Maki 4

Jezu dó lǒ dó nǔkúndótɔ́ ɖé wú

(Matíe 13.1-9; Luki 8.4-8)

1 Jezu lɛ́ wá jɛ nǔ kplɔ́n mɛ lɛ́ɛ jí ɖo Galilée sín tɔ ɔ́ tó. Mɛ e kplé dó e lɛ́ɛ sukpɔ́ káká, bɔ é gbɔ bó byɔ́ tɔjíhún ɖé mɛ, ɖo tɔ ɔ́ jí, bó jínjɔ́n ayǐ; mɛ lɛ́ɛ bǐ sésé ká ɖo agě jǐ. 2É dó lǒ dó kplɔ́n nǔ gěgé yě. Hwenu e é ka ɖo nǔ kplɔ́n yě wɛ ɔ́, é ɖɔ nú yě ɖɔ: 3“Mi ɖótó! Glesi ɖé tɔ́n gbe ɖokpó, bó yi nǔkún hú gbé. 4Hwenu e é ɖo nǔkún ɔ́ hú gbɔn gle ɔ́ mɛ wɛ ɔ́, nǔkún lɛ́ɛ ɖě jɛ ali jí, bɔ xɛ lɛ́ɛ wá cyán ɖu. 5Đě wá jɛ awǐnnyakan mɛ fí e kɔ́ gěgé ɖé ma ɖe ǎ é; énɛ́ lɛ́ɛ yá wǔ wú, ɖó kɔ́ sukpɔ́ ɖo fínɛ́ ǎ. 6Lo ɔ́, ée hwesivɔ́ wá hun ɔ́, yě fyɔ́, lobo xú; ɖó ɖɔ yětɔn yi do ǎ. 7Đěvo lɛ́ jɛ wundonu, bɔ wun lɛ́ɛ wú, bó vun blá yě, bɔ yě sɔ́ sɛ́n ǎ. 8Đěvo lɛ́ jɛ ayǐkúngban ɖagbe jí bó wú, bó hwán, bɔ nǔkún ɖokpó ná mɔ̌hunkɔtɔn donu gban (30), ɖě ná mɔ̌hunkɔtɔn donu kanɖé ko (60), ɖě ná mɔ̌hunkɔtɔn donu kanwe ko (100).” 9Jezu lɛ́ ɖɔ nú yě ɖɔ: “Mɛ e ɖó tó bó ná dó se nǔ ɔ́ ní ɖótó bó se.”

Étɛ́wú Jezu ka nɔ dó lǒ?

(Matíe 13.10-17; Luki 8.9-10)

10Hwenu e Jezu wá ɖo vo ɔ́, mɛ e lɛ́ lɛ̌ dó e lɛ́ɛ kpódó ahwanvú tɔn lɛ́ɛ kpó ɖɔ é ní tín lǒ lɛ́ɛ mɛ nú émí. 11É ka ɖɔ nú yě ɖɔ: “Axɔ́súɖuɖu Mawu tɔn sín nǔbúdo lɛ́ɛ ɔ́, midɛɛ lɛ́ɛ wɛ Mawu hun xlɛ́, amɔ̌, mɛ ɖě lɛ́ɛ ɔ́, lǒ mɛ wɛ è nǎ ɖɔ bǐ dó nú yě. 12 Énɛ́ ɔ́,

‘Yě ná mɔ, cóbó ka ná dán ɛ;

yě ná se, yě ka ná mɔ nǔ jɛ mɛ ǎ.

Đó yě táá wá lɛ́ kɔ sín hwɛ yětɔn lɛ́ɛ gúdo,

nú Mawu ná wá sɔ́ hwɛ yětɔn lɛ́ɛ kɛ yě.’ ”

Jezu tín nǔkúndótɔ́ sín lǒ ɔ́ mɛ nú ahwanvú tɔn lɛ́ɛ

(Matíe 13.18-23; Luki 8.11-15)

