Salmo 140
140
SALMO 140
Warda mi di mala lenga, SEÑOR
Pa maestro di kanto. Salmo di David.
1SEÑOR, libra mi di mal hende,
warda mi di hende violento,
2di esnan ku ta pensa maldat
i henter dia ta forma kestion.
3Nan ta hasi nan lenga skèrpi
meskos ku lenga di kolebra;
tras di nan lepnan tin venenu di víbora.#Romanonan 3:13
4SEÑOR, warda mi di gara di malbadonan,
protegé mi kontra hende violento,
ku ta plania pa laga mi trompeká.
5Hende sobèrbè a skonde trampa pa mi,
kabuya nan a span i un reda,
a pone laso pa mi kant'i kaminda.
6Mi a bisa SEÑOR: ‘Bo ta mi Dios,
SEÑOR, skucha mi gritu di ousilio.
7SEÑOR, mi Dios, mi Forsa i Salbador,
Bo ta mi hèlmu riba dia di kombate.
8SEÑOR, no kumpli ku deseo dje malbadonan,
no laga nan plannan resultá:
nan kabes por susha.
9E venenu di esnan ku ta changa mi,#140:9 E…mi: tradukshon probabel; hebreo no ta kla.
e maldishon ku ta sali fo'i nan boka,
lag'é kai riba nan mes kabes.
10Yobe karbon sendé riba nan,
laga nan kai den buraku,
ku nunka mas nan no por sali fo'i dje.
11Ku mala lenga n' tin rais riba mundu;
hende ku ta usa violensia
nan mes maldat kohe nan na kaminda
i kousa nan kaida fatal.’
12Mi sa, SEÑOR ta duna pobernan derecho
i E ta hasi hustisia
na hendenan desafortuná.
13Sí, hende hustu lo gaba bo nòmber
i esnan ku ta semper piadoso
lo permanesé den bo presensia.
Currently Selected:
Salmo 140: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
