2 Korintionan 13
13
Último atvertensia i kumindamentu
1Esaki ta di tres bia ku mi ta bin bishitá boso. Skritura ta bisa: ‘Tur asuntu por keda konfirmá pa testimonio di dos òf mas testigu.’#Deuteronomio 17:6; 19:15 2Wèl, awor ku mi ta leu, mi ke bolbe bisa esnan ku ta biba den piká i tur e otronan tambe loke mi a bisa un bia kaba: ‘E siguiente bia ku mi bini, niun hende no ta skapa nan kastigu!’ 3Asina boso lo haña e prueba ku boso ke mira, esta ku Kristu ta papia pa medio di mi. E no ta trata boso na un manera débil, pero E ta mustra su forsa pa medio di nos. 4Pasobra ora ku a krusifiká Hesus, E tabata débil, pero E ta biba pa medio di poder di Dios. Nos tambe ta débil huntu kunÉ, pero boso lo ripará ku nos ta biba huntu kunÉ pa medio di poder di Dios.
5Saminá boso mes i husga si boso ta biba den fe. Boso sa tòg ku Kristu ta biba den boso? Si boso no sa esei, boso a faya den e prueba. 6Mi ta konfia ku boso lo sa ku nos sí a pasa e prueba ku éksito. 7Nos ta resa na Dios pa boso no hasi nada malu; nos no ta hasié pa mustra ku nos a pasa e prueba ku éksito, pero pa boso mes hasi loke ta korekto, ounke por parse ku nos a faya. 8Pasobra nos no por hasi nada ku ta bai kontra bèrdat, solamente loke ta na fabor di bèrdat. 9Nos ta kontentu ora nos ta débil, basta boso sí ta fuerte. I tambe nos ta resa pa tur loke ta malu serka boso por drecha. 10P'esei mi ta skibi esaki miéntras mi ta leu fo'i boso, pa ora mi bini serka boso, mi no haña mi obligá di usa mi outoridat na un manera duru ku boso. Señor a duna mi e outoridat ei pa yuda hende krese i no pa kibra nan. 11Finalmente, rumannan, sea kontentu, hasi esfuerso pa alkansá perfekshon, tuma mi palabranan di enkurashamentu na serio, sea ún di pensamentu i biba na pas. I e Dios di amor i pas lo ta ku boso.
12Kumindá otro ku un sunchi santu. 13Tur e rumannan den fe ta manda kumindamentu pa boso.
14Grasia di Señor Hesu-Kristu, amor di Dios i e komunion ku Spiritu Santu ta duna sea ku boso tur.
Currently Selected:
2 Korintionan 13: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
