Salmo 25
25
SALMO 25
Mustra e bon kaminda den bida, SEÑOR
Di David.
1Na Bo, SEÑOR, mi ta alsa mi alma,
2mi Dios, mi ta konfia den Bo;
no pone mi kara na bèrgwensa,
no duna mi enemigunan gustu.
3Di esnan ku ta spera den Bo
ningun lo no keda brongosá;
esnan ku no tin kunes pa kibra ku Bo
ta nan so lo keda ku bèrgwensa.
4Mustra mi bo kamindanan, SEÑOR,
e direkshon ku Bo ke pa mi kohe.
5Guia mi pasonan segun bo bèrdat,
siña mi: Abo ta mi Dios i Salbador;
henter dia mi ta spera Bo.
6Kòrda bo ternura, SEÑOR,
i bo bondat, komo nan ta eterno.
7No keda kòrda e piká- i fayonan
di tempu mi tabata hóben,
sino kòrda riba mi, SEÑOR,
den bo gran amor i bondat.
8SEÑOR ta bondadoso i hustu,
E ta mustra pekadónan kaminda.
9E ta siña sensionan i humildenan
kon sigui kaminda di birtut.
10Tur kaminda di SEÑOR ta resultá
grasia i bèrdat pa esnan
ku ta fiel na su aliansa i dekretonan.
11Fiel na bo nòmber, SEÑOR,
pordoná mi mi kulpa, e ta grandi.
12No tin hende ku rèspèt pa SEÑOR
ku E no ta mustra unda sigui.
13E mes lo biba felis
i e pais lo keda pa su yunan.#Deuteronomio 11:8-9; Salmo 37:9,11,29; Mateo 5:5
14SEÑOR ta íntimo ku es ku respet'É,
E ta siñ'é konosé su aliansa.
15Semper mi bista ta fihá riba SEÑOR,
E ta lòs mi pianan fo'i trampa.
16Mira mi, SEÑOR, kai na mi pena,
pasobra mi ta so i mizerabel.
17Mi kurason ta ansha mas i mas,
mi penanan — libra mi di nan!
18Mira mi tormento, mi apuro,
i kita tur mi pikánan fo'i mi.
19Mira kuantu enemigu mi tin,
ku kuantu odio kruel nan ta odia mi!
20Warda mi bida, salba mi,
no brongosá mi! Bo n' ta mi refugio?
21Ku rektitut i honrades warda mi,
komo m'a pone mi konfiansa den Bo.
22Libra Israel, o Dios, di tur su ansha!
Currently Selected:
Salmo 25: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
