Salmo 62
62
SALMO 62
Serka Dios so mi alma ta na pas
Pa maestro di kanto. Na weis di ‘Yedutun’. Salmo di David.
1Serka Dios so mi alma ta na pas,
ta di djE mi salbashon ta bini.
2E so ta mi baranka i salbashon,
mi fòrti — nunka lo mi no tambaliá!#Salmo 46
3Te ki dia boso ta sigui
kore basha riba un hende i gòlpi'é
manera un muraya ku ta kènter,
un serká ku ta serka di kai?
4Nan úniko antoho ta tumb'é,
fingi, esei ta nan zjilea;
ku nan boka nan ta bendishoná,
ma paden nan ta maldishoná.
5Buska bo pas serka Dios so, mi alma,
di djE so bo por keda sper'é.
6E so ta mi baranka i salbashon,
mi fòrti — nunka lo mi no tambaliá!
7Mi salbashon i honor mi tin di Dios,
Dios, mi baranka firme, mi refugio.
8Mi pueblo, konfia semper den djE,
deshogá bo kurason serka djE.
Ta Dios, t'E ta nos refugio.
9Hende: un rosea, nada mas!
Hende mortal: puru ilushon!
Riba balansa ta nan ta subi,
tur huntu apénas un rosea.
10No konfia den biennan ranká,
no buska nada ganá ku ladronisia;
si bo poseshonnan ta rende,
no pega kurason na nan.
11Mas ku un bia mi a tende
e palabra ku Dios a papia:
‘Poder tin su fundeshi den Dios.’
12Den Bo, Señor, tin tur bondat.
Sí, Bo ta paga kada hende
segun k'e meresé pa su aktonan.#Job 34:11; Proverbionan 24:12; Yeremías 17:10; Ezekiel 18:30; 33:20; Sirag 16:12,14; Mateo 16:27; Romanonan 2:6; Revelashon 2:23
Currently Selected:
Salmo 62: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013