1 Korintionan 4

Tarea di apòstel

1Konsiderá nos komo sirbidó di Kristu ku a keda enkargá pa instruí e plannan skondí di Dios. 2Loke ta eksigí di un sirbidó asina ta fieldat. 3Di mi parti, no ta importá mi mashá si boso òf kualke korte hudisial humano husga mi. De echo, ami mes no ta husga mi mes! 4Mi konsenshi ta limpi, pero esei no ta hasi mi inosente; ta Señor ta Esun ku ta husga mi.#1 Huan 3:19-21 5P'esei no husga niun hende, promé ku e tempu indiká. Warda te ora Señor bini. E lo saka na kla loke ta skondí den skuridat i lo mustra e intenshonnan ku hende tin den su kurason. Kada ken lo haña e elogio ku e meresé, serka Dios.

6Rumannan, den tur loke mi a bisa, mi a usa Apolo i mi mes komo ehèmpel, ya boso ta siña kiko e dicho: ‘No pasa límite di loke tin skibí’, ta nifiká. E ora ei niun hende lo no rebahá esun persona dor di kana buya ku un otro persona. 7Ken a bisa ku boso ta superior? No ta Dios a duna boso tur loke boso tin? Di kon boso ta broma anto, komo si fuera no ta haña boso a haña tur loke boso tin?

8Ya kaba boso tin tur kos ku boso mester, no? Boso ta riku kaba, no? Boso a bira rei, no? Nos sí no a yega dje leu ei ainda! Mara boso tabata ei, ya nos tambe ta tuma parti na boso reino. 9Pasobra ta parse mi ku Dios a duna nos, ku ta apòstel, e último lugá: nos ta manera hende sentensiá na morto públiko. Nos a bira un espektákulo pa mundu henter, tantu pa hende komo pa angel. 10Pa Kristu su kousa nos a bira loko, ma boso sí ta asina sabí den Kristu! Nos ta suak, esta fuerte boso sí ta! Boso ta kana risibí honor; nos nan ta despresiá! 11Te ku awor nos ta sufri di hamber i set, nos ta bisti paña lapilapi, kome wanta serka hende, kana dualu di un lugá pa otro 12i nos ta sofoká nos kurpa ku trabou pisá.#Echonan 18:3 Ora insultá nos, nos ta bendishoná. Ora persiguí nos, nos ta soportá. 13Ora papia malu di nos, nos ta rospondé ku amabilidat. Te ainda ta trata nos manera e sushi di henter mundu, komo e kos di tira afó di henter humanidat!

14Mi no ta skibi esaki pa pone boso kara na bèrgwensa, pero pa instruí boso manera mi yunan stimá. 15Ounke boso por tin míles di instruktor den boso bida kristian, ta un tata so boso tin. T'ami ta boso tata den Kristu-Hesus, pasobra t'ami a proklamá e bon notisia na boso. 16P'esei mes mi ta kurashá boso pa sigui mi ehèmpel!#1 Korintionan 11:1; Filipensenan 3:17 17Pa e motibu ei mi a manda Timoteo serka boso. E ta mi yu stimá i fiel den Señor; lo e rekordá boso riba e prinsipionan ku mi ta sigui den mi bida ku Kristu i ku mi ta siña hende den tur iglesia unda ku mi bai.

18Algun di boso a bira mashá orguyoso, pasobra nan a kere ku mi no ta bin bishitá boso mas. 19Ma si Señor pèrmití, mi ta bini pronto. E ora ei lo mi haña sa kiko e hendenan orguyoso akí por hasi, apart di papia! 20Pasobra reino di Dios no ta kuestion di palabra, ma di poder. 21Kiko boso ta preferá? Pa mi bini ku pida palu pa bati boso òf ku un kurason yen di amor i dulsura?

Currently Selected:

1 Korintionan 4: BPK13

Highlight

Copy