1 Joani 3
3
Bana ba Mulimu
1 #
Joa 1.12
A mu bone lilato l'a lu latile Ndate ka lona! Lilato la hae ki le lituna, mane ka lona lu bizwa bana ba Mulimu, mi kaniti lu bana ba hae. Lifasi ha li sa lu zibi, libaka ki le. Kikuli ha li si ka ziba Mulimu. 2Balikani ba ka, cwale lu bana ba Mulimu, kono ha ku si ka zibahala kale seo lu ta ba sona. Nihakulicwalo, se lu ziba ki se. Kikuli Kreste h'a ta bonahala, lu ta swana ni yena, kakuli lu ta mu bona mw'a inezi luli. 3Mutu kaufela ya na ni sepo ye cwalo ku Kreste, wa ikenisa, sina yena Kreste h'a li ya kenile.
4Mutu kaufela ya eza sibi u na ni mulatu wa ku tula mulao wa Mulimu, kakuli sibi ki ku tula mulao. 5#Joa 1.29 Mwa ziba kuli Kreste u tezi ku t'o zwisa libi za batu, ni kuli yena h'a na sibi. 6Kabakaleo, mutu kaufela ya pila ka Kreste h'a ezi sibi. Kono ya tundamena ku eza sibi h'a si ka mu bona, mi h'a si ka mu ziba.
7Bana ba ka, mu si ke mwa lumela ku pumiswa ki mutu! Ya eza se si lukile u lukile sina Kreste h'a lukile. 8Ya tundamena ku eza sibi ki wa Satani, kakuli Satani u ezize sibi ku zwa kwa makalelo. Mwan'a Mulimu h'a tile, libaka ki ku t'o sinya misebezi ya Satani.
9Mutu kaufela ya li wa Mulimu h'a ezi sibi, kakuli maata a bupilo, a' zwa ku Mulimu, a ku yena. Hape kakuli Mulimu ki Ndat'ahe, h'a koni ku zwelapili a nz'a eza sibi. 10Ki ye fapahano ni bana ba Satani. Ufi ni ufi ya sa ezi se si lukile, kapa ya sa lati mwanahabo h'a si wa Mulimu.
Ku latana
11 #
Joa 13.34
Taba ye mu utwile i sa li kwa makalelo ki ye. Lu swanezi ku latana. 12#Sim 4.8 Lu si ke lwa swana ni Kaine. I n'e li wa Ya Maswe, mi a bulaya munyan'a hae. Kaine u bulaeziñi munyan'a hae? U mu bulaile kakuli likezo z'a n'a eza i n'e li ze maswe, kanti za munyan'a hae i n'e li ze nde.
13Cwale mu si ke mwa komoka, banabahesu, ha mu toiwa ki batu ba lifasi. 14#Joa 5.24 Lu ziba kuli lu zwile mwa lifu ku kena mwa bupilo. Lu ziba cwalo, kakuli lu lata banabahabo luna. Ya si na lilato u sa li mwa lifu. 15Mutu kaufela ya toile wahabo ki mubulai, mi mwa ziba kuli mubulai h'a na bupilo bo bu sa feli. 16Ha lu ziba seo lilato li li sona, ki ka se. Kreste u itombozi bupilo kabakala luna. Kamukwaocwalo, ni luna lu swanezi ku itombola bupilo bwa luna kabakala bahabo luna! 17Haiba mutu ya fumile a bona wahabo ya li njebwe, kono a sa isi pilu ku yena, yo u ka bulela cwañi kuli u lata Mulimu? 18Bana ba ka, lilato la luna li si ke la ba la manzwi kapa lipulelo feela. Li swanezi ku ba lilato la niti le li iponahaza ka likezo.
Bundume fapil'a Mulimu
19Cwalehe, se ki sona se si ta lu bonisa kuli lu mwa niti, mi ki sona se si ta tiisa lipilu za luna fapil'a Mulimu. 20Nihaiba lipilu za luna li lu nyaza, lwa ziba kuli Mulimu u fita lipilu za luna, ni kuli u ziba lika kaufela. 21Cwalehe banabahesu, haiba lu sa nyazwi ki lipilu za luna, fohe lu iketile fapil'a Mulimu. 22Lu fumana ze lu kupa ku yena kaufela, kakuli lu eza litaelo za hae, mi lu mu tabisa ka likezo za luna. 23#Joa 13.34; 15.12, 17 S'a lu laela sona kikuli lu lumele libizo la Mwan'a hae Jesu Kreste, ni kuli lu latane sina mo lu laelezwi ki yena. 24Mutu kaufela ya utwa litaelo za Mulimu u pila ku Mulimu, ni Mulimu u pila ku yena. Mi se si lu zibisa kuli Mulimu u ina ku luna ki Moya wa hae w'a lu file.
Currently Selected:
1 Joani 3: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.