Simuluho 28

1Isaka a biza Jakobo, mi ha s'a mu lumelisize, a mu laela, a li, “U si ke wa nyala musali wa Mukanana. 2U itukise mi u ye kwa Mesopotamia, kwa lusika lwa Betuele, kukw'a hao ya pepa m'aho. U y'o nyala kwa bana ba malum'aho Labani. 3Mulimu ya Maata Kaufela a fuyaule linyalo la hao, mi a ku fe bana ba bañata kuli u be mushemi wa mishobo ye miñata. 4#Sim 17.4-8 A ku fuyaule, wena ni baikulu ba hao, sina mw'a fuyaulezi Abrahama, mi u luwe lifasi le, mo u pilile, ili lifasi l'a filwe Abrahama ki Mulimu.” 5Cwale Isaka a lumelela Jakobo kwa Mesopotamia, ku Labani mwan'a Betuele wa Muarami. Labani n'e li kaizel'a Rebeka, m'ahe Jakobo ni Isau.

Isau u nyala musali yo muñwi

6Isau a lemuha kuli Isaka n'a fuyauzi Jakobo ni ku mu lumela kwa Mesopotamia ku y'o nyalela kwateñi. Hape a lemuha kuli ha s'a mu tohonolofalize, a mu laela kuli a si ke a nyala musali wa Mukanana. 7A bona kuli Jakobo n'a utwile ndat'ahe ni m'ahe, mi n'a s'a ile kwa Mesopotamia. 8Isau cwale a utwisisa kuli Isaka, ndat'ahe, n'a sa lati basali ba Makanana. 9Cwale kiha s'a ya ku Ishimaele, mwan'a Abrahama, mi a y'o nyala musali kwateñi, yena Mahalata, mwan'a Ishimaele ili kaizel'a Nebajoti.

Tolo ya Jakobo kwa Betele

10 # But 10.10 Jakobo a funduka mwa Beeresheba ku ya kwa Harani. 11A y'o fita mwa sibaka se siñwi, mi a tibelela kakuli lizazi ne li se li likezi. A lobala, a samile fa licwe. 12#Joa 1.51 Kih'a lola mi a bona pahamelo ye zwa fafasi, i y'o kena mwa lihalimu. Mangeloi a Mulimu n'a nz'a kambama ni ku shetumuka ka yona. 13#Sim 13.14-15 Cwale kih'a bona Muñ'a Bupilo a mu yemelezi, a li, “Ki na Muñ'a Bupilo, Mulimu wa Abrahama ni wa Isaka. Ni ta ku fa sibaka s'o lobezi ku sona, wena ni baikulu ba hao. 14#Sim 12.3; 22.18 Baikulu ba hao ba ta ba ba bañata sina liluli la lifasi. Ba ta ekeza naha ya bona mwa maneku kamukana, mi macaba a lifasi kaufela a ta ni kupa kuli ni a tohonolofaze sina mo ni fuyaulezi wena ni lusika lwa hao. 15U zibe kuli ni ta ba ni wena, ni ku sileleze k'o ya kamukana, mi ni ta ku kutiseza hona mwa naha ye. Ha ni na ku ku siya, ni si ka eza ze ni ku bulelezi kaufela.”

16Jakobo a zuha, mi a li, “Bati, ne ni sa zibi, kaniti Muñ'a Bupilo u teñi mwa sibaka mo!” 17A saba, mi a li, “Sibaka se, si sabisa cwañi! Kaniti ki ndu ya Mulimu ni munyako wa lihalimu.”

18Jakobo a zuha i sa li kakusasa. A nga licwe l'a n'a samile, mi a li yemisa sina la kupuzo. Cwale a li sela mafula fahalimu, a li sumekela Mulimu. 19Sibaka seo a si biza Betele. Munzi wo, n'o bizwa Luzi pili. 20Jakobo a itama ka maci ku Muñ'a Bupilo, a li, “Haiba u ka ni tokomela ni ku ni sileleza mwa musipili o ni sweli wo, mi wa ni fa lico ni liapalo, 21mane ni be ni kutele hande kwa munzi wa ndate, u ta ba Mulimu wa ka. 22Licwe le, le ni yemisize ike la kupuzo, li ta ba ndu ya hao, mi ni ta ku fa kalulo ya bulishumi ya z'o ni fa kamukana.”

Currently Selected:

Simuluho 28: Lozi09

Highlight

Copy