2 Samuel 6
6
David ta purba trasladá e arka di SEÑOR
(1 Krónikanan 13:5-14)
1David a bolbe reuní tur e sòldánan skohí di Israel, 30.000 na tur, 2i a sali bai for di Baale na Huda ku tur e pueblo ku tabata huntu kuné pa for djei, nan bai ku e arka di Dios, e arka ku ta ligá ku nòmber di SEÑOR soberano ku ta sintá riba trono di e kerubinnan.#Éksodo 25:18-22; 1 Samuel 4:4; 1 Reinan 6:23-28; Salmo 80:1; Isaías 37:16; Ezekiel 1:26-28 3-4Nan a pone e arka di Dios riba un garoshi nobo i a bai kuné for di kas di Abinadab, ku tabata situá riba un seritu.#1 Samuel 7:1-2 Usa i Ahio, e yu hòmbernan di Abinadab, tabata guia e garoshi nobo ku e arka di Dios riba dje; Ahio tabata kana dilanti di e arka. 5David i tur e israelitanan tabata belenkiá dilanti di SEÑOR riba muzik di tur sorto di instrumènt trahá di palu di siprès, manera siter i arpa, tamburein, maraka i platío. 6Ora nan a yega serka Nakon, na e lugá kaminda ta bati trigo, Usa a saka man pa wanta e arka di Dios, pasobra e buenan a trompeká. 7SEÑOR a rabia mashá pasobra Usa a riska hasi esei i ei mes SEÑOR a kastig'é pa e deskuido; el a dal abou muri pegá ku e arka di Dios. 8David tabata mashá indigná pasobra SEÑOR a baha su rabia riba Usa; p'esei e lugá ei yama Pèrès-Uza, ‘E rabia riba Usa’, te dia djawe. 9E dia ei David a haña miedu di SEÑOR i a puntra su mes: ‘Kon e arka di SEÑOR ta hasi yega serka mi?’ 10P'esei David no ker a tuma e arka di SEÑOR serka dje den Siudat di David. El a laga hib'é kas di Obed-Edom, un hòmber di siudat Gat. 11E arka di SEÑOR a keda tres luna den kas di Obed-Edom, i SEÑOR a trese bendishon pa Obed-Edom i henter su famia.#1 Krónikanan 26:4-5
David ta logra trasladá arka di SEÑOR pa Herusalèm
(1 Krónikanan 15:1—16:6)
12Ora nan a konta rei David ku SEÑOR a bendishoná famia di Obed-Edom i tur loke tabata pertenesé na dje pasobra e tabatin e arka di Dios, David a bai aya i bon kontentu el a trasladá e arka di Dios for di kas di Obed-Edom i hib'é Siudat di David. 13Kada be despues ku e kargadónan di e arka di SEÑOR dal seis stap, David tabata ofresé un toro i un bisé gòrdá komo sakrifisio. 14David tabatin solamente un paña sagrado di lenen bistí i e tabata balia drei rònt dilanti di SEÑOR. 15Asina David i tur e israelitanan a trasladá e arka bou di gritu di legria i tokamentu di kachu. 16Ora e arka di SEÑOR tabata drenta Siudat di David, Mikal, yu muhé di Saul, tabata pará na bentana ta wak pafó. El a mira rei David ta bula bula i balia dilanti di SEÑOR; el a sinti un despresio profundo p'e. 17Ora nan a hiba e arka di SEÑOR den Siudat di David, nan a pon'é na su lugá meimei di e tènt ku David a laga arma pa e arka. Despues David a ofresé sakrifisio di kandela i sakrifisio di pas na SEÑOR. 18Ora el a kaba di ofresé e sakrifisionan ei, el a bendishoná e pueblo den nòmber di SEÑOR soberano. 19El a duna henter pueblo, henter e multitut di israelita, hòmber i muhé, kada un un bola di pan, un bola di dadel i un bola di rasenchi. Despues tur a bai nan kas bèk.
20David tambe a bai kas pa e kumindá su famia. Mikal, yu muhé di Saul, a sali top'é i a bis'é: ‘Esta nèchi e rei di Israel a keda awe, ora el a kita paña, manera kualke sinbèrgwensa, dilanti di e katibunan muhé di su sirbidónan!’ 21David a kontest'é: ‘Bèrdat, mi a balia, pero dilanti di SEÑOR, ku a skohe mi na lugá di bo tata òf kualke miembro di bo famia pa hasi mi hefe di su pueblo Israel. P'esei mi a balia dilanti di SEÑOR. 22Mi ta dispuesto pa humiliá mi mes ainda mas i baha den mi mes bista, pa mi subi den bista di e katibunan muhé di ken bo a papia.’ 23I Mikal, e yu muhé di Saul, a keda sin yu te dia el a muri.
Currently Selected:
2 Samuel 6: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
