Simuluho 17
17
Mupato ki poniso ya bulikani
1Abrame ha n'a s'a na ni lilimo ze mashumi a supile ka a mabeli ni ze supile ka ze peli, Mun'a Bupilo a iponahaza ku yena, mi a li, “Ki na Mulimu ya Maata Kaufela. U be ya lukile mwa bupilo bwa bao kamukana kuli u si ke wa nyazahala. 2Ni ta iswala bulikani ni wena, mi ni ta atisa baikulu ba hao.” 3Abrame kih'a kubama, a inamezi fafasi, mi Mulimu a li, 4“Bulikani bo ni ka iswala ni wena ki bo. Ni sepisa kuli u ta ba mushemi wa mishobo ye miñata. 5#Baro 4.17 Ha u sa li Abrame, kono u ta bizwa Abrahama. Libizo le, ki lona le li ta ba la hao, kakuli ni ku eza mushemi wa mishobo ye miñata. 6Ni ta ku fa lusika lo luñata mi ba bañwi ku bona i ta ba malena. Lusika lwa hao lu ta ata mane ba be mishobo-shobo.
7 #
Luk 1.55
“Ni ta buluka sepiso ya ka ku wena ni kwa baikulu ba hao mwa masika a sa taha, ili bulikani bo bu si na ku fela. Ni ta ba Mulimu wa hao ni Mulimu wa baikulu ba hao. 8#Lik 7.5 Ni ta ku fa, wena ni baikulu ba hao, naha ye y'o li muenyi ku yona nako ye. Naha kaufela ya Kanana i ta ba ya mina kuya kuile, mi ni ta ba Mulimu wa mina.”
9Mulimu hape a li ku Abrahama, “Ni wena hape u swanezi ku lumela ku buluka bulikani bwa ka, wena ni baikulu ba hao mwa masika a sa taha. 10#Lik 7.8; Baro 4.11 Se mu swanezi ku itama ka sona, wena ni baikulu ba hao, ki se. Munna kamukana ku mina u swanezi ku ya kwa mupato. 11Ku ya kwa mupato i ta ba poniso ya kuli ku na ni bulikani mwahal'a mina ni na. 12Ku zwa cwale ni kuya kuile mu swanezi ku sehulula matalo a bana ba mina ba bashimani kamukana, ha ba se ba na ni mazazi a supile ka li li liñwi a ku pepwa. Ku ta ba cwalo ni kwa batanga ba ba pepezwi ku mina, kapa be mu lekile kwa bazwahule. 13Yo muñwi ni yo muñwi u swanezi ku ya kwa mupato, mi seo i ta ba sona sisupo fa mibili ya mina, ku bonisa kuli bulikani bwa ka ni mina ha bu na ku fela. 14Munna ya si ka ya kwa mupato, u ta zwiswa kwa batu bahabo, kakuli h'a si ka buluka bulikani ni na.”
15Mi Mulimu a li ku Abrahama, “Cwale ni musal'a hao, u si ke wa mu biza Sarai. Libizo la hae cwale ki Sara. 16Ni ta mu tohonolofaza, mi u ta ku pepela mwana wa mushimani. Ni ta mu fuyaula, mi u ta ba m'ahe macaba, mi kwa baikulu ba hae ku ta ba ni malena.”
17Abrahama a kubama, a inamezi fafasi, kono h'a hupula, a kala ku seha, a li, “Kana mutu a ka pepa mwana ha s'a fitile fa lilimo ze mwanda? Ni yena Sara, kana a ka ba ni mwana a nz'a na ni lilimo ze mashumi a supile ka a mabeli?” 18Kih'a li ku Mulimu, “Ni kupa kuli u sileleze Ishimaele, mi u mu buluke, a pile hande.”
19Kono Mulimu a li, “U fosize. Musal'a hao Sara u ta ku pepela mushimani, mi u ta mu biza Isaka. Ni ta buluka bulikani bwa ka ni yena ni baikulu ba hae. Ki bulikani bo bu si na ku fela. 20U ni kupile ku babalela Ishimaele, mi se ni ta eza ki se. Ni ta mu tohonolofaza ni ku mu fa bana ni baikulu ba bañata. U ta pepa bana ba malena ba lishumi ka ba babeli, mi ni ta atisa baikulu ba hae. 21Ni ta buluka bulikani bwa ka ni mwan'a hao Isaka, ya ta pepwa ki Sara isaho, ka yona nako ye.” 22Mulimu ha s'a felize ku bulela ni Abrahama, a mu siya mi a kutela kwa lihalimu.
23Ka lona lizazi leo, Abrahama a isa mwan'a hae Ishimaele kwa mupato hamoho ni batanga ba hae kamukana, ba ba ne ba pepezwi ku yena ni b'a n'a sa z'o leka. Banna kaufela mwa munzi wa hae ba ya, sina mw'a n'a mu bulelezi Mulimu. 24Abrahama h'a ya kwa mupato n'a na ni lilimo ze mashumi a supile ka a mabeli ni ze supile ka ze peli. 25Mwan'a hae Ishimaele n'a na ni ze lishumi ka ze talu. 26Ba ya hamoho. Bubeli bwa bona ba ya kwa mupato zazi li li liñwi. 27Ba ya hamohocwalo ni batanga ba hae kamukana.
Currently Selected:
Simuluho 17: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.