1 Korintionan 8

Karni ofresé na dios falsu

1Ban pasa pa e tópiko tokante karni ofresé na dios falsu. Ta bèrdat ku ‘nos tur tin konosementu’, manera nan ta bisa. Ma e konosementu ei ta pone hende hincha bira orguyoso, miéntras amor ta yuda kresementu di iglesia. 2Esun ku ta kere ku e sa algu, no tin e konosementu berdadero. 3Ma esun ku tin amor pa Dios, ta konosí serka djE.

4Pa loke ta trata kuminda ofresé na dios falsu, nos sa ku e diosnan falsu ei no ta eksistí di bèrdè i ku ta ún Dios so tin. 5Anto ounke den shelu i na tera tin asina yamá dios — i den e sentido ei tin hopi dios i señor —, 6pa nos ta ún Dios so tin, esta Dios Tata; El a krea tur kos i ta p'E nos ta biba. Tambe ta ún Señor so tin pa nos, esta Hesu-Kristu; tur kos ta kreá pa medio di djE i nos ta biba pa medio di djE.#Malakías 2:10; Huan 1:3; Romanonan 11:36; Efesionan 4:6; Kolosensenan 1:16

7Ma no ta tur hende tin e konosementu ei. Tin hende ku a kustumbrá asina tantu ku adorashon di dios falsu, ku te ainda ta kome e tipo di karni ei ku e pensamentu ku ta karni ofresé na e diosnan. Komementu di e karni ei ta afektá nan konsenshi débil. 8Sinembargo kuminda no ta drecha nos relashon ku Dios. Es ku no kome no ta pèrdè nada; es ku kome no ta gana nada! 9Pero tene kuidou pa no ta boso libertat ta laga esnan suak den fe kai den piká! 10Suponé ku un hende konsenshi débil mira abo ku tin konosementu, sinta kome den tèmpel dediká na e diosnan falsu; akaso esei lo no kurash'é pa bai kome karni ofresé na dios falsu? 11Anto asin'ei e persona débil ei, un ruman ku Kristu a muri p'e, lo bai pèrdí pa motibu di bo konosementu. 12Peka asin'ei kontra boso rumannan kristian ku tin konsenshi débil i mancha nan konsenshi, ta peka kontra Kristu mes!#Mateo 25:45 13P'esei, si mi kuminda ta pone mi ruman kai, lo mi no kome karni nunka di mi bida mas pa mi no pone mi ruman kai.

Currently Selected:

1 Korintionan 8: BPK13

Highlight

Copy