Salmo 33
33
SALMO 33
Mi por stèns riba loke SEÑOR ta hasi
1Grita kontentu pa SEÑOR, tur su fielnan,
kanta su gloria ta pas pa tur bon hende.
2Kanta su alabansa ku siter,
kanta p'E ku arpa di dies kuèrdè.
3Kanta un kantika nobo p'E,
laga kuèrdènan zona, alsa bos!
4Palabra di SEÑOR ta drechi,
bo por stèns riba loke E ta hasi.
5E ta gusta hustisia i derecho,
henter mundu ta yen di su amor.
6Palabra di SEÑOR a krea shelu,
rosea di su boka tur su streanan.#Génesis 1:3-31; Huan 1:3
7E ta warda lamannan den dam
i a sera nan fondo den bodega.
8Tera henter, teme SEÑOR,
tur habitante di mundu, respet'É!
9Ún palabra i ata tur kos,
ún òrdu i tur kos tabat'ei.
10SEÑOR ta bruha propósito di pueblonan,
E ta para plannan di nashonnan,
11pero plan di SEÑOR t'ei pa semper,
su desishonnan pa tur generashon.
12Felis t'e pueblo ku su Dios ta SEÑOR,#Salmo 144:15
e nashon skohí pa ta di djE.
13SEÑOR ta mira abou for di shelu,
ta fiha bista riba kada yu di hende.
14Fo'i kaminda E ta biba E ta peilu
ku atenshon tur habitante di mundu;
15t'É a forma kurason di tur hende,
di kada un E ta sondia su obranan.
16Ningun rei no ta gana djis pa forsa di su ehérsito,
un héroe no ta skapa pa su mes forsa brutu.
17No konta ku kabai pa bo gana viktoria,
su forsa por ta grandi, ma e n' ta salba bo bida.#1 Samuel 17:47; Hoséas 1:7; Judit 9:7
18Kòrda ku bista di SEÑOR ta riba esnan ku respet'É
i ku ta konfia firmemente den su amor bondadoso;
19E ta esun ku ta libra nan di morto
i ku lo salba nan bida den tempu di flakesa.
20Nos alma ta warda binimentu di SEÑOR,
E ta nos yudansa, E ta nos eskudo.
21Sí, nos kurason ta kontentu kunÉ,
nos ta pone nos konfiansa den su nòmber santu.
22Bo amor i bondat, SEÑOR, keda riba nos,
manera nos konfiansa ta firme den Bo.
Currently Selected:
Salmo 33: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
