Luki 1
1
Nǔ e wú è wlǎn wěma élɔ́ é
1Teofílu!
Mɛ gěgé tɛ́nkpɔ́n bó kpi nǔ e jɛ ɖo tɛ́ntin mǐtɔn lɛ́ɛ é sín tan dó wěma mɛ. 2Yě ɖɔ nǔ lɛ́ɛ lě e mawuxójlátɔ́ e mɔ nǔ e jɛ lɛ́ɛ sín bǐbɛ́mɛ ɔ́ ɖɔ nú mǐ gbɔn é. 3Énɛ́ wú wɛ un yi ba do nú nǔ énɛ́ lɛ́ɛ bǐ céɖécéɖé sín bǐbɛ́mɛ yětɔn, bó nywɛ́ ɖɔ má wlán nǔ e jɛ nɛ́ lɛ́ɛ ɖě jɛ ɖě gúdo sɛ́ dó we, 4bónú a nǎ dó tunwun nǔgbó e ɖo nǔ e è kplɔ́n we lɛ́ɛ mɛ é.
Wɛnsagun Mawu tɔn wá dó wɛn Zakalíi
5 Hwenu e Elódu ɖo axɔ́sú ɖu wɛ ɖo Jwifu lɛ́ɛ sín tomɛ ɔ́, vɔ̌sánú-xwlémawutɔ́ ɖokpó ɖo fínɛ́, bɔ è nɔ ylɔ́ ɛ ɖɔ Zakalíi, bɔ é ɖo vɔ̌sánú-xwlémawutɔ́ Abiya sín gbɛ̌ta mɛ. Asi tɔn nɔ nyí Elizabɛ́ti, bó jɔ ɖo vɔ̌sánú-xwlémawutɔ́ ɖaxó Aalɔ́ɔn sín kúnkan mɛ. 6Yě mɛ we lɛ́ɛ bǐ wɛ nɔ wa jlǒ Mawu tɔn, bó nɔ́ nyi Aklúnɔ sɛ́n lɛ́ɛ, bɔ nǔ bǐ vɔ ɖ'é wú. 7Yě ká ji vǐ ǎ, ɖó wɛnsinɔ wɛ nú Elizabɛ́ti, bɔ yě mɛ we lɛ́ɛ bǐ sín xwe ka ko sɛ yi.
8É wá su gbe ɖokpó, bɔ Zakalíi ɖo vɔ̌sánú-xwlémawutɔ́ sín azɔ̌ tɔn lɛ́ɛ wa wɛ ɖo Mawu nukɔn, ɖó gbɛ̌ta e mɛ é ɖe ɔ́ jí wɛ sinsɛnxɔmɛzɔ́ jɛ hwe énɛ́ nu. 9È ka wá nyi akɔ, bó zé Zakalíi lě e walɔ vɔ̌sánú-xwlémawutɔ́ lɛ́ɛ tɔn zɔ́n gbɔn é, nú é ná byɔ́ tɛn mímɛ́ Aklúnɔ tɔn mɛ, bó ná dó zǎlínkpɔ́n zo, bó xwlé Mawu. 10Togun ɔ́ bǐ kplé ɖo hɛnkɛ́n, bó ɖo ɖɛ xo wɛ hwenu e Zakalíi ɖo zǎlínkpɔ́n dó zo wɛ é. 11Wɛnsagun Mawu tɔn ɖokpó ká tɔ́n dó Zakalíi jí, bó ɖo te ɖo ɖisíxwé nú vɔ̌sákpe e jí è nɔ dó zǎlínkpɔ́n zo ɖe é. 12Ée Zakalíi mɔ ɛ lě ɔ́, ayi tɔn bǐ gbadó, bɔ xɛsi jɛ jǐ tɔn. 13Wɛnsagun ɔ́ ka ɖɔ n'i ɖɔ: “Zakalíi, ma ɖi xɛsi ó; ɖó Mawu yí gbe nú nǔ e a byɔ́ ɛ é. Asi towe Elizabɛ́ti ná ji vǐ súnnu ɖokpó nú we, bɔ a nǎ sun nyǐ i