2 Korintionan 4

Predikadónan di e bon notisia

1P'esei nos no ta pèrdè kurashi awor ku Dios den su mizerikòrdia a duna nos e tarea akí. 2Nos a rechasá tur e kosnan bergonsoso, ku no por mira lus di dia i nos no ta aktua ku astusia ni trose palabra di Dios. Al kontrario, ta bèrdat so nos ta papia i den e forma ei nos ta rekomendá nos mes dilanti di Dios na tur hende. 3Si ainda e bon notisia ku nos ta prediká ta tapá ku un wal, e ta tapá pa esnan ku ta bai pèrdí so. 4Nan ta inkrédulo pasobra e dios di e mundu akí a blèndu nan mente. Di e manera ei nan no por mira lus di e bon notisia, e bon notisia tokante gloria di Kristu ku ta imágen di Dios. 5Pasobra no ta nos mes nos ta prediká, sino Hesu-Kristu komo Señor; pa loke ta toka nos mes, nos ta deklará ku nos ta boso sirbidó pa kousa di Hesus. 6Dios ku a bisa: ‘Lus lo bria for di skuridat,’#Génesis 1:3 ta e mesun Dios ku a pone su lus bria den nos kurason pa nos por lusa otro hende su bida, ora nos laga nan konosé gloria di Dios ku ta bria for di kara di Hesus.

Tesoro spiritual den pòchi di klei

7Pero nos ku tin e tesoro spiritual akí, ta manera pòchinan di klei frágil,#Sabiduria 9:15-16 ya asina ta sali na kla ku e poder supremo ei ta bini di Dios i no di nos. 8Ounke tribulashon ta primi nos di tur banda, tòg nos no ta haña nos den un kayehon sin salida; nos por haña nos ku preokupashon sí, pero nunka nos no ta kai den desesperashon. 9Persekushon ta asotá nos, pero Dios no ta bandoná nos; nan ta tumba nos, pero nos no ta muri sí. 10Na nos mes kurpa, nos ta eksperensiá morto di Hesus, ya hende por mira su bida tambe den nos kurpa. 11Pasobra durante nos bida nos ta kontinuamente den gara di morto pa kousa di Hesus, ya bida di Hesus tambe por bira visibel den nos kurpa mortal. 12Esei ke men ku forsa di morto ta traha den nos, pero forsa di bida ta traha den boso.

13Skritura ta bisa: ‘Mi a papia, pasobra mi a kere.’#Salmo 116:10 Wèl, ta den e mesun aktitut di fe ei, nos tambe ta papia, pasobra nos ta kere. 14Nos sa ku Dios, ku a lanta Señor Hesus for di morto, lo lanta nos tambe for di morto huntu ku Hesus i nos sa ku Dios lo hiba nos huntu ku boso den su presensia. 15Nos ta pasa den tur e kosnan akí pa boso, ya grasia di Dios por alkansá mas i mas hende. E ora ei e orashonnan di gradisimentu tambe lo oumentá i e gloria ta bai pa Dios.

Biba pa medio di fe

16Pa e motibu akí nos no ta pèrdè kurashi, pasobra ounke físikamente nos ta bayendo atras, spiritualmente nos ta keda renobá kada dia. 17E sufrimentu ku nos ta pasa den e bida akí, ta pasahero i no ta pisá, pero e ta trese komo resultado un gloria sin límite i duradero pa nos. 18Nos bista no ta fihá riba loke ta visibel, pero riba loke ta invisibel. Loke ta visibel ta pa un tempu so, pero loke ta invisibel ta dura pa semper.

Currently Selected:

2 Korintionan 4: BPK13

Highlight

Copy