Simuluho 27

Jakobo u ikungela limbuyoti za Isaka

1Isaka n'a s'a li mucembele, mi ne s'e li sibofu. A biza Isau mwan'a hae yo muhulu, mi a li ku yena, “Mwan'a ka!”

Isau a alaba, a li, “Shangwe.”

2Isaka a li, “Wa bona kuli ni se ni hulile, mi mwendi ni ka tuha ni shwa. 3Cwalehe, u nge lizumiso za hao, buta ni masho, u ye mwa naheñi, u y'o ni bulaela folofolo. 4Ha u se u i bulaile, u i apehe hande mo ni latela, mi u ni tiseze yona. Cwale ha ni se ni i cile, kihona ni ta ku fa limbuyoti za mafelelezo ni si ka shwa kale.”

5Rebeka n'a nz'a teelelize Isaka ha n'a bulela ni mwan'a hae Isau. Isau a ya mwa naheñi ku y'o zumela ndat'ahe folofolo. 6Rebeka a li ku Jakobo, “Ni utwile cwanoñu fa ndat'aho h'a bulelela Isau, a li, 7‘Ni tiseze nama ya folofolo, mi u ni apehele yona. Ha ni se ni cile, ni ta ku fa limbuyoti za mafelelezo ni si ka shwa kale.’ 8Cwalehe mwan'a ka, u ni teeleze, mi u eze se ni ka ku bulelela. 9Ya kwa mulaka, u y'o nga tupuli twa mankomwana to tubeli to tu nunile mi u ni tiseze tona, kuli ni tu apehe ka mukwa w'a lata ndat'aho. 10Kihona u ta iseza ndat'aho kuli a y'o ca, mi a ku siyele limbuyoti za hae a si ka shwa kale.”

11Kono Jakobo a li ku m'ahe, “Wa ziba kuli Isau u na ni buambo fa mubili kanti na, ha ni na. Litalo la ka la telela. 12Mwendi bo ndate ba ka ni swala-swala, mi ba bone kuli na ba puma. Cwale ni ka itiseza sikuto bakeñisa mbuyoti.”

13M'ahe a alaba, a li, “Mwan'a ka, sikuto seo si tahe fahalimw'a ka. Eza feela mo ni ku bulelela. Zamaya, u y'o ni ngela lipuli zeo.” 14A ya ku y'o li nga, mi a mu tiseza zona. M'ahe kih'a apeha lico ze ne latwa ki ndat'ahe. 15Cwale Rebeka a nga liapalo ze nde za Isau, z'a n'a bulukile mwa ndu, mi a li apesa Jakobo. 16A beya matalo a lipuli fa miambo ya hae ni mwa mulala mo ku si na buambo. 17Kiha s'a mu fa lico ze munati ni buhobe bw'a n'a apeile.

18Cwale Jakobo a ya ku ndat'ahe, mi a li, “Ndate!”

Ndat'ahe a alaba, a li, “Ki na yo, wena u mañi kwa bana ba ka?”

19Jakobo a alaba, a li, “Ki na Isau mweli wa hao. Ni se ni ezize m'o n'o ni bulelezi. Cwale u ine hande, mi u ce kwa nama ye ni ku tiselize, kuli u ni fuyaule.”

20Isaka a li, “U i fumani cwañi kapili, mwan'a ka?”

Jakobo a alaba, a li, “Muñ'a Bupilo, Mulimu wa hao, u ni tusize ku i fumana kapili.”

21Isaka kih'a li ku Jakobo, “Mwan'a ka, sutelela ni ku swala-swale. Kana luli ki wena mwan'a ka Isau, kamba cwañi?” 22Jakobo a sutelela ku ndat'ahe, mi yena a mu swala-swala. Kih'a li, “Linzwi li utwahala inge la Jakobo, kono miambo ya hao i swana sina ya Isau.” 23H'a si ka lemuha kuli ki Jakobo, kakuli miambo ya hae ne i na ni buambo sina ya Isau. Kiha s'a kala ku mu fuyaula. 24Kono a buza, a li, “Kana luli ki wena mwan'a ka Isau?”

Yena a alaba, a li, “Ki na luli.”

25Isaka a li, “Ni tiseze kwa nama ya hao yeo. Ni ce, kihona ni ta ku fuyaula.” Jakobo a mu tiseza yona, mi a mu tiseza ni waine cwalo kuli a nwe. 26Cwale ndat'ahe a li ku yena, “Mwan'a ka, sutelela fakaufi, u t'o ni tubeta.” 27#Maheb 11.20 H'a sutelela ku t'o mu tubeta, Isaka a nunka liapalo za hae, cwale a mu tohonolofaza, a li,

“Muunko wo o munde wa mwan'a ka

u swana ni muunko wa simu

ye tohonolofalizwe ki Muñ'a Bupilo.

