Estere 7
7
Hamani wa bulaiwa
1Mi cwale mulena a ya ni Hamani ku y'o ca hape ni Estere lwa bubeli. 2Ha ku se ku nwiwa waine, mulena a buza, a li, “Muoli Estere, cwale s'o bata ki sika mañi? Ni bulelele, mi u ta si fumana. Ni ta ku fa mane nihaili licika la mubuso.”
3Muoli Estere a alaba, a li, “Ka buikokobezo, muñ'a ka, haiba kupo ya ka ne i ka lumelelwa, takazo ya ka kiha ne ni ka pila ni kuli banabahesu ni bona ba pile. 4Banabahesu ni na cwalo lu lekisizwe kuli lu bulaiwe. Lu na ni ku feliswa, mbuu! Ne ni ka be ni kuzize feela, haiba ne lu ka lekiswa ku y'o ba batanga, kakuli fo manyando a luna n'a si ke a kona ku kataza mulena.”
5Cwale Mulena Asuerusi a buza Muoli Estere, a li, “Ki mañi ya lika ku eza nto ye cwalo? U kai yena mutu yo?”
6Estere a alaba, a li, “Sila, ni mubulai wa luna, ki yena mutu yo ya maswe, yena Hamani yo!”
Hamani a kenwa ki luwewe lwa sabo. 7Mulena a yakuka ka buhali, a zwa mwa ndu, mi a ya mwa simu ya lipalisa ye fapil'a ndu ya bulena. Hamani a lemuha hande-nde kuli, ka kezo ye, mulena n'a lelile ku mu utwisa butuku, cwale kih'a sa siyala, mi a kupa Muoli Estere kuli a mu pilise. 8Mulena h'a zwa mwa simu ya lipalisa ku kutela mwa ndu, Hamani n'a nz'a ikwiseza fa sipula sa Estere sa ku pumulela, ili ku kupa ku shemubiwa. Mulena a huwa, a li, “Kikuli mutu yo u bata ku swala muoli likalala hona fa mwa meeto a ka, mwa ndu ya bulena, nji cwañi?”
Mulena a si ka feleleza ku bulela cwalo, likombwa se li kwahela Hamani kwa toho. 9Cwale yo muñwi wa bona, ya n'a bizwa Haribona, a li, “Hamani mane u yahile silaha kwa ndu ya hae kuli a y'o silahela fateñi Morodekai, ya pilisize wena muñ'a ka. Mi silaha seo si eza mapeka a mashumi a mabeli ka a ketalizoho kwa butelele!”
Mulena a laela, a li, “A mu y'o paheka Hamani fateñi.”
10Cwale Hamani a y'o silahelwa fa silaha s'a n'a yahezi Morodekai. Cwale buhali bwa mulena bwa kuyuka.
Currently Selected:
Estere 7: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
