Salmo 37
37
SALMO 37
Dios ta rekompensá bon hende i ta kastigá malbado
Di David.
1No kunsumí ku pekadónan,
no kudishá malechornan!
2Nan ta seka lihé manera yerba,
ta marchitá manera beu di kunuku.
3Konfia den SEÑOR, hasi bon,
habitá tera i keda fiel.
4Buska bo goso den SEÑOR i l'E duna bo
tur loke bo kurason por deseá.#Proverbionan 23:17-18; 24:19-20; Sirag 9:11-12
5Pone bo bida den man di SEÑOR,
konfia den djE: lo E aktua.#Proverbionan 16:3; Sirag 2:6
6Lo E pone bo hustisia bria
manera dia kla i bo derecho
manera lus di mèrdia.
7Warda trankil loke SEÑOR lo hasi,
sigui sper'É: E ta yuda.
No kunsumí ku un hende ku tin éksito,
e hòmber ku ta traha ku intriga.
8Stòp di rabia, laga tur furia,
no kunsumí, esei ta daña tur asuntu.
9Pasobra Dios lo eksterminá malechornan,
ma esnan ku konfia den SEÑOR,
ta nan lo poseé e Tera.#Proverbionan 2:21-22
10Un ratu i malbado a kaba,
no buska su sitio, e n' t'ei mas.
11Enkambio, hende humilde
lo bira doño di e Tera pa semper#Deuteronomio 11:8-9; Salmo 25:12-13; Mateo 5:5
i lo gosa di un pas kompleto.
12Pekadó ta konspirá kontra hustu,
e ta kou djente kontra nan.
13Ma Señor ta harié pasobra E sa,
ku su ora ta serka di yega.
14Pekadónan a saka nan spada,
ya nan a span nan bog
pa tumba hende pober i humilde,
pa mata tur hende birtuoso.
15Pero nan spada lo bora nan mes kurason
i nan bognan lo kibra na wèrki.
16E poko ku bon hende tin bal mas
ku e rikesa enorme di mal hende.#Proverbionan 15:16
17Pasobra Dios lo kibra brasa di malbadonan,
ma SEÑOR lo sostené hende hustu.
18SEÑOR ta kuida bida di bon hende,
e Tera ku nan a heredá
lo keda di nan pa semper;
19den mal tempu nan lo no ta konfundí,
den mizeria di hamber nan lo tin basta.
20Ma pekadónan sí lo peresé,
SEÑOR su enemigunan lo keda
manera bunitesa di kunuku:
ta bai nan ta bai na huma.
21Pekadó ta fia plaka di hende,
pero e no ta duna bèk;
hende hustu tin heful i ta man lòs.
22Esnan bendishoná pa SEÑOR
ta nan lo poseé e Tera;
esnan maldishoná pa SEÑOR,
lo E kaba ku nan kompletamente.
23SEÑOR ta guia un hende su pasonan,#Proverbionan 20:24
ora E gusta su kondukta.
24Si akaso e trompeká, e no ta kai,
SEÑOR ta ten'é na su man.
25Mi ta'ta mucha i awor mi ta bieu,
ma mi no a mira nunka di mi bida
ku un hende hustu a keda bandoná,
ni ku su yunan mester kana pidi pan;
26tur ora e tin pena di otronan,
ta para kla pa fia hende plaka:
su desendensia lo haña bendishon.
27Evitá maldat, hasi bon,
lo bo no falta un lugá pa bo biba;
28SEÑOR ta defendé derecho
i lo no bandoná su fielnan.
SEÑOR ta warda nan pa semper,
ma E ta kaba ku rasa di mal hende.#Job 18:19
29Hende hustu lo poseé e Tera
i lo biba pa semper den dje.
30For di boka di un hende bondadoso
ta sali palabranan sabí,
su lenga ta papia kos drechi.
31E ta karga Lei di Dios den kurason,
su pasonan lo no tambaliá.
32Pekadó ta wak un hende hustu
i ta buska moda di mat'é.
33SEÑOR no ta entreg'é den su man,
E no ke pa akus'é ni konden'é.
34Konfia SEÑOR i sigui su kaminda,
anto lo E duna bo honor
i lo hasi bo doño di e Tera;
lo bo mira malechornan destruí.
35Mi a mira un pekadó, un tirano,
bon plantá manera un palu ku a bona.
36Despues m'a#37:36 m'a: segun vershonnan antiguo; hebreo tin: el a pasa — el a bai,
m'a busk'é — mi no por a hañ'é mas.
37Wak hende hustu, opservá hende drechi:
hende di pas tin porvenir.
38Ma kriminalnan lo ta tur destruí,
rasa di malbadonan lo kaba.
39SEÑOR ta Esun ku ta salba hende hustu,
E ta nan fòrti den tempu difísil.#Salmo 9:9
40SEÑOR ta yuda nan pa nan skapa,
ta libra nan di pekadónan, salba nan,
pasobra serka djE ta nan refugio.
Currently Selected:
Salmo 37: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
