Salmo 139
139
SALMO 139
SEÑOR, Bo konosé mi di paden i pafó
Pa maestro di kanto. Di David. Un salmo.
1B'a saminá mi, SEÑOR, i konosé mi.
2Ku mi sinta o lanta, Bo sa,
ya djaleu B'a komprondé mi pensamentunan.
3Bo sa si mi ta kana o drumi,
unda ku mi bai, Bo sa.
4Ningun palabra no ta sali fo'i mi boka
ku Bo n' tabata sabi e kaba, SEÑOR.
5B'a rondoná mi di patras i dilanti,
Bo a pone bo man riba mi.
6Tantu saber ta surpasá mi,
ta muchu altu pa mi logra kapt'é.
7Unda mi por hui bo spiritu,
unda mi por skapa fo'i bo bista?
8Ku mi subi bai shelu, Bo ta aya,
ku mi drumi band'i mortonan, Bo t'ei.
9Ku mi bula riba ala di ourora
baha na kosta di mas leu di laman:
10aya tambe bo man lo guia mi,
bo man drechi, sigur, lo tene mi.
11Ku mi bisa: ‘Skuridat por bien tapa mi
i klaridat bira anochi rònt di mi’,
12ni tiniebla no ta skur pa Bo,
anochi ta mes kla ku di dia,
skuridat i lus t'e mesun kos.#Yeremías 23:23-24; Amos 9:2; Sirag 16:17
13Sí, B'a forma mi te den mi mondongo,
Bo a hila mi den barika di mi mama.
14Mi t'alabá Bo pasobra B'a traha mi
di un manera asombroso, un milager.
Hundu den mi kurason mi sa esei.
15Bo sa kon mi organismo a forma,
kon mi ta'ta krese den skondí,
bunita di flèktu den barika di tera.
16Fo'i promé ku mi a nase B'a mira mi;
e dianan ku Bo a pone pa mi,
den bo buki nan tur tabat'ei
promé ku un di nan a yega.
17Dios, ki profundo bo ideanan ta pa mi,
kuantu di nan tin na tur!
18Mas inkontabel ku pipita di santu!
I si akaso mi kaba di konta,#139:18 I…konta: segun algun manuskrito hebreo; e otro manuskritonan tin: Ora mi lanta
anto mi n' ta kla ku Bo ainda.#Sirag 18:4-7
19Dios, o kita bida di malbadonan,
— Bai, boso tur ku tin man tur na sanger! —
20ku ta papia riba Bo ku mal propósito,
ta usa bo nòmber sin mester, e enemigunan!#139:20 ta usa…enemigunan: tradukshon probabel; hebreo no ta kla.
21Lo mi n' odia, SEÑOR, es ku odia Bo
i despresiá es ku lanta kontra Bo?
22Mi ta odia nan di henter mi kurason,
for di awor nan ta mi mes enemigu.
23Dios, saminá mi i konosé mi kurason,
purba mi pa Bo sa mi pensamentunan.#Salmonan 17:3; 26:2
24Mira pa mi n' sigui mal kaminda,
guia mi p'e kaminda eterno!
Currently Selected:
Salmo 139: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
