Galatanan 2

Pablo i e otro apòstelnan

1Dieskuater aña despues mi a bolbe bai Herusalèm#Echonan 11:30; 15:2 ku Barnabas i mi a hiba Tito tambe huntu ku mi. 2Mi a bai pasobra Dios a indiká mi esei. I den un reunion privá ku esnan konsiderá kabes di iglesia na Herusalèm, mi a splika kontenido di e bon notisia ku mi ta prediká na esnan no hudiu. Mi a hasi esei pa mi sa si mi trabou, sea den pasado òf presente, no ta enbano. 3Anto ounke mi kompañero Tito no ta hudiu, e lidernan no a fòrs'é pa laga sirkunsidá su mes. 4Preshon pa sirkunsidá Tito a bini di otro hende, ku ta pretendé di ta nos ruman; nan a infiltrá meimei di nos pa spioná e libertat ku nos tin den Kristu-Hesus. Nan ker a hasi nos katibu atrobe, 5pero niun momento so nos no a baha kabes pa nan, ya e bèrdat di e bon notisia por a keda konservá pa boso. 6Esnan konsiderá di ta lider mes no a duna niun komentario. — Mi ta papia di ‘konsiderá’, pasobra pa mi no ta hasi diferensia si nan ta lider òf nò; Dios no ta husga segun aparensia di hende.#Deuteronomio 10:17 — 7Nan no a bisa nada, al kontrario, nan a mira ku Dios a duna ami e tarea pa prediká e bon notisia na esnan no hudiu, meskos ku El a duna Pedro e tarea pa prediká na esnan hudiu. 8Pasobra e mesun Dios ku a hasi mi apòstel pa esnan no hudiu a hasi Pedro apòstel pa esnan hudiu. 9Hakobo, Kefas#Huan 1:42 i Huan, konsiderá di ta pilá di iglesia, a rekonosé ku Dios a duna mi e tarea spesial akí i nan a duna ami i Barnabas man komo muestra ku nan ta solidario ku nos. Nos a palabrá ku nos lo traha serka esnan no hudiu i nan serka esnan hudiu. 10Loke nan a pidi nos sí ta pa kòrda riba e hudiunan den nesesidat i esei ta nèt loke mi mes semper a tene kuenta kuné.

11Pero un dia ku Kefas a bini Antiokia, mi a haña mi ta skual e den su kara, pasobra el a hasi algu robes. 12Promé ku algun hende di Hakobo a bini einan, e tabatin kustumber di kome bon bon huntu ku e no hudiunan.#Echonan 11:2-17 Pero ora e hendenan ei a yega, el a kita pia pokopoko for di e no hudiunan te stòp di kome huntu ku nan. E tabatin miedu di esnan ku ta propagá ku kreyente no hudiu tambe mester ta sirkunsidá. 13E otro hudiunan kreyente tambe a djòin Kefas den e hipokresia akí. Kos a bai asina leu ku asta Barnabas mes tambe a laga nan influensi'é i a hasi meskos. 14Pero ora mi a ripará ku nan no tabata komportá nan den un forma korekto, ku ta kuadra ku bèrdat di e bon notisia, mi a bisa Kefas dilanti di tur hende: ‘Abo, ku ta hudiu mes, a bini ta biba segun kustumber no hudiu! Anto pakiko bo ke obligá esnan ku no ta hudiu sí biba segun kustumber hudiu? 15Mi ku bo ta hudiu di nasementu i no e asina yama “pekadónan no hudiu”. 16Sinembargo nos ta konsiente ku Dios no ta aseptá niun hende komo hustu pasobra nan ta kumpli ku lei,#Salmo 143:2; Romanonan 3:20 sino pa medio di fe den Hesu-Kristu.#2:16 pa medio…Hesu-Kristu; otro posibel tradukshon: pasobra Hesu-Kristu ta fiel#Romanonan 3:22 P'esei nos mes tambe a kere den Kristu-Hesus, pa Dios aseptá nos komo hustu pa medio di fe den Kristu#2:16 pa medio…Kristu; otro posibel tradukshon: pasobra Kristu ta fiel i no pa medio di lei. Pasobra Dios no ta aseptá niun hende komo hustu dor ku el a kumpli ku lei.

17Sinembargo, si den nos búskeda pa Dios aseptá nos komo hustu pa medio di Kristu, resultá ku nos tambe ta pekadó, meskos ku esnan no hudiu, esei ta nifiká ku siguimentu di Kristu ta promové piká? Klaro ku nò! 18Al kontrario, mi mes lo tabata kulpabel di kibra Lei, si mi ta laga algu ku no ta bálido mas, bolbe na vigor. 19Pasobra ami, ku tabata bou di Lei, a muri pa Lei pa asina mi biba pa Dios. Mi a keda krusifiká huntu ku Kristu 20i ya no ta ami mes ta biba, pero ta Kristu ta biba den mi.#Filipensenan 1:21 E bida ku mi ta biba awor akí den e kurpa akí, mi ta biba pa medio di fe den Yu di Dios, ku a mustra mi su amor i a entregá su bida pa mi. 21Mi no ta rechasá grasia di Dios! Pasobra si kumplimentu ku lei di Moises tabata pone ku Dios ta aseptá hende komo hustu, Kristu lo a muri enbano!’

Currently Selected:

Galatanan 2: BPK13

Highlight

Copy