1 Korintionan 12
12
E donnan di Spiritu Santu
1Ban pasa awor pa e tópiko tokante e donnan spiritual. Rumannan, mi ke pa boso ta informá tokante nan. 2Boso sa ku tempu boso tabata pagano ainda, e diosnan falsu, sin bida, tabata trèk boso na un manera iresistibel. 3P'esei mi ke pa boso sa ku niun hende ku ta papia guiá pa Spiritu di Dios, no por bisa: ‘Hesus ta maldishoná!’ Ni tampoko niun hende no por bisa: ‘Hesus ta Señor!’, si no ta Spiritu Santu ta gui'é.
4Tin diferente don, pero ta e mesun Spiritu Santu ta duna nan. 5Tin diferente manera di sirbi, pero ta e mesun Señor nos ta sirbi. 6Tin diferente manifestashon di poder, pero ta e mesun Dios ta hasi esaki den tur hende, pa medio di su poder. 7Spiritu Santu ta mustra su presensia den tur kreyente na un òf otro manera na benefisio di nan tur. 8Na esun kreyente Spiritu Santu ta duna un palabra di sabiduria i e mesun Spiritu Santu ta duna un mensahe di konosementu na un otro. 9E mesun Spiritu Santu ta duna fe spesial na un persona i un otro ta haña poder pa kura hende malu pa medio di e mesun Spiritu ei. 10E ta duna esun poder pa hasi milager, e otro don pa profetisá i un otro don pa diserní kiko ta bini di Spiritu Santu i kiko nò. E ta duna esun don pa papia den lenga i e otro don pa interpretá loke a papia den lenga strañero. 11Ma tur esaki ta obra di ún i mesun Spiritu Santu ku ta duna kada hende su donnan manera E ta haña ta bon.#Romanonan 12:6-8
Un kurpa ku hopi parti
12Ounke kurpa di hende tin hopi parti, tòg e ta ún kurpa. Asina ta ku Kristu tambe!#Romanonan 12:4-5; Efesionan 4:14-16 13Nos tur, hudiu i no hudiu, katibu i hende liber, a batisá pa asina nos bira parti di ún kurpa pa medio di e mesun Spiritu; i nos tur a haña di bebe di e mesun Spiritu. 14Pasobra no ta ún parti so ta forma henter ún kurpa, pero ta hopi parti huntu ta forma un kurpa. 15Si pia lanta bisa: ‘Mi no ta man, ke men mi no ta pertenesé na e kurpa’, esei no ta nifiká tòg ku e no pertenesé na e kurpa? 16Si orea bisa: ‘Mi no ta wowo, ke men, mi no ta pertenesé na e kurpa’, esei no ta nifiká tòg ku e no ta pertenesé na e kurpa? 17Si hende su kurpa tabata wowo so, ta kon e ta hasi tende? Si e tabata orea so, kon e ta hasi hole? 18Pero Dios a pone kada miembro di e kurpa na e lugá ku parse É di ta mas mihó. 19Si tur ta mesun parti, lo no tabatin un kurpa kompleto! 20Bèrdat ta ku ounke tin hopi miembro, ta ún kurpa so tin!
21Wowo no por bisa man: ‘Mi no tin mester di bo!’ Òf kabes no por bisa e pianan: ‘Mi no tin mester di boso!’ 22Al kontrario, ta e partinan di kurpa ku ta parse mas suak ta esnan ku nos tin mas mester di dje. 23E partinan ku nos ta haña ménos honorabel, nos ta tapa ku mas kuidou. I e partinan ku nos ta haña ménos representabel nos ta trata ku mas modestia, 24miéntras no ta nesesario pa hasi esei ku e partinan mas representabel. Dios a forma kurpa di tal manera ku e partinan ménos honorabel ta haña mas honor, 25pa asina no tin desunion den e kurpa, pero pa tur miembro kuida otro. 26Si ún parti di kurpa ta sufri, tur sobrá tambe ta sufri. Si ún parti risibí honor, tur sobrá ta kompartí su legria.
27Boso ta kurpa di Kristu, boso kada un ta forma parti di dje. 28I den iglesia Dios a duna kada hende un tarea diferente: na promé lugá tin apòstel, despues tin profeta, na di tres lugá maestro,#Efesionan 4:11 despues hende ku don di hasi milager, don di kura hende malu, don di yuda, don di dirigí òf don di papia den lenga. 29No ta tur kreyente ta apòstel, no ta tur ta profeta, no ta tur ta maestro, no ta tur ta hasi milager 30ni no ta tur tin don di kura hende malu. Tampoko no ta tur ta papia den lenga ni no ta tur ta interpretá loke ta papiá den lenga strañero. 31Hasi empeño pa haña e mihó donnan.
Amor ta mas importante ku tur don
Awor mi ta bai mustra boso loke ta surpasá tur kos.
Currently Selected:
1 Korintionan 12: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
