Simuluho 19

Sibi sa batu ba Sodoma

1Mangeloi a mabeli ao h'a t'o kena mwa Sodoma ka swalala, Lota n'a inzi kwa munyako wa munzi, ko ne ba kopanelanga batu. A s'a ba bona feela, Lota a yema, mi a y'o ba katanyeza. A kubama fapil'a bona, a nz'a inamezi fafasi. 2A li, “Malen'a ka, a mu fapuhele kwa ndu ya ka, na mutang'a mina, mu y'o tapa kwa mahutu ni ku y'o pumulela kwateñi busihu bo. Mu ta zwelapili mwa musipili wa mina ha bu se bu sile.”

Kono ba alaba, ba li, “Batili, lu ta lobala hona fa patelo ya munzi fa.”

3Kono a tundamena ku ba kupa, mane kwa mafelelezo ba lumela ku ya ni yena kwa ndu ya hae. Lota a ba lukiseza sinkwa se si si na mumela, mi ba lalela.

4Baenyi ba si ka lobala kale, batu ba mwa Sodoma ba taha, ba t'o potoloha ndu ya Lota. Batu ba mwa hae kaufela ne ba li teñi, ba bahulu ni ba banyinyani. 5#Baat 19.22-24 Ba bizeza Lota fande, mi ba mu buza, ba li, “Ba kai banna ba ba tibelezi ku wena busihu bo? Ba zwiseze kwanu kuli lu t'o lobala ni bona.”

6Lota a zwela kwande mi ha s'a zwile, a kwala. 7A li ku bona, “Balikani, na mi kupa, mu si ke mwa eza nto ye maswe cwalo! 8A mu bone, ni na ni bana ba babeli mo, ba balyanjo. Ni mi zwiseze bona, mi mu eze mo mu latela ku bona. Kono haili ka banna ba, mu si ke mwa eza se siñwi ku bona, kakuli ki baenyi ba ka, mi ni swanezi ku ba sileleza.”

9Kono ba li, “Zwa mwa nzila, muzwahule-tuwe! U mañi, wena, kuli u lu bulelele se lu swanezi ku eza? Zwa mwa nzila! Lu ka swana lwa ku eza maswe ku fita mo ne lu ka ba ezeza.” Ba kasheza Lota kwamulaho, mi ba sutelela kuli ba t'o loba sikwalo. 10Kono banna bao ba babeli ba ba mwahali ba zwela fande, mi ba hohela Lota mwa ndu. Kiha ba kwala kwa munyako. 11#2 Male 6.18 Cwale ba foufaza batu kaufela ba ba ne ba li fande, mane ba palelwa nihaili ku fumana munyako.

Lota u zwa mwa Sodoma

12Banna ba babeli bao ba buza Lota, ba li, “Kikuli u sa na ni bahenu mwa hae mo, nji? U nge bana ba hao ba bashimani ni ba basizana, ni bahenu kaufela ba ba mwa munzi mo, mi u ba zwise mwateñi. 13Lu til'o sinya sibaka se. Muñ'a Bupilo u boni bumaswe bo ba tamelezwa batu ba, kih'a lu lumile ku t'o sinya munzi wa Sodoma.”

14Cwale Lota a ya kwa makwenyan'a hae, ba ba ne ba bata ku nyala bana ba hae, mi a li, “Mu akufe, mu zwe mwa hae mo, kakuli Muñ'a Bupilo u bata ku sinya sibaka se.” Kono ba hupula kuli n'a eza lishea feela.

15Ha ku patalala, mangeloi a lika ku pakisisa Lota ka ku mu bulelela kuli, “Akufa! U nge musal'a hao ni bana ba hao ba basizana ba babeli, mi mu zwe, kuli mu si ke mwa shwa ha ku sinyeha munzi wo.” 16#2 Pit 2.7 Lota a lika-lika. Kono nihakulicwalo Muñ'a Bupilo a mu shwela makeke. Kabakaleo batu ba babeli bao, ba mu nga ni musal'a hae ni bana ba bona ba babeli ba basizana, ba ba swala kwa mazoho ku ba zwiseza kwa mandamino ko ba il'o ba siya. 17Ha ba se ba ba zwisize mwa munzi, le liñwi la mangeloi la li ku bona, “Mu ipilise ka lubilo! Mu si ke mwa itemuna. Hape mu si ke mwa yema mwa libala. Mu matele feela kwa malundu, kuli mu si ke mwa shwa.”

