2 Korintionan 3

Sirbidónan di e aliansa nobo

1Ta komo si fuera nos a kuminsá rekomendá nos mes atrobe? Òf por ta ku nos mester di karta di rekomendashon pa boso òf di boso, manera sierto hende? 2Nò, boso mes ta mi karta di rekomendashon, un karta skibí riba nos kurason ku tur hende por lesa i komprondé. 3Ta bon kla tòg ku boso ta un karta di Kristu, skibí ku nos yudansa, no ku enk, pero ku Spiritu di Dios bibu; no riba tabla di piedra,#Éksodo 24:12 pero riba tabla ku ta kurason di hende.#Yeremías 31:33; Ezekiel 11:19; 36:26

4Nos ta sigur di esei, pasobra danki na Kristu nos konfiansa den Dios ta grandi. 5Di nos mes nos no tin kapasidat pa konsiderá algu nos trabou. Nos kapasidat ta bini di Dios, 6ku ta hasi nos kapas di ta sirbidó di un aliansa nobo#Yeremías 31:31 ku no ta dependé di un lei skibí, pero di Spiritu Santu. E lei skibí ta trese morto, pero Spiritu Santu ta duna bida.

7E lei ku a keda grabá riba tabla di piedra, a bini ku asina un manifestashon di gloria di Dios, ku e israelitanan no por a keda wak Moises su kara, pasobra su kara tabata bria ku un splendor inmenso.#Éksodo 34:29 Anto esei tabata un splendor pasahero! Awor si e sistema di lei ku ta hiba na morto, a bini ku dje tantu gloria ei, 8kuantu mas intenso gloria di e sistema ku Spiritu Santu ta usa lo no ta! 9Pasobra si e sistema ku ta trese kondenashon tabata glorioso, kuantu mas glorioso e sistema ku ta laga Dios aseptá hende komo hustu lo no ta! 10No por kompará gloria di e tempu aya ku gloria di awor! 11Pasobra si loke tabata pasahero tabatin gloria, kuantu mas gloria loke ta dura pa semper no tin!

12P'esei anto, ta pasobra nos tin e speransa akí, nos ta aktua ku hopi kurashi. 13Nos no ta manera Moises ku semper a tapa su kara ku un wal#Éksodo 34:33 pa e israelitanan no ripará ku e splendor, símbolo di e sistema ku ta hiba na morto, tabata mengua bira mas dòf. 14Pero nan mente a keda tapá: te dia djawe nan mente ta tapá ku e mesun wal ei ora nan ta lesa buki di e aliansa bieu. Ta ora nan kere den Kristu, e wal ta kita, 15pero te dia djawe tin un wal ta tapa nan mente, kada be ku nan lesa e bukinan di Moises. 16Loke tin bisá di Moises, ta konta pa nan tambe: ‘Su wal tabata kita for di su kara, ora e tabata bai bèk serka Señor.’#3:16 Loke…Señor; otro posibel tradukshon: Pero kada be ku un hende bai bèk serka Señor, e wal ta kita 17Wèl, den e parti akí e palabra ‘Señor’ ta pará pa ‘Spiritu Santu’ i kaminda Spiritu Santu ta, ei tin libertat. 18Nos tur, sin tin nada pa tapa nos kara, ta mira gloria di Señor manera den un spil i nos ta keda transformá den loke nos ta mira den e spil;#Romanonan 8:29; Galatanan 4:19; Filipensenan 3:10 nos ta haña mas i mas gloria pa medio di Spiritu di Dios.

Currently Selected:

2 Korintionan 3: BPK13

Highlight

Copy