ɖɔ Jǎan. 14É ná víví nú we, bɔ a nǎ j'awǎ tɔn, bɔ xomɛ ná hun mɛ gěgé ɖó jiji tɔn wú. 15 Đó é ná nyí gbɛtɔ́ nukúnɖéjí ɖokpó ɖo Aklúnɔ nukún mɛ. Vɛ̌ɛn kpódó ahan syɛ́nsyɛ́n kpó ɖěbǔ ná jɛ nu tɔn ǎ. Yɛsinsɛn ná kó gɔ́ ayi mɛ n'i sín nɔ tɔn xomɛ. 16É ná bló bɔ Izlayɛ́li ví gěgé ná lɛ́ kɔ wá Aklúnɔ Mawu yětɔn gɔ́n. 17 Mawu ná ná ɛ Yɛ e é ná Elíi é, bó ná lɛ́ ná ɛ hlɔ̌nhlɔ́n e é ná Elíi é, bɔ é ná wá jɛ nukɔn nú Aklúnɔ bó ná dó hwɛ gbɔ nú tɔ́ kpódó vǐ kpó. É ná bló bɔ mɛ e ma nɔ se tónú nú Mawu ǎ lɛ́ɛ ná jɛ jlǒ Mawu tɔn wa jí, bó ná dó sixú bló togun Mawu tɔn ɖó ɖ'ayǐ nú Aklúnɔ.”
18Zakalíi ka kanbyɔ́ wɛnsagun ɔ́ ɖɔ: “Ani wɛ ná xlɛ́ mì ɖɔ nǔ mɔ̌hunkɔ ná jɛ? Nyɛ ɖíe kó kpo e, bɔ asi ce lɔ sín xwe ka ko sɛ yi.” 19 Wɛnsagun ɔ́ yí gbe n'i ɖɔ: “Nyɛ wɛ nyí Gabliyɛ́li, bó nɔ́ nɔ te ɖo Mawu nukɔn. É wɛ sɛ́ mì dó, nú má ɖɔ xó nú we, lobo dó Wɛn Ɖagbe énɛ́ we. 20Xó e un ɖɔ nú we ɔ́ ná jɛ ɖo hwe tɔn nu. Lo ɔ́, ɖěe a ma ɖi nǔ nú mì ǎ ɔ́, ɖɛ̌ towe ná kú, bɔ xó ɖiɖɔ ná gló we, káká jɛ hwenu e nǔ lɛ́ɛ bǐ ná jɛ dó é.”
21Hwenu e nǔ énɛ́ lɛ́ɛ ɖo jijɛ wɛ ɔ́, togun ɔ́ ka ɖo te kpɔ́n Zakalíi, bɔ lě e é lin sɔ ɖo sinsɛnxɔ ɔ́ mɛ ɔ́ nyí nǔ, bó hu ado nú yě. 22Ée é wá tɔ́n ɔ́, é sɔ́ sixú ɖɔ xó nú yě ǎ, bɔ yě mɔ nukúnnú jɛ wú ɖɔ nǔ wɛ é mɔ ɖo sinsɛnxɔ ɔ́ mɛ, bɔ é gbɔ bó nɔ́ sɔ́ alɔ dó ɖɔ xó nú yě, lobɔ ɖɛ̌ tɔn nɔ kúkú mɔ̌.
23Ée azǎn nabí e Zakalíi ɖó ná wa azɔ̌ ɔ́ ná ɖo sinsɛnxɔ ɔ́ mɛ ɔ́ fó ɔ́, é yi xwé. 24Azǎn ɖé jɛ ǎ, bɔ asi tɔn Elizabɛ́ti mɔ xo; é sɔ́ nɔ́ tɔ́n sín xwé tɔn gbe ǎ káká xɔ sun atɔ́ɔ́n, bó nɔ́ ɖɔ jí: 25“Aklúnɔ sín nǔwiwa ɖíe; é lɛ́ kɔ kpɔ́n mì, lobo ɖe winnyá nú mì ɖo gbɛtɔ́ lɛ́ɛ nukɔn.”
