Maki 3

Jezu gbɔ azɔn nú dǎwe alɔkúnánɔ ɖé

(Matíe 12.9-14; Luki 6.6-11)

1Jezu lɛ́ wá yi kplɔ́ngbasá ɔ́, bɔ nya ɖé ɖo fínɛ́, bɔ alɔ tɔn kú. 2Mɛ e ɖo fínɛ́ lɛ́ɛ ká jɛ Jezu cɔ́ jí, bó ná kpɔ́n ɖɔ é ná gbɔ azɔn nú nya énɛ́ gbɔjɛzán gbe wɛ a jí, bó ná dó sixú ɖó hwɛ nú nya énɛ́. 3Jezu ka ɖɔ nú nya e sín alɔ kú ɔ́ ɖɔ: “Sí te bó wá jɛ tɛ́ntin fí.” 4Énɛ́ ɔ́ gúdo ɔ́, é kanbyɔ́ mɛ lɛ́ɛ ɖɔ: “Sɛ́n mǐtɔn ná gbe ɖɔ è nǐ wa ɖagbe abǐ nyanya gbɔjɛzán gbe a? Mɛ wɛ sɛ́n ɔ́ ɖɔ è nǐ hwlɛ́n a, abǐ mɛ wɛ é ɖɔ è nǐ hu?” Lo ɔ́, yě kɛ nu ǎ. 5Énɛ́ ɔ́, akpɔ ɖó e dó tótlítlí yětɔn wú, bɔ é kpɔ́n yě xaan lɛ́ dó kpódó xomɛsin kpó, bó ɖɔ nú nya ɔ́ ɖɔ: “Dlɛ̌n alɔ towe”, bɔ é dlɛ́n alɔ, bɔ alɔ tɔn jɛ tɛn tɔn mɛ. 6Falizyɛn lɛ́ɛ tɔ́n sín kplɔ́ngbasá ɔ́, bɔ tlóló ɔ́, yě yi mɔ toxóɖɔgbɛ́ axɔ́sú Elódu tɔn, bɔ yě kplé, bó ɖe wě dó lě e yě nǎ bló gbɔn, bó hu Jezu ɔ́ wú.

Mɛ gěgé nyi ahwan jɛ Jezu gúdo

7-8Jezu kpódó ahwanvú lɛ́ɛ kpó sɛ́ jɛ Judɛ́ɛn tɔ ɔ́ tó; mɛ gěgé nyi ahwan sín Galilée, sín Judée, sín Jeluzalɛ́mu, kpódó Idumɛ́ɛ kpan; sín Tíi kpódó Sidɔ́ɔn kpán gbé jí, bó jɛ gǔdo tɔn, ɖó yě se nǔ e wa wɛ é ɖe lɛ́ɛ. 9 É ká zɔ́n ahwanvú tɔn lɛ́ɛ ɖɔ yě ní sɔ́ tɔjíhún ɖokpó ɖó te nú émí, bónú mɛ lɛ́ɛ ma wá nyɛ́sú émí ó. 10Đó, azɔn e gbɔ nú mɛ lɛ́ɛ wɛ é ɖe ɔ́ zɔ́n, bɔ azinzɔnnɔ lɛ́ɛ nɔ ba ná ɖó alɔ wǔtu tɔn, bónú azɔn yětɔn ná gbɔ. 11Yɛ nyanya lɛ́ɛ mɔ ɛ hweɖěbǔnu ɔ́, yě nɔ́ ɖe kɔ́ n'i, bó nɔ́ sú xó ɖɔ: “Mawu ví wɛ a nyǐ!” 12Lo ɔ́, Jezu nɔ gbɛ́ nú yě kpódó adǎn kpó ɖɔ yě ma ɖɔ mɛ e émí nyí ɔ́ nú mɛɖé se ó.

Jezu cyán mɛsɛ́dó wěwe lɛ́ɛ

(Matíe 10.1-4; Luki 6.12-16)

13Jezu ka xá só jí, bó ylɔ́ mɛ e jló e lɛ́ɛ, bɔ yě yi gɔ̌n tɔn; 14bɔ é cyán mɛ wěwe ɖo yě mɛ bónú yě ná nɔ kpɔ́ xá ɛ, nú é ná nɔ sɛ́ yě dó Mawuxó jlá gbé, 15bó ná ná acɛ yě, nú yě ná dó nya yɛ nyanya lɛ́ɛ ná. 16Mɛ wěwe e Jezu cyán lɛ́ɛ ɖíe: Sinmɔ́ɔ e é sun nyǐ ɖɔ Piyɛ́ɛ é, 17Jaki kpódó nɔví tɔn Jǎan kpó, Zebeɖée ví wɛ yě nyǐ, bɔ (Jezu sun nyǐ yě ɖɔ Boanɛɛgɛ́si, tínmɛ tɔn wɛ nyí “xɛbyosoví.”) 18Andlé, Filípu, Baatelemíi, Matíe, Tɔmáa, Jaki Alufée ví ɔ́, Tadée, Sinmɔ́ɔ hunjɛdótojítɔ́ ɔ́ , 19kpódó Judási Isikaliɔ́ti e wá jó Jezu ɔ́ kpó.