13Jezu ɖɔ nú yě ɖɔ: “Ényí mi ma mɔ nukúnnú jɛ lǒ élɔ́ mɛ din ǎ ɔ́, nɛ̌ wɛ mi ka sixú mɔ nukúnnú jɛ lǒ lɛ́ɛ bǐ mɛ gbɔn? 14Nǔkún e hú wɛ glesi ɔ́ ɖe ɔ́ wɛ nyí Mawuxó ɔ́. 15Ali e jí nǔkún lɛ́ɛ jɛ ɔ́ wɛ nyí mɛ e nɔ se Mawuxó ɔ́, bɔ tlóló ɔ́, Satáan nɔ wá ɖe sín ayi yětɔn mɛ lɛ́ɛ. 16Mɔ̌ ɖokpó ɔ́, awǐnnyakan e mɛ nǔkún lɛ́ɛ jɛ ɔ́ wɛ nyí mɛ e nɔ se xó ɔ́, bó nɔ yá wǔ yí kpódó awǎjijɛ kpó lɛ́ɛ, 17lo ɔ́, Mawuxó ɔ́ nɔ́ dó ɖɔ do ɖo ayi yětɔn mɛ ǎ, bɔ hwenu e è nɔ wá ɖo tagba dó nú mɛ wɛ, bó nɔ́ ɖo mɛ ɖe dó wɛ, ɖó Mawuxó ɔ́ wútu ɔ́, nǔɖiɖi yětɔn nɔ́ jɛ ayǐ. 18Wundonu fí e nǔkún lɛ́ɛ jɛ ɔ́, wɛ nyí yě mɛ e nɔ se Mawuxó ɔ́, 19bɔ gbɛmɛ fí sín tagba lɛ́ɛ, dɔkun gbɛmɛ fí tɔn lɛ́ɛ sín mɛdindɔn kpódó nukúnkɛn alɔkpa alɔkpa lɛ́ɛ kpó nɔ́ wá vun blá, bó nɔ́ hu xó ɔ́ ɖo ayi yětɔn mɛ, bɔ é nɔ gɔn sínsɛ́n é. 20Ayǐkúngban ɖagbe e jí nǔkún lɛ́ɛ jɛ ɔ́ wɛ nyí mɛ e nɔ se Mawuxó ɔ́, bó nɔ́ hɛn dó ayi mɛ, bɔ é nɔ wa azɔ̌ ɖo gbɛzán yětɔn mɛ, bɔ nǔɖiɖi yětɔn nɔ́ gba kún lɛ́ɛ; ényí nǔkún ɖé wɛ yě nyǐ ɔ́, ɖě ná ná sínsɛ́n mɔ̌hunkɔtɔn donu gban (30), ɖě ná ná mɔ̌hunkɔtɔn donu kanɖé ko (60), bɔ ɖěvo ná ná mɔ̌hunkɔtɔn donu kanwe ko (100) mɔ̌.”

Jezu dó lǒ dó zogbɛ́n wú

(Luki 8.16-18)

21 Jezu lɛ́ wá ɖɔ nú yě ɖɔ: “È tá zogbɛ́n ɔ́, zɛ̌n glɔ́ abǐ akánma glɔ́ wɛ è nɔ sɔ́ dó a? É má nyí nǔ ta aga wɛ è nɔ sɔ́ ɖó ǎ cé? 22 Đó nǔ ɖěbǔ ɖo nǔglɔ́, bó ná gɔn agbawungba jɛ ǎ. Nǔ ɖěbǔ ka nɔ wi mɛ káká ɔ́, é ná wá jɛ wěxo. 23Mɛ e ɖó tó bó ná dó se nǔ ɔ́ ní ɖótó bó se.”

24 Jezu lɛ́ ɖɔ nú yě ɖɔ: “Mi hɛn ayi dó nǔ e se wɛ mi ɖe lɛ́ɛ wú, ɖó nǔjlɛ́nú e mi nɔ dó jlɛ́ nǔ ná ɔ́ wɛ è nǎ dó jlɛ́ nǔ nú mi, bó ná lɛ́ xú nú mi. 25 Đó, mɛ e ɖó nǔ ɔ́, Mawu ná lɛ́ ná ɛ, bɔ é ná sukpɔ́ d'é jí; mɛ e ma ka ɖó nǔɖé ǎ ɔ́, Mawu ná lɛ́ yí kpɛ e é ɖó ɔ́ sín así tɔn.”

Jezu dó lǒ dó lě e nǔkún nɔ́ su gbɔn é wú

26Jezu ka lɛ́ yí xó, bó ɖɔ: “Axɔ́súɖuto Mawu tɔn cí nya e dó nǔkún ɖo gle mɛ ɔ́ ɖɔhun. 27Zǎn kú ɔ́, nya énɛ́ ɔ́ nɔ́ dɔ́ amlɔ; ayǐ hɔ́n ɔ́, é nɔ́ fɔ́n; lě e é ka nyí gbɔn káká bɔ nǔkún ɔ́ wú bó ɖo susu wɛ ɔ́, é mɔ do ná ǎ. 28Ayǐkúngban ɔ́ ɖésú wɛ nɔ́ ná jinukún; ama ɔ́ wɛ nɔ́ zɔ́n jɛ nukɔn; énɛ́ gúdo ɔ́, é nɔ́ gba sɛ́, bó nɔ́ fɔ vǐ hwɛ̌ cóbó nɔ́ wá ɖó kwín. 29 Jinukún ka wá su yiya ɔ́, glenɔ ɔ́ nɔ́ bɔ nǔkún-yanú nyi mɛ, ɖó nǔkún-yahwenu su.”