Wɛnsagun Gabliyɛ́li wá dó wɛn Mali
26-27 Ée Elizabɛ́ti sín adɔgo ɖó sun ayizɛ́n ɔ́, Mawu sɛ́ wɛnsagun Gabliyɛ́li dó Galilée sín toxo e è nɔ ylɔ́ ɖɔ Nazalɛ́ti é mɛ, nú é ná yi dó wɛn ɖyɔ̌vǐ ɖé. Đyɔ̌vǐ énɛ́ ɔ́, è nɔ ylɔ́ ɛ ɖɔ Mali, bɔ é nyí asixɔ́ntɔn nú Jozɛ́fu e jɔ ɖo axɔ́sú Davídi hɛ́nnu mɛ é. 28Wɛnsagun ɔ́ yi Mali gɔ́n, ɖo xwé tɔn gbe, bó dó gbe e ɖɔ: “Mali, fífá ní nɔ kpɔ́ xá we. Mawu jɔwǔ we; Aklúnɔ ɖo kpɔ́ xá we.”
29Ée Mali se mɔ̌ ɔ́, ayi tɔn gbadó, bɔ é ɖo kinkanbyɔ́ éɖée wɛ ɖɔ: “Gbedómɛ alɔkpa tɛ́ ká ɖíe?” 30Wɛnsagun ɔ́ ká ɖɔ n'i ɖɔ: “Mali, ma ɖi xɛsi ó; ɖó Mawu jɔwǔ we; 31 bo tunwun ɖɔ a nǎ mɔ xo, bó ná ji vǐ súnnu ɖokpó, bó ná sun nyǐ i ɖɔ Jezu. 32 É ná nyí mɛ nukúnɖéjí ɖé, bɔ è nǎ nɔ́ ylɔ́ ɛ ɖɔ Mawu Ajalɔ̌nlɔn ví. Aklúnɔ Mawu ná sɔ́ ɛ ɖó tɔ́ tɔn Davídi sín axɔ́súzinkpo jí. 33É ná ɖu axɔ́sú ɖo Izlayɛ́li ví lɛ́ɛ nu káká sɔ́yi, bɔ axɔ́súɖuɖu tɔn ná vɔ gbeɖé ǎ.”
34Mali ká kanbyɔ́ wɛnsagun ɔ́ ɖɔ: “Nɛ̌ wɛ nǔ ká sixú nyí mɔ̌ gbɔn? Nyi ɖíe ma tunwun súnnu kpɔ́n ǎ e.”
35Wɛnsagun ɔ́ ká yí gbe n'i ɖɔ: “Yɛsinsɛn ná wá jǐ towe, bó ná ɖe hlɔ̌nhlɔ́n Mawu tɔn xlɛ́; énɛ́ ɔ́ wú wɛ vǐ e a nǎ ji ɔ́, è nǎ nɔ́ ylɔ́ ɛ ɖɔ mɛɖeɖóvo Mawu tɔn, bó ná nɔ́ ylɔ́ ɛ ɖɔ Mawu ví. 36Éɖíe! Elizabɛ́ti hɛ̌nnumɔ towe e nyí wɛnsinɔ ɔ́ lɔmɔ̌ mɔ xo ɖo kpikpo tɔn mɛ, bɔ adɔgo tɔn ko ɖó sun ayizɛ́n. 37 Đó nǔ ɖěbǔ gló Mawu ǎ.” 38Mali yí gbe ɖɔ: “Aklúnɔ sín mɛsɛntɔ́ wɛ un nyí; lě e a ɖɔ gbɔn ɔ́, ní bó nyí mɔ̌ nú mì.” Wɛnsagun ɔ́ ká gosín gɔ̌n tɔn.