18Kono Lota a alaba, a li, “Batili, ku si ke kwa ba cwalo, malen'a ka. 19Mwa bona, mu ni ezize ka sishemo se situna, mi ki ka musa wa mina ha mu ni pilisize. Kono cwale kwa malundu ki kwahule hahulu. Ziezi i ta ni fumana, mi ni ta shwa ni si ka y'o fita kale kwateñi. 20Mwa bona kanzinyana kale? Ka fakaufi, mi na kona ku y'o fita kale kwateñi. Ni ye kwateñi. Ni mina mwa ka bona kuli ki ka kanyinyani. Mi koo ni ta pila.”

21Lingeloi la alaba, la li, “Fo na lumela. Ha ni na ku sinya munzi wani. 22Akufa! U mate! Ha ni na ku eza se siñwi, konji ha u s'o fitile kwateñi.”

Cwale, kakuli Lota n'a ize ki munzi o munyinyani, kiha u beiwa libizo la Zoari.

Ku sinyeha kwa Sodoma ni Gomora

23Lizazi ha li pazula, Lota n'a s'a fitile kwa Zoari. 24#Mat 10.15; 11.23-24; Luk 10.12; 17.29; 2 Pit 2.6; Juda 7 Muñ'a Bupilo kih'a nelisa mufuse o cisa mwa Sodoma ni Gomora. 25A sinya minzi yeo ni libala kaufela hamohocwalo ni batu ba mwateñi, ni limela kamukana. 26#But 10.7; Luk 17.32 Kono musal'a Lota a itemuna, mi kiha s'a fetuha nalumbwa wa lizwai.

27Habusa, i sa li kakusasana, Abrahama a akufela kwa sibaka kw'a n'a yemi fapil'a Muñ'a Bupilo. 28A talima kwa Sodoma ni Gomora, ni libala kamukana, mi a bona musi feela o zwa fafasi, inge musi o zwa fa liyonga le lituna. 29Kono Mulimu h'a sinya minzi ye mwa libala, a hupula Abrahama, mi a lumelela Lota ku banduka kwa kozi yeo.

Simuluho ya Mamoabi ni Maamoni

30Kakuli Lota n'a saba ku ina mwa Zoari, yena ni bana ba bae ba basizana ba babeli ba tutela kwa malundu, mi ba y'o pila mwa misima ya mwa macwe. 31Mwan'a Lota yo muhulu wa kalibe a li ku munyan'a hae, “Wa bona, ndat'a luna s'a supala, mi ha ku na munna ya siyezi mwa lifasi kaufela ya ka lu nyala, kuli lu fumane bana ka ona mukwa wo wa kamita. 32A lu mu nwise waine, a kolwe, mi ha s'a kozwi lu kopane ni yena kuli lu fumane bana ka ndat'a luna.” 33Lona lizazi leo busihu, ba mu nwisa waine. Yo muhulu a y'o kopana ni ndat'ahe, yena a sa zibi se siñwi kakuli n'a kozwi.

34Habusa, yo muhulu a li ku munyan'a hae, “Busihu bwa maabani ni kopani ni ndat'a luna. Cwale ni kacenu hape lu mu nwise kuli ni wena u eze sina na, ili kuli bubeli bwa luna lu fumane bana ka ndat'a luna.” 35Cwale, bona busihu bo hape ba mu nwisa, mi yo munyinyani a y'o kopana ni yena. Ni hona hape h'a na s'a zibile kakuli n'a kozwi. 36Kamukwaocwalo, bana ba Lota mwa bubeli bwa bona ba itwaliswa ki ndat'a bona. 37Yo muhulu a pepa mushimani, mi a mu beya libizo la Moabi. Ki yena ya simuluzi Mamoabi ba kacenu. 38Yo munyinyani ni yena a pepa mushimani, mi a mu beya libizo la Beni-Ami, mi ki ku yena fo ku simuluha Maamoni ba kacenu.

Currently Selected:

Simuluho 19: Lozi09

Highlight

Copy