1 Joani 4

Moya wa niti ni wa buhata

1Balikani ba ka, mu si ke mwa kolwa batu kaufela ba ba bulela kuli ba na ni Moya o Kenile. Mu ba like pili ku bona kamba moya wa bona u zwa ku Mulimu, kakuli bapolofita ba buhata ba tezi kai ni kai. 2Mu ta ziba ka mukwa wo haiba ki Moya wa Mulimu. Mutu kaufela ya paka kuli Jesu Kreste n'a bile mutu, yo u na ni Moya o zwa ku Mulimu. 3Kono mutu kaufela ya hanyeza taba yeo bakeñisa Jesu, yena h'a na Moya o zwa ku Mulimu. Moya w'a na ni ona u zwa kwa sila sa Kreste. Ne mu utwile kuli wa taha, mi cwale ki wo u s'o fitile kale mwa lifasi.

4Haili mina, bana ba ka, mu ba Mulimu, mi mu tuzi bapolofita ba buhata, kakuli Moya o ku mina u na ni maata hahulu ku fita moya o ku ba lifasi. 5Bona ba bulela ka litaba za lifasi, mi ba lifasi ba ba teeleza kakuli ki ba lifasi. 6Kono luna, lu ba Mulimu. Mutu kaufela ya ziba Mulimu, wa lu teeleza, mi ya sa zibi Mulimu h'a lu teelezi. Ki ona mukwa o lu ka bona ka ona fapahano mwahal'a Moya wa niti ni moya wa buhata.

Mulimu u lilato

7Balikani, a lu lataneñi kakuli lilato li zwa ku Mulimu. Mutu kaufela ya na ni lilato ki wa Mulimu, mi u ziba Mulimu. 8Haili ya si na lilato kaufela h'a zibi Mulimu, kakuli Mulimu u lilato. 9Mulimu u bonisize lilato la hae ku luna ka mukwa wo. U lumile Mwan'a hae wa libanda mwa lifasi kuli ka yena lu fumane bupilo. 10Le, ki lona lilato luli. Ha si luna lu latile Mulimu, kono ki yena ya lu latile, mane a luma Mwan'a hae kuli, ka yena, lu swalelwe libi za luna.

11Balikani, haiba ki mona mw'a lu latezi Mulimu, cwale ni luna lu swanezi ku latana. 12#Joa 1.18 Ha ku na ya kile a bona Mulimu. Haiba lu latana, Mulimu u pila ku luna, mi lilato la hae li kondisizwe ku luna.

13Se si lu bonisa kuli lu pila ku Mulimu, ni kuli yena u pila ku luna, ki se. U lu file Moya wa hae. 14Mi luna, kakuli lu u boni, lu paka kuli Ndate u lumile Mwan'a hae ku t'o ba Mupilisi wa lifasi. 15Mutu h'a paka kuli Jesu ki Mwan'a Mulimu, Mulimu u pila ku yena, mi ni yena u pila ku Mulimu. 16Haili luna, lwa ziba ni ku lumela lilato leo Mulimu a lu lata ka lona. Mulimu u lilato, mi mutu kaufela ya pila mwa lilato u pila ku Mulimu, mi ni Mulimu u pila ku yena. 17Se si bonisa kuli lilato li kondisizwe ku luna, kikuli lu ta be lu tezi buiketo ka Lizazi la Katulo, mi ku ka ba cwalo kakuli bupilo bwa luna mwa lifasi mo bu swana ni bwa Kreste. 18Mwa lilato ha ku na boi. Lilato le li kondile li leleka sabo kaufela. Cwalehe, lilato ha li si ka konda ku ya na ni boi, kakuli boi bu zamaelelana ni mulatu.

19Haili luna, lu swanezi ku ba ni lilato kakuli Mulimu u kalile pili ku lu lata. 20Haiba mutu yo muñwi, a li, “Ni lata Mulimu,” a nz'a toile mwanahabo, ki lihata. Kakuli h'a koni ku lata Mulimu y'a si ka bona, h'a sa lati mwanahabo y'a boni. 21Wo, ki ona mulao o lu filwe ki Kreste. Mutu kaufela ya lata Mulimu, u swanezi ku lata ni mwanahabo cwalo.

Currently Selected:

1 Joani 4: Lozi09

Highlight

Copy