Estere 5

Estere u memela mulena ni Hamani kwa mukiti wa lico

1Ka lizazi la hae la bulalu la ku itima lico, Estere a apala liapalo za hae za bulena, mi a y'o yema mwa lapa la mwahali, a talimezi kwa ndu mo ku inzi lubona. Mulena n'a li mwahali, a inzi fa lubona, a talimezi kwa munyako. 2Mulena h'a bona Muoli Estere a nz'a yemi kwande, a palelwa ku iswala, mi a nanula mulamu wa hae wa gauda. Cwale Estere kiha s'a taha, mi a t'o ngunyuta kwa ngo ya ona. 3Mulena a buza, a li, “Muoli Estere, kiñi? Ni bulelele s'o bata, mi u ta si fumana, mane niha i ka ba licika la mubuso wa ka.”

4Estere a alaba, a li, “Haiba muñ'a ka a lata, ne ni ka lakaza kuli yena muñ'a ka, ni Hamani, ba t'o ba baenyi ba ka kwa mukiti wa lico o ni ta mi lukiseza manzibwana.”

5Cwale mulena a laela kuli Hamani a tahe kapili, ili kuli ba y'o ba baenyi ba Estere. Mulena ni Hamani kiha ba taha kwa mukiti wa Estere wa lico. 6Ka nako ya waine, mulena a buza Estere, a li, “Ni bulelele s'o bata, mi u ta si fumana. Ni ta lumelela kupo ya hao, mane niha u ka kupa licika la mubuso wa ka.”

7Estere a alaba, a li, 8“Haiba muñ'a ka a ka lumelela kupo ya ka, ne ni sa lakaza kuli wena muñ'a ka, ni Hamani, mu t'o ba hape baenyi ba ka kamuso kwa mukiti o ni ta mi lukiseza. Ka yona nako yeo kihona ni ta ku bulelela se ni bata.”

Hamani u lela ku bulaya Morodekai

9Hamani h'a zwa fa mukiti n'a tabile, mi a wile pilu. Kono h'a bona Morodekai kwa munyako wa lapa la bulena, mi hape Morodekai n'a si ka yema kapa ku mu kuteka h'a fita, Hamani a mu halifela. 10Kono a iswala, mi a ya kwa ndu ya hae. A memela balikani ba hae kwa ndu ya hae, mi a kupa musal'a hae Zereshi kuli a t'o kopana ni bona. 11A itumba fapil'a bona ka bufumu bwa hae, ka buñata bwa bana b'a n'a na ni bona, ni ka situlo se si pahami s'a n'a mu yolisize mulena, ni mw'a n'a kutekehela ku fita manduna ba bañwi kamukana. 12Hamani a zwelapili, a li, “Se siñwi hape i ka ba sifi. Muoli Estere u ezize mukiti, mi ku memilwe feela mulena ni na, mi lu sa memilwe hape ni kamuso. 13Kono zeo kaufela ha li na tuso ku na ha ni nze ni sa bonanga Morodekai, yena Mujuda yani, ya inzi kwa munyako wa lapa la mulena.”

14Cwale musal'a hae ni balikani ba hae ba li, “Kiñi ha u sa yahi silaha sa mapeka a mashumi a mabeli ka a ketalizoho kwa butelele, mi kamuso i sa li kakasasana n'o ka kupa mulena kuli Morodekai a y'o silahelwa fateñi? Fohe, n'o ka ya kwa mukiti u nz'o tabile.” Hamani a hupula kuli wo n'e li muhupulo o munde, mi cwale a yahisa silaha.

Currently Selected:

Estere 5: Lozi09

Highlight

Copy