2 Korintionan 2

1Ke men, mi a disidí ku ora mi bolbe bishitá boso no mester ta un bishita tristu atrobe. 2Pasobra si mi hasi boso doló, ken lo hasi mi kontentu? Ta esnan ku mi a hasi doló mes! 3P'esei mes mi a skibi nèt esaki den mi karta. Mi no ker a bini, pa e hendenan ku mester hasi mi kontentu no hasi mi tristu. Pasobra mi ta konvensí ku boso ta kontentu ora ami ta kontentu. 4Ora mi a skibi boso, mi kurason tabata preokupá i kargá, i mi a yora hopi. No tabata mi intenshon pa hasi boso doló, pero pa boso realisá kon grandi mi amor pa boso tur ta.

Pordoná esun ku a peka

5Ora sierto persona a hasi un otro hende doló, no ta ami el a hasi doló, pero te na sierto límite — mi ta bisa asina pa mi no eksagerá — el a hasi boso tur doló. 6Mayoria di boso a dun'é su kastigu kaba; esei ta sufisiente! 7P'esei anto, awor ta mihó boso pordon'é i kurash'é pa e no bira muchu tristu i kai den desesperashon total. 8P'esei mi ke pidi boso: lag'é mira ku boso ta stim'é.

9Mi a skibi e promé karta, pasobra mi ker a mira si en realidat boso ta obedesé mi den tur kos. 10Ora boso pordoná un hende loke el a hasi, ami tambe ta pordon'é. Pasobra si mi tin algu ku mi mester pordoná, mi ta hasié pa boso bon. Kristu ta mi testigu! 11Asina nos ta pordoná pa nos no laga satanas subi nos kabes, pasobra nos sa bon kiko su plannan ta.

Pablo a pasa den ansha na Troas

12Ora mi a yega Troas pa prediká e bon notisia tokante Kristu, mi a deskubrí ku Señor a habri un porta pa mi traha einan. 13Pero mi tabata kontinuamente den ansha, pasobra mi no a topa ruman Tito. P'esei mi a bandoná Troas i a sigui pa Masedonia.#Echonan 20:1

14Pero mester yama Dios danki! E ta hiba nos semper den su marcha di viktoria, pasobra nos ta uní ku Kristu. I pa medio di nos, Dios ta plama konosementu tokante djE mes tur kaminda manera un holó dushi. 15Pasobra nos ta manera e holó dushi di sensia ku Kristu ta ofresé Dios i ku ta plama tantu meimei di esnan ku ta haña salbashon komo meimei di esnan ku ta bai pèrdí. 16Pa esnan ku ta bai pèrdí e ta un holó stinki i mortal, pa esnan ku ta haña salbashon e ta un holó dushi ku ta duna bida. Ken ta adekuá pa Dios us'é asin'ei? Niun hende! Nos tampoko; 17nos no ta manera hopi otro hende ku ta hasi negoshi barata ku palabra di Dios, pero nos ta papia ku sinseridat, a base di nos union ku Kristu i den presensia di Dios, ku a manda nos.

Currently Selected:

2 Korintionan 2: BPK13

Highlight

Copy