Jezu sín mɛ lɛ́ɛ ja kplákplá ɛ gbé

20Jezu ka wá xwé gbe, bɔ mɛ gěgé lɛ́ wá kplé ɖo fínɛ́, káká bɔ é kpódó ahwanvú tɔn lɛ́ɛ kpán sɔ́ mɔ tɛn ná ɖu nǔ ǎ. 21Ée mɛ tɔn lɛ́ɛ se mɔ̌ ɔ́, yě wá bó ná kplá ɛ, ɖó yě ɖo ɖiɖɔ wɛ ɖɔ ta tɔn mɛ kún sɔ́ sɔgbe ó.

Jezu ɖɔ xó dó hwɛ e è dǒ e ɔ́ wú

(Matíe 12.22-32; Luki 11.14-23; 12.10)

22 Sɛ́nkplɔ́nmɛtɔ́ e gosín Jeluzalɛ́mu wá lɛ́ɛ nɔ́ ɖo ɖiɖɔ wɛ ɖɔ: “Bɛluzebúlu (yɛ nyanya lɛ́ɛ xɔ́sú) wɛ ɖo jǐ tɔn; yɛ nyanya lɛ́ɛ xɔ́sú énɛ́ ɔ́ sín hlɔ̌nhlɔ́n wɛ é nɔ́ dó nya yɛ nyanya lɛ́ɛ ná.” 23Jezu ka ylɔ́ yě wá, bó dó lǒ dó ɖɔ xó nú yě ɖɔ: “Nɛ̌ Satáan ka sixú nya é ɖésúnɔ gbɔn? 24Axɔ́súɖuto ɖé ma ɖó gbe kpɔ́ ǎ ɔ́, to énɛ́ ɔ́ sixú jínjɔ́n ayǐ ǎ. 25Ényí xwé ɖé tíin, bónú mɛ e ɖ'é mɛ lɛ́ɛ sín gbe ma ɖo kpɔ́ ǎ ɔ́, xwé énɛ́ ɔ́, gba wɛ é nɔ gba. 26Ényí Satáan gbɛ́ wǎn nú éɖée ɔ́, axɔ́súɖuto tɔn ná klán, bó ná sixú nɔ te ǎ, bɔ acɛkpikpa tɔn vɔ nɛ́.

27“Mɛ ɖé sixú yi súnnu glegbenu ɖé xwé, bó fɔ nǔ tɔn lɛ́ɛ ma tó blá ɛ hwɛ̌ ǎ; lo ɔ́, ényí é blá ɛ ɔ́, é ná fɔ nǔ e ɖo xwé tɔn gbe lɛ́ɛ é bǐ.

28“Ma ɖɔ nǔgbó nú mi: hwɛ e gbɛtɔ́ lɛ́ɛ kó sixú hu ɔ́ kpódó nu e yě kó sixú nylá dó Mawu wú ɔ́ kpó bǐ wɛ Mawu ná sɔ́ kɛ yě. 29 Mɛ ɖěbǔ ka nylá nu dó Yɛsinsɛn wú ɔ́, è ɖo hwɛ ɖé ná sɔ́ kɛ ɛ wɛ ǎ; ɖó hwɛ e è ma ná sɔ́ kɛ mɛ gbeɖé ǎ ɔ́ wɛ é hu.”

30Jezu ɖɔ mɔ̌ ɖó yě ɖɔ n'i ɖɔ yɛ nyanya wɛ ɖo jǐ tɔn.

Jezu sín nɔ kpódó Jezu sín nɔví lɛ́ɛ kpó

(Matíe 12.46-50; Luki 8.19-21)

31Jezu sín nɔví lɛ́ɛ kpódó nɔ yětɔn kpán cí hɔnto, lobo sɛ́ mɛ dó ɖɔ yě ní yi ylɔ́ Jezu wá nú émí. 32Mɛ gěgé ka ɖo ayǐjínjɔ́n lɛ́ lɛ̌ dó e, bɔ è wá ɖɔ n'i ɖɔ: “Kpɔ́n! Nɔ towe kpódó nɔví towe lɛ́ɛ kpó ɖo hɔnto, bó ɖo biba we wɛ.” 33É ka yí gbe nú yě ɖɔ: “Mɛ̌ ká nyí nɔ ce? Mɛ̌ ká nyí nɔví ce lɛ́ɛ?” 34Bɔ é nyi nukún kpɔ́n mɛ e ɖo ayǐjínjɔ́n lɛ́ lɛ̌ dó e lɛ́ɛ, bó ɖɔ: “Nɔ ce kpódó nɔví ce lɛ́ɛ kpán ɖíe. 35Mɛ ɖěbǔ e ko sixú bló jlǒ Mawu tɔn ɔ́, mɛ énɛ́ ɔ́ wɛ nyí nɔví ce súnnu, bó nyí nɔví ce nyɔ̌nu, bó nyí nɔ ce.”

Currently Selected:

Maki 3: Fon13

Highlight

Copy