Estere 6

Mulena u hulisa Morodekai

1Ka bona busihu bo, mulena a ba ni sikobyoti, cwale kih'a kupa kuli ku tiswe buka ya Litaba za Mubuso, mi ku balwe ze ñwi mwateñi. 2#Est 2.21-22 Mwa kalulo ye n'e balwa ne ku taluswa ni za mulelo o n'o lemuhilwe ki Morodekai, wa ku bulaya mulena, ili o n'o ezizwe ki Bigitani ni Tareshi, likombwa ze peli za mulena ba ba ne ba libelela mandu a hae. 3Mulena a buza, a li, “Lu kutekile cwañi ni ku itumela ku Morodekai ka kezo ye?”

Batanga ba hae ba alaba, ba li, “Ha ku na ni se sikana s'a ezelizwe, muñ'a luna.”

4Mulena a buza, a li, “Kikuli kwa manduna ba ka ha ku na ya li teñi mwa lapa, nji?”

Hamani, ya n'a til'o kupa ku mulena kuli Morodekai a pahekwe fa silaha, se ne si se si lukile, kihona n'a sa z'o kena mwa lapa. 5Cwale batanga ba alaba, ba li, “Ku na ni Hamani, ya litezi ku bonana ni wena.”

Mulena a li, “A mu mu bulelele a kene.”

6Cwale Hamani a kena, mi mulena a li ku yena, “Ku na ni mutu yo muñwi ye ni bata hahulu ku hulisa. Mutu yo ni ka mu ezezañi?”

Hamani a hupula mwa pilu, a li, “Cwale ya batiwa hahulu ki mulena kuli a mu hulise ki mañi? Ki na, hande-nde.”

7Cwale a alaba mulena ka za mukwa wa ku hulisa yo muñwi hahulu. 8A li, “Tiseza mutu yo liapalo za bulena, zona z'o kile wa apala. U tise ni litumo ze kabisizwe li beiwe kwa pizi ya hao. 9Cwale u nge yo muñwi kwa batu ba hao ba ba kutekeha, a apese mutu yo, mi a mu ise fa patelo ya munzi a pahami fa pizi. Mutu yo ya kutekeha, a zamaye a nz'a huweleza, a li, ‘A mu bone mw'a itumelela mulena ku mutu y'a lata kuli a mu hulise!’ ”

10Mulena kiha s'a li ku Hamani, “Akufa, u y'o nga liapalo ni pizi, mi u t'o fa likute leo ku Morodekai wa Mujuda. U mu ezeze lika kamukana z'o kakanyize. U ta mu fumana a inzi kwa munyako wa lapa la mulena.”

11Cwale Hamani a nga liapalo ni pizi. A apesa Morodekai liapalo zeo, mi a mu pahamisa fa pizi, mi Hamani a mu isa fa patelo ya munzi, a nz'a zibisa batu ha ba nze ba zamaya, a li, “A mu bone, mulena mw'a itumelela ku mutu y'a lata kuli a mu hulise!”

12Morodekai kiha s'a kutela kwa munyako wa kwa lapa, haili Hamani yena a kutela kwa ndu ya hae, a ikwahezi kwa pata ka maswabi. 13A y'o bulelela musal'a hae ni balikani ba hae kaufela ze n'e ezahalile ku yena kamukana. Cwale musali ni balikani ba Hamani ba ba butali bao, ba mu bulelela, ba li, “Morodekai s'a kala ku ku fita kwa maata. Ki Mujuda, mi hape ha ku sa na mukwa o u ka mu hanisa ka ona. U ta pila mane a ku bone wena ha u ta sinyeha.”

14Ha ne ba sa bulela cwalo, sikombwa sa mulena sa fita ka bubebe ku t'o bizeza Hamani kwa mukiti wa Estere.

Currently Selected:

Estere 6: Lozi09

Highlight

Copy