Salmo 40
40
SALMO 40
SEÑOR, Bo a yega di salba mi, libra mi for di mi mizeria
Pa maestro di kanto. Salmo di David.
1Mi a spera, spera so den SEÑOR,
El a drei mira mi
i tende mi gritu di ousilio.
2El a saka mi for di e pos fatal,
for di lodo di e tanki.
Riba baranka El a pone mi pia
laga mi bai ku paso firme.
3El a pone un kanto nobo na mi boka,
un himno pa nos Dios.
Ku hopi hende por mir'é ku rèspèt
i konfia den SEÑOR!
4Felis ta e hende ku ta konfia
firmemente den SEÑOR,
ku no ta anda ku sobèrbènan, ku hende
pèrdí den nan mentiranan.
5Esta hopi milager Bo a hasi,
SEÑOR, mi Dios!
Hopi plan Bo a traha pa nos:
hende no por igualá Bo.
Si mester papia i konta di nan,
nan ta mas ku mi por menta.
6Bo no gusta sakrifisio ni ofrenda,
ma Bo a habri mi orea;
Bo no ke bestia kimá riba altá
ni sakrifisio di pordon.
7E ora ei m'a bisa: ‘Ata mi akí!
Den bo buki ta skibí tokante mi:
8Hasi bó boluntat, o mi Dios,
esei ta mi plaser,
i bo lei ta grabá den mi.’#Hebreonan 10:5-7
9Den gran reunion di bo pueblo
m'a proklamá ku Bo ta hustu;
mi no a tene mi boka será,
SEÑOR, Bo mes sa!
10Mi no a tene bo hustisia sekreto,
mi a konta bo fieldat i salbashon;
mi no a skonde bo bondat i bèrdat
den gran reunion di bo fielnan.
11SEÑOR, nunka Bo n' ta keda sin duna mi
bo mizerikòrdia;
semper bo bondat i fieldat
lo warda mi di peliger.
12Tantu desgrasia a agobiá mi
ku mi n' por konta nan mas;
mi pikánan ta blo persiguí mi,
mi n' por mira nada otro;
nan ta mas hopi ku kabei di mi kabes,
mi kurason a kai.
13SEÑOR, por fabor, libra mi,
hasi lihé, SEÑOR, yuda mi.
14Brongosá i humiliá e hendenan
ku ke kaba ku mi bida;
laga nan ku ke mira mi desgrasia
hala atras yen di bèrgwensa;
15laga esnan ku ta bisa mi: ‘Drechi pa bo!’
pèrdè abla di bèrgwensa.
16Mare esnan ku ta buska Bo por gosa
i alegrá den Bo;
laga esun ku deseá pa Bo salb'é
bisa: ‘SEÑOR ta grandi!’
17Ma ami, ku ta pober, mizerabel,
Señor, kòrda riba mi!
Bo ta mi yudansa i Salbador,
no tarda, mi Dios!
Currently Selected:
Salmo 40: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
