kwahezwi ka licwe le lituna. 3Mitapi ha i ne i t'o kopananga fo kaufela, balisana kihona ha ne ba pikulusanga licwe fa mulomo wa lisima, mi cwale ba kale ku li nwisa. Ha ne ba felize, ne ba li kutisezanga fateñi.

4Jakobo a ba buza, a li, “Balikani, mu zwa kai?”

Ba mu alaba, ba li, “Lu zwa mwa Harani.”

5A zwelapili, a li, “Labani mwan'a Nakori mwa mu ziba, nji?”

Ba alaba, ba li, “Eni lwa mu ziba.”

6A buza hape, a li, “U zuha cwañi?”

Bona ba li, “Wa zuha hande, mane ni mwan'a hae Rahele ki yo, u tisa mutapi wa habo.”

7Jakobo a li, “I sa li musihali, mi ha si yona nako ya ku holosa lingu, kiñi ha mu sa li nwisi kuli li y'o fula hape?”

8Ba alaba, ba li, “Ha lu koni ku eza cwalo, konji mitapi kamukana ha i se i fitile ni licwe se li sutisizwe. Kihona lu ka nwisa mitapi.”

9Jakobo ha s'a bulela ni bona, Rahele a fita ni mutapi wa ndat'ahe. Ki yena ya n'a babalela mutapi wa hae. 10Cwale Jakobo h'a bona Rahele ni mutapi wa Labani malum'ahe, a ya kwa siliba, a zwisa licwe fateñi, mi a nwisa lingu. 11Kiha s'a mu tubeta, mi a kala ku lila. 12A bulelela musizana, a li, “Na, ni mwan'a Rebeka, mwanahabo ndat'aho.”

Kiha s'a mata ku y'o bulelela ndat'ahe. 13H'a utwa litaba za Jakobo, mwan'a kaizel'a hae, a mata ku y'o mu katanyeza, a mu humalela, a mu tubeta, mi a mu isa mwa ndu. Jakobo kih'a bulelela Labani ze ezahalile kamukana. 14Labani a li ku yena, “Ee, kaniti u nama ya nama ya ka ni mali a mali a ka.” Jakobo a ina moo kweli mutumbi.

Jakobo u belekela Rahele ni Lea ku Labani

15Labani a bulelela Jakobo, a li, “U si ke wa ni belekela feela kakuli u wahesu. U bata ku lifiwa bukai?” 16Labani n'a na ni likalibe ze peli. Yo muhulu n'a bizwa Lea, mi yo munyinyani ne li Rahele. 17Lea ne si yo munde hahulu. Kono Rahele yena n'a yemi hande, ili yo munde luli.

18Jakobo n'a latana ni Rahele, kiha s'a li, “Ni ta ku belekela lilimo ze supile kuli u ni fe mwan'a hao yo munyinyani Rahele.”

19Labani a li, “I ne i ka ba hande ha ne ni ka ku fa yena, ku fita ku mu fa mutu u sili. Ina ni na.” 20Jakobo a sebeleza Rahele lilimo ze supile, mi lilimo zeo ku yena za bonahala inge mazazinyana feela, kakuli n'a mu lata hahulu.

21Jakobo a li ku Labani, “Ni fe musal'a ka, ni nyale, kakuli ni se ni felize mazazi a ka.” 22Cwale Labani a lukisa mukiti wa linyalo, mi a mema batu kamukana ba mwa sibaka seo. 23Kono bona busihu bo, a isa Lea ku Jakobo bakeñisa Rahele, mi a ba musal'a hae. 24Labani a fa Lea musizana wa mutanga ya bizwa Zilipa. 25Habusa Jakobo kihona a lemuha kuli kanti ne li Lea. Kiha s'a li ku Labani, “Kanti u ni ezize taba ya mufuta mañi? Na, ni belekezi Rahele. Kikabakalañi, ha u ni pumile ku ni tiseza Lea?”

26Labani a alaba, a li, “Wo, ha si ona mukwa wa luna kwanu wa ku nyalisa yo munyinyani pili, ku siya yo muhulu. 27Litela pili, ku fele sunda ye ya mukiti, mi kihona ni ta ku fa Rahele haiba u ka sebeza hape lilimo ze supile.”

28Jakobo a lumela, mi sunda ya mukiti ha i se i felile, Labani a mu fa Rahele mwan'a hae kuli a be musal'a hae. 29Labani a fa Rahele musizana wa mutanga ya bizwa Biliha. 30Cwale Jakobo a kopana ni Rahele, mi a mu lata hahulu ku fita Lea. A belekela Labani lilimo ze supile hape.

Bana ba Jakobo

31Muñ'a Bupilo ha s'a boni kuli Lea u ca mulinda, a mu fa lupepo, kanti Rahele yena a ina a si na bana. 32Lea a itwala, mi a pepa mushimani. Kih'a li, “Muñ'a Bupilo u boni manyando a ka, mi cwale munn'a ka u ka ni lata.” A mu beya libizo la Rubeni. 33A itwala hape, mi ni hona a pepa mushimani. Lea a li, “Muñ'a Bupilo hape u ni file mushimani yo, kakuli u utwile kuli ni ca mulinda.” Cwale a mu beya libizo la Simioni. 34A itwala hape, mi a pepa mushimani. Kih'a li, “Cwale munn'a ka u tamehile ku kumalela ku na, kakuli ni se ni pepile ni yena bashimani ba balalu.” Kih'a mu biza Livi. 35Hape a itwala mi a pepa mushimani. Kiha s'a li, “Cwale ni ta lumba Muñ'a Bupilo.” Kabakaleo a mu biza Juda. Mi lupepo lwa yema.

Currently Selected:

Simuluho 29: Lozi09

Highlight

Copy