Salmo 45
45
SALMO 45
Kantika pa kasamentu di rei
Pa maestro di kanto. Na weis di ‘lelinan’. Di yunan di Korag. Un poema didáktiko. Kansion di amor.
1Mi kurason ta vibra di palabranan bunita,
mi ta resitá mi poesia pa rei,
mi lenga parse pèn di un bon eskritor.
2Bo ta mas bunita ku tur yu di mama,
palabranan grasioso ta brota fo'i bo boka:
t'asina Dios su bendishon ta ku bo pa semper.
3-4Faha bo spada, o héroe, mar'é na bo sintura,
tur na gala i splendor; sali bai bringa viktorioso
pa kousa di bèrdat i hustisia klemente.
Arma bo bog, bo man drechi hasi kosnan spantoso.
5Bo flechanan ta skèrpi i, ku nashonnan na bo pia,
nan lo bora kurason di enemigunan di rei.
6Bo trono, manera di Dios, t'ei pa semper,
bo sèpter real ta un sèpter di hustisia.
7Bo ta stima hustisia i ta odia maldat.
P'esei Dios, bo Dios, a konsagrá bo ku zeta,
señal di alegria, mas ku tur bo kompañeronan.#Hebreonan 1:8-9
8Bo bistínan ta fragante di áloe, mira i kasia;
muzik di kuèrdè ta kontra bo fo'i palasio di ivor.
9Denter di damanan di korte tin prinsesa,
na bo man drechi bo esposa, dòrná ku oro di Ofir.
10Skucha, mi yu, mira akí, paga tinu:
no kòrda mas riba bo pueblo i kas di bo tata.
11Awor laga bo beyesa lanta amor di rei,
E ta bo señor! Dun'é homenahe!
12Siudat di Tiro lo bini#45:12 Siudat…bini; otro posibel tradukshon: O, yu muhé di Tiro, bini ku regalo,
esnan mas riku di pueblo lo ke gana bo fabor.
13Ainda den su kamber e prinsesa ta lusi,
su bistí ta hilá di brokat di oro.
14-15Den bistí multikoló nan ta hib'é serka rei;
siguí pa damanan di honor, su amiganan,
tur ta eskoltá te serka bo. Bou di gritu di entusiasmo,
ku gran legria, nan ta drenta den palasio di rei.
16Bo yunan, o rei, lo tuma e puesto di bo grandinan.
Lo bo nombra nan prínsipe den henter e pais.
17Mi ke plama bo fama serka tur generashon,
pa nashonnan alabá Bo pa tur eternidat.
Currently Selected:
Salmo 45: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
