Salmo 57
57
SALMO 57
Serka Dios mi ta sigur, E ta amor i fieldat
(Salmo 108:1-5)
Pa maestro di kanto. Na weis di ‘No destruí’. Di David. Ku stèm mediano. Ora el a hui pa Saul i a skonde den kueba.#1 Samuel 22:1; 24:3-7
1Tene piedat di mi, o Dios, tene piedat,
serka Bo mi ta buska protekshon.
Mi ke skonde den sombra di bo alanan
te ora peliger pasa.
2Mi ta sklama na Dios Altísimo,
e Dios ku ta hasi tantu pa mi.
3For di shelu l'E manda mi salbashon,
ya El a yama mi enemigunan afó!
Dios lo manda mi su bondat i fieldat.
4Mi ta drumí meimei di leon;
yu di hende: nan rosea ta kandela,
nan djentenan ta lansa i flecha
i nan lenga un spada bon skèrpi.
5Alsa bo, mi Dios, te riba shelu,
laga tera ta yen di bo gloria!#Salmo 8:1
6Nan a pone un trampa pa mi pia,
mi tabata tur tumbá;
nan a koba un buraku mi dilanti,
enkambio nan mes a kai aden.
7O Dios, ya mi ta mi mes,
mi kurason ta trankil.
Mi ke kanta i toka pa Bo.
8Lanta, mi alma,
lanta, arpa i siter:
mi ke kanta saka solo.
9Mi ke alabá Bo, Señor, bou di pueblonan,
kanta bo gloria bou di nashonnan,
10pasobra bo amor ta yega te na shelu,
bo fieldat ta yega te na nubianan.#Salmo 36:5
11Alsa bo, mi Dios, te riba shelu,
laga tera ta yen di bo gloria!
Currently Selected:
Salmo 57: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