Jezu dó lǒ dó atínkwín e wínní hú ɖě lɛ́ɛ bǐ é wú

(Matíe 13.31-32, 34; Luki 13.18-19)

30Jezu ka lɛ́ ɖɔ: “Étɛ́wú mǐ ná jlɛ́ axɔ́súɖuto Mawu tɔn dó? Abǐ lǒ tɛ́ wɛ mǐ ná dó bó ná dó ɖɔ xó d'é wú? 31Axɔ́súɖuto Mawu tɔn ɔ́ cí atínkwín e wínní hú ɖě lɛ́ɛ bǐ ɔ́ ɖɔhun. 32Ényí è ka dó, bónú é wá wú ɔ́, atín tɔn nɔ́ wá yi jǐ hú atín ɖě lɛ́ɛ bǐ. É nɔ́ zɛ ala ɖaxó ɖaxó lɛ́ɛ, káká bɔ xɛ lɛ́ɛ nɔ́ wa adɔ̌ nyi ama tɔn lɛ́ɛ mɛ.”

33Lǒ mɔ̌hunkɔtɔn tɛnmɛ tɛnmɛ wɛ Jezu nɔ dó bó nɔ́ dó jlá Mawuxó ɔ́ yě, lě e yě sixú mɔ nukúnnú jɛ mɛ gbɔn é. 34É ɖɔ xó ɖěbǔ nú yě ma gɔn lǒ dó ǎ; lo ɔ́, nú é kpódó ahwanvú tɔn lɛ́ɛ kpó wá ɖo vo ɔ́, é nɔ́ tín lǒ lɛ́ɛ bǐ mɛ nú yě.

Jezu hwíhwɛ́ jɔhɔn ɖaxó ɖé

(Matíe 8.23-27; Luki 8.22-25)

35Gbe nɛ́ gbe ɖokpó ɔ́, ée gbadanu wá su ɔ́, Jezu ɖɔ nú ahwanvú tɔn lɛ́ɛ ɖɔ: “Mi nú mǐ ná yi agě ɖě ɔ́ jǐ.” 36Bɔ ahwanvú tɔn lɛ́ɛ byɔ́ tɔjíhún e mɛ é ɖésúnɔ ko ɖe ɖ'ayǐ é mɛ, bɔ yě jó ahwan ɔ́ dó, bó kun i ɖidó. Tɔjíhún ɖěvo lɛ́ɛ kpó e kpó ka ɖidó. 37Tlóló kpowun ɔ́, jɔhɔn ɖaxó ɖé jɛ́n jɛ nyinyi jí, bó nɔ́ xo sin dó tɔjíhún ɔ́ mɛ, káká bɔ tɔjíhún ɔ́ jɛ gǐgɔ́ jí. 38Jezu ka zé ta ɖó kɔɖónú ɖé jí ɖo gǔdo, bó ɖo amlɔ dɔ́ wɛ. Ahwanvú tɔn lɛ́ɛ ká yi fɔ́n ɛ, bó ɖɔ n'i ɖɔ: “Mɛ̌si, mǐ ɖo tɔ ná kú wɛ, é ɖɔ nǔɖé nú we ǎ cé?” 39Jezu ka fɔ́n, bó ɖe gbe dó jɔhɔn ɔ́, bó ɖɔ nú xu ɔ́ ɖɔ ní hwíhwɛ́, bɔ jɔhɔn ɔ́ xwɛ, bɔ fí bǐ cí tóó. 40Bɔ é wá kanbyɔ́ ahwanvú tɔn lɛ́ɛ ɖɔ: “Aniwú mi ka ɖo xɛsi ɖi wɛ sɔ mɔ̌? Mi ɖó nǔɖiɖi ǎ cé?” 41Xɛsi ɖaxó ɖé jɛ ahwanvú tɔn lɛ́ɛ jí, bɔ yě jɛ kinkanbyɔ́ yěɖée jí ɖɔ: “Mɛ nǎhún wɛ ká nyí nya élɔ́, bɔ jɔhɔn kpódó xu kpó nɔ́ se gbe n'i?”

Currently Selected:

Maki 4: Fon13

Highlight

Copy