2 Korintionan 8

Yudansa finansiero pa e rumannan na Hudea

1Awor, rumannan, nos ke pa boso ta na altura di e grasia ku Dios a mustra e iglesianan na Masedonia. 2Ounke nan a pasa den prueba pisá, nan tabata mashá kontentu i ounke nan tabata mashá pober, nan kontribushonnan tabata mes generoso ku di hende riku. 3Mi ta sigurá boso ku nan a duna segun nan forsa i asta riba nan forsa! Di nan mes 4nan a roga ku mashá insistensia pa nan tambe por duna algu pa yuda e kreyentenan na Hudea.#Romanonan 15:26 5Nan a duna mas ku loke nos a spera: promé nan a entregá nan mes na Señor i despues na nos, manera Señor mes tabata ke.

6P'esei nos a pidi Tito pa terminá e obra di karidat akí ku el a kuminsá serka boso. 7Boso tin tur kos na abundansia: fe, elokuensia, konosementu, zelo sin límite i nos amor pa boso;#8:7 nos amor pa boso; otro manuskrito tin: amor pa nos p'esei duna na abundansia pa e obra di karidat akí tambe.

8No ku mi ke manda riba boso, pero dor di mustra boso kon ansioso otro hende ta pa yuda, mi ke haña sa kon real boso amor ta. 9Boso mes sa ku nos Señor Hesu-Kristu, den su bondat, a bira pober pa boso ounke E tabata riku, ya boso por a bira riku pa medio di su pobresa!

10Ta un konseho so mi ta duna boso pa boso mes bon. For di aña pasá boso tabatin un plan kaba i boso a kuminsá pon'é den práktika. 11Wèl awor terminá e trabou! Sea mes ansioso ku boso tabata dia a plani'é, pa terminá e trabou, segun boso forsa! 12Kaminda tin boluntat pa duna i hende duna segun su forsa, Dios ta aseptá e kontribushon. Dios no ta spera di niun hende pa e duna loke e no tin.

13No ta intenshon pa boso pasa trabou yudando otro hende; tur kos mester bai a base di igualdat. 14Boso ku awor akí tin na abundansia, mester yuda esnan ku ta den nesesidat, pa despues, ora boso ta den nesesidat, esnan ku tin na abundansia por yuda boso. Asina tur dos grupo ta haña un trato igual. 15Ta manera Skritura ta bisa:

‘Esun ku a kohe hopi, no tabatin di mas

ni esun ku a kohe tiki, no tabatin di ménos.’#Éksodo 16:18

Tito i algun kompañero ta bini

16Nos ta gradesido na Dios ku El a hasi Tito mes ansioso ku nos pa yuda boso. 17No solamente el a aseptá nos petishon, pero e tabata asina ansioso pa yuda boso ku di su propio boluntat e ta bin mira boso. 18Huntu kuné nos ta manda un ruman ku ta mashá respetá den tur iglesia pa su trabou pa kousa di e bon notisia. 19Ademas e iglesianan a skoh'é pa biaha huntu ku nos i yuda nos den e obra di karidat ku nos ta hasi pa honra Dios i mustra nos deseo di yuda boso. 20Asin'akí nos ta spera di evitá kualke sospecho kontra nos pa loke ta trata maneho di e suma grandi di kontribushon. 21Nos intenshon ta pa hasi loke ta bon, no solamente den bista di Dios, pero tambe den bista di hende.#Proverbionan 3:4

22Huntu ku nan nos ta manda un otro ruman ku, hopi bia i bou di diferente sirkunstansia, a demostrá di ta un ruman ku ta ansioso pa yuda. I awor ku e tin asina tantu konfiansa den boso, e ta mas ansioso ainda pa yuda. 23Pa loke ta trata Tito, e ta mi kompañero i ta kolaborá ku mi pa yuda boso. E otro rumannan ku ta bai huntu kuné, ta representá e iglesianan; nan ta hende ku ta honra Kristu. 24Mustra nan ku boso ta stima nan pa proba e iglesianan ku ta ku rason nos ta broma ku boso.

Currently Selected:

2 Korintionan 8: BPK13

Highlight

Copy