2 Samuel 7
7
Dios ta primintí di bendishoná David
(1 Krónikanan 17:1-15)
1Awor David por a biba trankil den su palasio pasobra SEÑOR a hasi ku tur su enemigunan den e paisnan rondó di dje a lag'é na pas. 2Un dia David a bisa profeta Natan: ‘Manera bo por mira, mi ta biba den un palasio trahá di palu di seder, miéntras e arka di Dios ta pará den un tènt.’ 3Natan a kontest'é: ‘Hasi loke bo kurason ta bisa bo, pasobra SEÑOR ta ku bo.’ 4Pero e anochi ei mes SEÑOR a papia ku Natan i bis'é: 5‘Bai i bisa mi sirbidó David ku Ami, SEÑOR, ta bisa: “Abo lo ke traha un kas pa Mi biba aden? 6For di dia ku Mi a saka e israelitanan for di Egipto te awor akí Mi no a biba den un kas, pero semper Mi a biaha i un tènt a sirbi Mi pa kas. 7Miéntras Mi tabata biaha ku tur e israelitanan nunka Mi a yega di pidi un di e gobernantenan, ku Mi a enkargá ku kuido di mi pueblo Israel, traha un kas di palu di seder pa Mi.” 8Awèl, bisa mi sirbidó David lo siguiente: “SEÑOR soberano ta bisa asin'akí: Mi a saka bo for di tras di e karnénan den kunuku pa bo ta hefe di mi pueblo Israel; 9i unda ku bo a bai Mi a bai ku bo. Mi a kaba ku tur bo enemigunan. Mi a hasi bo nòmber mes famoso ku di esnan importante di mundu. 10Mi a prepará un lugá pa mi pueblo, Israel, kaminda e por keda biba, ya mi pueblo por biba na su mes lugá. Lo e no tembla mas i e malechornan lo no oprimié mas manera ántes, 11tempu Mi a pone e huesnan goberná mi pueblo Israel. Mi ta sòru pa bo enemigunan laga bo na pas.” Tambe SEÑOR ta anunsiá bo ku ta E lo traha un kas pa bo: 12“Dia bo bida yega na un fin i bo bai sosegá serka bo antepasadonan, e dia ei lo Mi laga un di bo desendientenan, bo mes yu hòmber, sigui bo i lo Mi sòru pa su reino keda firme pa semper. 13Ta e lo traha un kas pa Mi i Ami lo sòru pa su trono real para firme pa semper. 14Ami lo ta un tata p'e i e lo ta un yu pa Mi. Ora e hasi kos malu Mi ta kastig'é i sut'é ku un palu manera un tata ta hasi.#Deuteronomio 8:5; 2 Korintionan 6:18; Hebreonan 1:5; 12:5-11 15Pero lo Mi no laga di ta fiel n'e, manera Mi a laga di ta na Saul, pa Mi a pone bo na su lugá. 16Lo bo biba i mira ku bo famia i bo reino lo ta pará firme pa semper. Sí, pa semper bo trono lo para firme.” ’
17Natan a konta David tur e kosnan akí presis manera el a mira i tende nan den e vishon.
Orashon di David
(1 Krónikanan 17:16-27)
18E ora ei David a drenta e tènt kaminda e arka tabata, kai sinta dilanti di SEÑOR i bisa: ‘SEÑOR, mi Dios, ken mi ta, kiko mi famia ta ku Bo a laga mi yega asina leu? 19I komo si fuera esaki no ta basta den bo bista SEÑOR, mi Dios, Bo a papia tambe tokante futuro di dinastia di bo sirbidó. Ta un lès pa hende, SEÑOR Dios? 20Kiko mas mi por bisa Bo, SEÑOR Dios? Bo konosé bo sirbidó. 21Pa Bo kumpli ku bo palabra i aktua segun bo plan Bo a hasi tur e kosnan grandi akí i anunsiá nan na bo sirbidó. 22Bo ta grandi, SEÑOR Dios. Manera nos a tende semper no tin manera Bo ni no ta eksistí otro dios ku no ta Abo. 23I pa loke ta trata Israel, bo pueblo, no tin manera e; e ta e úniko nashon na mundu, ku Dios a sali bai kumpra liber pa e ta su pueblo i pa asina E haña fama. Bo a hasi kos grandi i spantoso, ora Bo a kita#7:23 ora Bo a kita: segun vershon griego; hebreo tin: for di bo pais e otro nashonnan i nan diosnan for di dilanti di bo pueblo, ku Bo a saka for di Egipto. 24Asina Bo a disidí ku Israel lo ta bo pueblo pa semper, i ku Abo, SEÑOR, lo ta su Dios.
25Awor anto, SEÑOR Dios, atené Bo semper na loke Bo a primintí bo sirbidó i su kas real i kumpli ku bo promesa. 26E ora ei bo nòmber lo ta grandi pa semper, pasobra nan lo bisa: “SEÑOR soberano ta Dios di Israel.” I kas real di David lo keda para firme bou di bo protekshon. 27Abo mes, SEÑOR soberano, Dios di Israel, a revelá mi ku Bo ta traha un kas pa mi. P'esei bo sirbidó ta tribi hasi e orashon akí na Bo. 28Abo, SEÑOR Dios, Bo ta Dios, bo palabranan ta bèrdat i Bo a primintí bo sirbidó e felisidat akí. 29Sea asina bon di bendishoná mi kas real pa e keda para semper firme bou di bo protekshon. Pasobra Abo, SEÑOR Dios, a primintí esei i ku bo bendishon mi kas real lo ta bendishoná pa semper.’
Currently Selected:
2 Samuel 7: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
