Galatanan 1

Saludo

1-2Esaki ta karta di mi, Pablo, apòstel nombrá no mandá dor di hende, sino dor di Hesu-Kristu i Dios Tata ku a lant'É for di morto. Ami ku tur e rumannan ku ta huntu ku mi ta kumindá e iglesianan den region di Galasia.

3Dios nos Tata i Señor Hesu-Kristu mustra boso su bondat i duna boso pas. 4Segun boluntat di nos Dios i Tata, Hesu-Kristu a entregá su mes bida pa nos pikánan#Mateo 20:28; Marko 10:45; 1 Timoteo 2:6; Tito 2:14 pa libra nos di e era akí ku ta dominá pa maldat. 5Gloria na Dios pa semper i semper! Amèn.

Ún evangelio so tin

6Mi a keda hopi asombrá ku den korto tempu asina ya boso a bandoná e Dios ku a yama boso pa medio di e grasia ku ta bini dor di Kristu. Boso a bandon'É pa sigui un otro supuesto evangelio. 7En realidat no tin otro evangelio. Loke ta pasa ta ku tin algun hende ta bruha boso i ta trata di kambia e evangelio tokante Kristu. 8Pero asta si nos mes òf un angel for di shelu prediká un otro evangelio na boso, diferente for di esun ku nos a prediká kaba, maldishon di Dios kai riba dje! 9Mi a bisa un be kaba i awor mi ta ripití: Si kualke hende mester prediká un evangelio ku ta diferente for di esun ku boso a aseptá, maldishon di Dios kai riba dje!

10Ta aprobashon di hende mi ta buska? Nò, ta aprobashon di Dios!#1 Tesalonisensenan 2:4 Ta popular mi ke ta den bista di hende? Nò, si tabata asina, lo mi no tabata sirbidó di Kristu.

Kon Pablo a bira apòstel

11Laga mi pone na boso konosementu rumannan, ku e evangelio ku mi a prediká no ta algu ku hende a inventá. 12Mi no a risibí e bon notisia akí di hende ni niun hende no a siña mi e, sino mi a hañ'é pa medio di un revelashon di Hesu-Kristu.

13Boso a tende tòg kon mi tabata biba tempu mi tabata sigui religion hudiu; sin mizerikòrdia mi tabata persiguí iglesia di Dios i tabata buska pa destruyé.#Echonan 8:3; 22:4-5; 26:9-11 14Den religion hudiu mi tabata progresá mas ku hopi otro hudiu di mi mes edat den siguimentu di e tradishonnan di mi antepasadonan, pasobra mi tabata mas zeloso ku nan tur.#Echonan 22:3

15-16Pero Dios ku a skohe mi i ku den su bondat a yama mi, a hiba di gustu di revelá su Yu den mi bida.#Echonan 9:3-6; 22:6-10; 26:13-18 El a hasié pa mi prediká e evangelio tokante E na esnan no hudiu. Ora esaki a sosodé, mi no a kore pidi niun hende konseho. 17Tampoko mi no a kohe kaminda pa Herusalèm bai serka esnan ku tabata apòstel promé ku mi, pero mi a bai Arabia i despues Damasko bèk.

18Tres aña despues mi a bai Herusalèm#Echonan 9:26-30 pa sera konosí ku Kefas#Huan 1:42 i a keda diessinku dia serka dje. 19Mi no a mira niun otro apòstel sino Hakobo, ruman di Señor.

20Dilanti di Dios mi ta sigurá boso ku loke mi ta skibi ta bèrdat!

21Despues mi a bai bishitá algun region na Siria i Silisia. 22Pero e rumannan den Kristu di e iglesianan na Hudea sí no tabata konosé mi personalmente. 23Tende nan a tende hende bisa: ‘Ántes e hòmber akí tabata persiguí nos, i awor at'é ta prediká e mesun fe ku e ker a destruí!’ 24Anto e ora ei nan tabata alabá Dios pa loke a sosodé ku mi.

Currently Selected:

Galatanan 1: BPK13

Highlight

Copy