1 Joani 2
2
Kreste mutusi wa luna
1Bana ba ka, ni mi ñolela litaba ze kuli mu si ke mwa eza sibi. Kono haiba yo muñwi wa mina a eza sibi, lu na ni muyemeli ku Ndate, ili yena Jesu Kreste ya lukile. 2Kakuli ki ka Kreste, yena kasibili, libi za luna ha li swalelwa, mi isi libi za luna feela, kono ni zona libi za batu kamukana.
3Haiba lu mamela litaelo za Mulimu, fohe lu ta ba ni niti ya kuli lwa mu ziba. 4Haiba mutu yo muñwi a li, “Na, na mu ziba,” kono a sa utwi litaelo za hae, mutu yo ki lihata, mi h'a na niti. 5Kono ya utwa linzwi la hae, yo lilato la hae ku Mulimu li kondisizwe. Lu ka ba ni niti ya kuli lu pila ku Mulimu ka mukwa wo. 6Ya bulela kuli u pila ku Mulimu, u swanezi ku pila sina mw'a n'a pilela Jesu Kreste.
Taelo ye nca
7 #
Joa 13.34
Balikani ba ka, taelo ye ni mi ñolela ha si ye nca. Ki taelo ya kale, ye ne mu na mi yona ku zwa kwa makalelo. Taelo yeo ya kale ki linzwi le mu se mu utwile kale. 8Nihakulicwalo, taelo ye ni mi ñolela yona ki ye nca, mi buniti bwa yona bu bonahala ku Kreste ni ku mina cwalo. Kakuli lififi la fela, mi liseli la niti li se li benya.
9Yena ya ka li u mwa liseli, kono u toile mwanahabo, u sa li mwa lififi ni ka nako ye. 10Ya lata mwanahabo u inzi mwa liseli, mi ku yena ha ku na se si ka sitatalisa yo muñwi. 11Kono ya toya mwanahabo u mwa lififi. U zamaya mwa bunsu, mi h'a zibi kw'a ya, kakuli, lififi li mu ezize sibofu.
12Banana, na mi ñolela kakuli libi za mina li swalezwi kabakala libizo la Kreste. 13Bo ndate, na mi ñolela kakuli mwa mu ziba ya n'a li teñi ku zwa kwa makalelo. Micaha, na mi ñolela kakuli mu tuzi Ya Maswe.
14Ni mi ñolezi, banana, kakuli Ndate mwa mu ziba. Ni mi ñolezi, bo ndate, kakuli mwa mu ziba yena ya n'a li teñi ku zwa kwa makalelo. Ni mi ñolezi, micaha, kakuli mu na ni maata. Linzwi la Mulimu li pila ku mina, mi mu tuzi Ya Maswe.
15Mu si ke mwa lata lifasi ni ze ku lona. Haiba mutu a lata lifasi, lilato l'a ka lata Ndate ka lona ha li yo ku yena. 16Lika kaufela ze mwa lifasi, litakazo ze maswe za mutu, takazo ya ku luwa ze lu bona, ni ku ikuhumusa ka za lifasi, zeo kamukana ha li zwi ku Ndate, kono li zwa mwa lifasi. 17Lifasi ni ze ku lona kaufela ze latwa ki batu za fela. Kono ya eza se si latwa ki Mulimu yena u pila kuya kuile.
Sila sa Kreste
18Bana ba ka, nako ya mafelelezo i fakaufi! Mu se mu bulelezwi kuli sila sa Kreste si ka taha. Cwalehe, lila za Kreste ze ñata li se li tile, mi kabakaleo lu ziba kuli nako ya mafelelezo i fakaufi. 19Hande-nde batu bao ne si ba mutapi wa luma, mi ki lona libaka ha ba zwile ku luna. Ha ne i ka ba kuli ne ba li ba mutapi wa luna, kabe ba inzi ni luna. Kono ba zwile ku luna kuli ku bonahale hande kuli ne ku sina nihaili a li muñwi feela wa bona ya n'a li wa mutapi wa luna.
20Haili mina, mu sulelezwi Moya o Kenile ki Kreste, mi cwale kaufel'a mina mu ziba niti. 21Hakulicwalo, ha ni mi ñolela, ha si kuli ha mu zibi niti, batili, kono ili kabakala kuli mwa i ziba, mi hape mu ziba kuli ha ku na buhata bo bu ka zwa mwa niti.
22Cwalehe, lihata ki mañi? Ki yena ya bulela kuli Jesu ha si yena Kreste. Yo he ki yena sila sa Kreste. U hanile Ndate ni Mwana kaufela. 23Kakuli ya hana Mwana u hana ni Ndate, mi ya amuhela Mwana u amuhela ni Ndate cwalo.
24Nihakulicwalo, mu buluke mwa lipilu za mina litaba ze mu utwile kaufela ku zwa kwa makalelo. Haiba ze mu utwile ku zwa kwa makalelo li ina mwa lipilu za mina, mu ta ina ni mina ku Mwana ni ku Ndate. 25Mi s'a lu sepisize ku lu fa sona, yena Kreste kasibili, ki bupilo bo bu sa feli.
26Ni mi ñolela cwalo kabakala ba ba lika ku mi puma. 27Kono haili mina, Kreste u mi sululezi Moya wa hae. Moya wo ha u sa inzi ku mina, ha mu tokwi ku lutiwa ki mutu. Kaniti Moya u mi luta lika kamukana, mi s'o luta ki niti feela. Ha si buhata. Hakulicwalo, mu mamele lituto za Moya, mu nze mu ina ku Kreste.
28Eeni bana ba ka, mu ine ku yena kuli lu be ni bundume zazi l'a ka bonahala, mi lu si ke lwa ipata kabakala maswabi zazi l'a ka taha. 29Mwa ziba kuli Kreste u lukile. Cwalehe, mu swanezi ku ziba kuli mutu kaufela ya eza ze lukile ki wa Mulimu.
Currently Selected:
1 Joani 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.