28Mulimu a ku fe puka ya kwahalimu,

mi a nunise masimu a hao.

A ku fe kutulo ye ñata ni waine cwalo.

29 # Sim 12.3 Macaba kamukana a be batanga ba hao,

mi mishobo ya batu i ku showelele.

U be muzamaisi wa banabahenu,

ni lusika lwa bo m'aho lu ku showelele.

Ba ba ku kuta ba kutelwe ki sikuto

sa bona,

mi ba ba ku fuyaula ba tohonolofazwe.”

30Isaka a feza ku fa limbuyoti za hae, mi Jakobo a zwa. I sa li hona fo, muhulwan'a hae Isau a kuta kwa ku zuma kw'a n'a ile. 31Ni yena hape a apeha lico ze munati mi a li isa ku ndat'ahe. H'a fita, a li, “Ndate, u ine hande, u ce nama ye ni ku tiselize, na mwan'a hao, kuli u ni fuyaule.”

32Ndat'ahe a mu buza, a li, “Ki wena mañi hape?”

Mucaha a alaba, a li, “Ki na mweli wa hao Isau.”

33Isaka a ikomokela a nz'a njanja, a buza, a li, “Kanti ki mañi, ya bulaile folofolo ni ku ni tiseza yona? Ha u kena fa kihona ni sa z'o feza ku ca. Ni mu file limbuyoti za ka za mafelelezo, mi cwale li ta ba za hae kuya kuile!”

34Isau h'a utwa cwalo, a bokolola hahulu, mi a li, “Ndate, a ku ni tohonolofaze ni na, cwalo!”

35Isaka a alaba, a li, “Munyan'a hao u tile fa, a t'o ni puma, mi cwale u ikungezi limbuyoti za hao.”

36 # Sim 25.29-34 Isau a li, “Lo, i se li lwa bubeli a nz'a ni puma. Ha ku komokisi h'a bizwa Jakobo. U ngile litukelo za ka za mwana wa mweli, mi nako ye hape u ikungezi limbuyoti za ka. Ndate, kikuli ha u sa na kambuyoti k'o ni siyezi, nji?”

37Isaka a alaba Isau, a li, “Ni se ni mu ezize mulen'a hao. Ni banabahabo kamukana ni ba ezize batanga ba hae. Ni mu file lico ni waine. Cwale mwan'a ka, se si siyezi, se ni ka ku ezeza sona, ki sifi?”

38 # Maheb 12.17 Isau a zwelapili ku itapelela ku ndat'ahe a nz'a li, “Au ndate, kikuli ha u na nihaili kambuyoti ka li kañwi feela ka ka siyezi, nji? U ni fuyaule ni na, ndate.” Mi a kala hape ku lila ka tata.

39 # Maheb 11.20 Isaka kiha s'a li ku yena,

“Bona, u ta pila kwahule ni bufumu

bwa lifasi,

kwahule cwalo ni puka ya lihalimu.

40 # Sim 36.8; 2 Male 8.20 U ta pila ka lilumo la hao,

mi u ta ba mutang'a munyan'a hao.

Kono ha u ka tatafala,

nako ya ku ikulula mwa joko ya hae

i ta ba teñi”

41Isau a toya Jakobo, kakuli ndat'ahe n'a mu file limbuyoti za hae, mi a hupula, a li, “Nako ya ku silisa lifu la bo ndate i fakaufi. Sililo si sa fela feela, luli ni ta bulaya Jakobo.”

42 # But 10.10 Kono Rebeka a utwa mulelo wa Isau. A biza Jakobo, mi a li, “Yela, utwa mulelo wa muhulwan'a hao Isau. U bata ku ku kutiseza bumaswe ka ku ku bulaya. 43Cwalehe, mwan'a ka, eza se ni ku bulelela. U itukise, mi u sabele ku kaizel'a ka Labani kwa Harani. 44U y'o ina ni yena nakonyana, ku fitela mwanahenu a wa pilu. 45U y'o libelela ku fitela a ta libala. Fohe, ni ta luma mutu ku y'o ku nga. Ni ka shwelwa cwañi ki bana ba ka ba babeli mwa lizazi li li liñwi?”

Isaka u lumelela Jakobo ku Labani

46Rebeka a li ku Isaka, “Basali ba Isau ba Mahiti ba, ba ni swenya luli. Mane ni se ni katezi. Haiba Jakobo ni yena a ka nyala bona Mahiti ba, bunde kiha ne ni ka shwa feela.”

Currently Selected:

Simuluho 27: Lozi09

Highlight

Copy