1 Korintionan 5

Inmoralidat den iglesia

1Ta bon konosí ku ta reina inmoralidat serka boso, anto un tipo di inmoralidat asina baho ku bo no ta haña ni serka pagano mes: un di boso ta drumi ku su mes madrasa!#Deuteronomio 22:30 2Anto boso ta sinti boso mashá kos! N' ta rou boso mester a tene? E ora ei boso lo a ekspulsá esun ku a kometé e akto ei for di meimei di boso! 3Ounke mi no ta personalmente serka boso, den spiritu sí mi ta presente. Anto komo si fuera mi ta presente, ya mi a sentensiá esun ku a aktua asina. 4Ke men ora boso reuní, ami lo ta huntu ku boso den spiritu i poder di nos Señor Hesus tambe lo t'ei huntu ku boso. Na e momento ei, den nòmber di nos Señor Hesus, 5mester entregá e hòmber ei na Satanas. Asina su kurpa lo keda destruí, pero su spiritu lo haña salbashon riba dia di Señor.

6Boso bromamentu no ta bon! Akaso boso no sa ku un tiki zürdeg ta pone henter e mansa reis?#Galatanan 5:9 7P'esei tira e zürdeg bieu di piká afó, pa boso por bira pan trahá di mansa nobo, sin zürdeg. Enberdat boso ta manera e pan sin zürdeg ku ta kome durante Fiesta di Pésag,#Éksodo 12:5 pasobra Kristu, nos lamchi di Pésag, a keda sakrifiká. 8Laga nos antó selebrá nos Fiesta di Pésag sin e zürdeg bieu aden,#Éksodo 13:7; Deuteronomio 16:3 sin e zürdeg di piká i maldat, pero ku e pan sin zürdeg, pan di puresa i bèrdat.

9Den mi karta anterior mi a skibi boso pa no anda ku hende ku ta hiba un bida di inmoralidat. 10Klaro ku niun momento so, mi no tabata ke men tur hende riba mundu ku ta inmoral, golos pa kos, ladron òf ku ta adorá dios falsu. Pa evitá di anda ku nan tur, ta fo'i mundu mes boso lo mester sali kompletamente! 11Pero loke mi tabata ke men tabata ku boso no mester anda ku hende ku ta yama nan mes ruman den fe, pero ku ta inmoral, golos pa kos, òf ku ta adorá dios falsu, ku ta kana zundra hende, hasi kos di buraché òf ta ladron. No sinta kome mes huntu ku hende asina! 12-13No ta mi asuntu pa husga esnan ku ta pafó di iglesia. Dios mes lo husga nan. Pero akaso no ta boso trabou pa husga e miembronan di boso iglesia? Manera Skritura ta bisa: ‘Kore ku e malechor for di meimei di boso!’#Deuteronomio 13:5; 17:7

Currently Selected:

1 Korintionan 5: BPK13

Highlight

Copy