Simuluho 18

Sepiso ya ku pepwa kwa Isaka

1Muñ'a Bupilo a iponahaza ku Abrahama kwa likota za Mamare. Ka nako ya ku cisa hahulu kwa lizazi, Abrahama n'a inzi kwatuko a munyako wa tende ya hae. 2#Maheb 13.2 H'a inuka, a bona batu ba balalu ba yemi hona foo. A sa ba bona feela, a nanuha fa munyako wa tende, mi a matela ku bona ku y'o ba katanyeza. H'a nz'a kubami, a inamezi fafasi. 3A li ku bona, “Malen'a ka, haiba mu ni utwela butuku, mu si ke mwa fitelela mu si ka pumula hanyinyani. Na, ni mutang'a mina. 4Ni sa mi tiseza mezi a ku tapa kwa mahutu. Mu pumule hanyinyani mwatas'a kota ye. 5Ni ka mi tiseza lico ze ka mi tiisa ha mu zwelapili mwa musipili wa mina. Mu tile ku na, cwale ni itukiselize ku mi tusa.”

Ba mu alaba, ba li, “Ku lukile. Eza m'o bulelezi.”

6Abrahama kih'a akufela mwa tende, mi a y'o li ku Sara, “Akufa, u nge bupi bo bunde, bo buñatanyana, bo bu nekile hande, mi u lukise buhobe.” 7Cwale a matela kwa mulaka, a y'o taba nkomwana ye nunile, mi a i fa mutanga kuli a i apehe kapili. 8Kiha s'a nga mafi, muzilili ni nama, mi a li tiseza baenyi. Ha ne ba sa ca, a t'o yema kwatuko a bona, kwatas'a kota.

9Kiha ba mu buza, ba li, “Musal'a hao Sara u kai?”

A ba alaba, a li, “U mwa tende mwani.”

10 # Baro 9.9 Yo muñwi wa baenyi a li, “Ni ku sepisa kuli ka yona nako ye silimo se si taha, musal'a hao Sara u ta ba ni mwana wa mushimani, mi ni ta kutela kwanu ka yona nako yeo.”

Sara n'a teelelize, a li kwa munyako wa tende ye kwamulaho wa hae. 11Abrahama ni Sara ne ba se ba supezi hahulu, mane Sara n'a s'a fulile kale. 12#1 Pit 3.6 Hona fo Sara a sehela mwa pilu, a li, “Cwale na kuli ni pepe mwa bucembele bwa ka bo! Kana ni sa nahanelwa ku tabela ze cwalo, nji? Hape ni mun'a ka s'a supezi!”

13Cwale Muñ'a Bupilo a buza Abrahama, a li, “Sara u sehiswa kiñi, hape u bulela cwañi, ha li, ‘Kana luli ni ka ba ni mwana, na, mucembele ya cwana?’ 14#Luk 1.37 Kana ku Muñ'a Bupilo ku na ni se si pala, na? Ka nako ye lukela, ili mwa kweli ya busupa ni ze peli, ni ta kutela ku wena, mi ka yona nako yeo, Sara u ta ba ni mwana.”

15Kakuli Sara n'a saba, kiha sa latula, a li, “Ha ni si ka seha.”

Kono yena a alaba, a li, “Ee, u sehile!”

Abrahama u lapelela Sodoma

16Batu bao kiha ba funduka, mi ba ya mwa sibaka mo ne ba ka bona hande munzi wa Sodoma, mi Abrahama a ba sindeketa. 17Cwale Muñ'a Bupilo a hupula mwa pilu, a li, “Ha ni na ku patela Abrahama se ni y'o eza. 18Lusika lwa hae, lu ta ba sicaba se situna, se si maata, mi mafasi kamukana a ta kupa ku fuyaulwa sina yena. 19Ni mu ketezi kuli a kone ku laela bana ba hae ni lusika lwa hae lo lu sa taha, kuli ba mamele milao ya ka, ba eze likezo ze nde ze lukile. Cwalehe, kihona ni ka mu ezeza ze ni mu sepisize kaufela.”

20Muñ'a Bupilo kih'a li, “Ku na ni milatu ye maswe hahulu ye tamelezwa Sodoma ni Gomora, mi sibi sa yona ki se situna hahulu. 21Ni swanezi ku ya kwateñi ni y'o bona haiba ze ni utwa ki niti. Ni ta y'o iponela zona.”

22Cwale batu bao ba zwelapili ba libile kwa Sodoma, kono Muñ'a Bupilo a siyala ni Abrahama. 23Abrahama a sutelela ku yena mi a mu buza, a li, “Kikuli luli u hupula ku bulaelela ba ba si na mulatu hamoho ni ba ba fosize, nji? 24Haiba ku na ni batu ba mashumi a ketalizoho ba ba lukile mwa munzi mo, kikuli u ta u sinya, na? Kana ha u na ku u tuhela ili ku pilisa ba mashumi a ketalizoho bao? 25Kaniti ha u na ku bulaya batu ba ba lukile hamoho ni ba ba maswe. Fo ha ku konahali! Ha u na ku eza taba ye cwalo! Ha ku ka ba cwalo, ba ba lukile se ba ka atulwa sina ba ba maswe. Cwalo hape ha ku konahali. Muatuli wa lifasi kaufela u na ni ku eza ka ku luka.”

26Muñ'a Bupilo a alaba, a li, “Haiba ni ka fumana ba mashumi a ketalizoho ba ba lukile mwa Sodoma, ni ta swalela munzi kaufela kabakala bona bao.”

27Abrahama a bulela hape, a li, “Muñ'a ka, u ni swalele ka toho-tata ya ka ha ni sa zwelapili ku bulela ni wena. Na, ni mutu feela, mi ha ni na tukelo ya ku bulela se siñwi. 28Kono haiba ku ka ba ni batu ba mashumi a mane ni ba ketalizoho feela ba ba lukile bo? Kana u ta sinya munzi kaufela kakuli ku tokwahala ba ketalizoho ku eza mashumi a ketalizoho?”

Muñ'a Bupilo a mu alaba, a li, “Ha ni na ku sinya munzi haiba ni ka fumana ba mashumi a mane ni ba ketalizoho ba ba lukile.”

29Abrahama a bulela hape, a li, “Ha ku ka ba ni ba mashumi a mane feela bo?”

A alaba, a li, “Haiba ku ka ba ni ba mashumi a mane, ha ni na ku u sinya.”

30Abrahama a li, “Mulen'a ka, u si ke wa nyema, ni sa bulela hape. Ku ka ba cwañi haiba ku na ni ba mashumi a malalu feela?”

A li, “Ha ni na ku eza cwalo ha ni ka fumana ba mashumi a malalu.”

31Abrahama a li, “Muñ'a ka, u ni swalele ka litahatata la ka ha ni sa zwelapili cwalo ni nze ni bulela ni wena, Mulena. Ha ne ku ka fumaneha feela ba mashumi a mabeli, bo?”

A li, “Ha ni ka fumana ba mashumi a mabeli, ha ni na ku sinya munzi.”

32Abrahama a li, “Muñ'a ka, u si ke wa ni nyemela, ni sa bulela hañwi feela. Haiba ku fumaneha ba lishumi feela, bo?”

“Ha ni na ku u sinya haiba ni fumana ba lishumi.” 33Ha s'a felize ku bulela ni Abrahama, Mun'a Bupilo a ikela, mi ni yena Abrahama a kutela kwa ndu ya hae.

Currently Selected:

Simuluho 18: Lozi09

Highlight

Copy