Mali yi ba dadá tɔn Elizabɛ́ti kpɔ́n
39Azǎn ɖé jɛ ǎ, bɔ Mali jɛ ali, bó hwlɛ́ndó, bó yi Judáa sín toxo ɖé mɛ, ɖo sókan mɛ. 40É byɔ́ Zakalíi xwé gbe, bó dó gbe Elizabɛ́ti. 41Ée Elizabɛ́ti se gbedómɛ Mali tɔn lě ɔ́, vǐ e ɖo xo tɔn mɛ é dán wǔ, bɔ Yɛsinsɛn gɔ́ ayi mɛ nú Elizabɛ́ti, 42bɔ é zé gbe yi jǐ, bó ɖɔ: “Mawu xo ɖɛ dó jǐ we hú nyɔ̌nu lɛ́ɛ bǐ, bó xo ɖɛ dó vǐ e ɖo xo towe mɛ é lɔmɔ̌ jí. 43Étɛ́ un ka nyí, bɔ Aklúnɔ ce sín nɔ wá ba jǒnɔ mì! 44Ée un se gbedómɛ towe lě ɔ́, é víví nú vǐ e ɖo xo ce mɛ é, bɔ é dán wǔ. 45Nǔ nyɔ́ nú we, ɖó a ɖi nǔ ɖɔ akpá e Aklúnɔ dó nú émí ɔ́ ná jɛ.”
Mali ji han mlá Mawu
46 Mali ɖɔ: “Un ɖo susu kpa nú Aklúnɔ ce wɛ,
47bɔ xomɛ hun mì tlala dó Mawu Mɛhwlɛ́ngántɔ́ ce wu;
48 ɖó é nyi kɔ kpɔ́n nyɛ mɛsɛntɔ́ tɔn masɔatɛ́n
ɔ́. Bɛ́ sín din ɔ́, gbɛtɔ́ lɛ́ɛ bǐ ná nɔ́ ylɔ́ mì ɖɔ nǔnyɔ́nánɔ,
49ɖó Nǔbǐwúkpétɔ́ ɔ́ wa nǔ ɖaxó ɖaxó nú mì.
Nyǐkɔ tɔn ɔ́, nǔ mímɛ́ wɛ é nyí.
50É ná kú nǔbláwǔ nú mɛ e nɔ sí i lɛ́ɛ bǐ hwebǐnu.
51É jlɛ́ nǔ ɖaxó ɖaxó lɛ́ɛ; é gba goyítɔ́ lɛ́ɛ dó.
52 É ɖe axɔ́sú lɛ́ɛ sín zinkpo yětɔn lɛ́ɛ jí,
bó sɔ́ mɛ e nɔ sɔ́ yěɖée hwe lɛ́ɛ su.
53É ná nǔ bǐ mɛ e xovɛ́ sin lɛ́ɛ,
bó nya dɔkunnɔ lɛ́ɛ asígbá alɔgbá.
54-55 É wá dó alɔ togun tɔn
Izlayɛ́li mɛsɛntɔ́ tɔn;
é kú nǔbláwǔ nú Ablaxámu
kpódó vǐ tɔn lɛ́ɛ kpó káká sɔ́yi,
lě e é kó dó akpá tɔn nú tɔ́gbó mǐtɔn lɛ́ɛ gbɔn é.”
56Mali xɔ sun atɔn mɔ̌ ɖo Elizabɛ́ti gɔ́n, lobo wá yi xwé.
Elizabɛ́ti ji Jǎan Yɛhwesinlɛnúmɛtɔ́
57Hwenu e Elizabɛ́ti ɖó ná ji vǐ dó é wá su, bɔ é ji vǐ súnnu ɖokpó. 58Mɛ e ɖo xwé tɔn kpá lɛ́ɛ kpódó hɛ̌nnumɔ tɔn lɛ́ɛ kpán se ɖɔ Aklúnɔ ɖe nǔbláwǔkúnúmɛ tɔn xlɛ́ ɛ, bɔ yě j'awǎ xá ɛ. 59 Azǎn tɔn tántɔn gbe ɔ́, yě wá ja ada gbo nú vǐ ɔ́ gbé, bó jló ná sun nyǐ i ɖɔ Zakalíi tɔ́ ɔ́ ɖɔhun. 60Nɔ ɔ́ ká kɛ nu, bó ɖɔ: “Éeǒ! Jǎan wɛ é ɖó ná nyí.” 61Yě ká ɖɔ n'i ɖɔ: “Mɛ ɖé má ká nyí mɔ̌ ɖo hɛ̌n ɔ́ nu nɛ́!”
62Yě sɔ́ alɔ dó ɖɔ xó nú tɔ́ tɔn, bó kanbyɔ́ ɛ ɖɔ nɛ̌ é ká jló ɖɔ vǐ ɔ́ ní nyí a jí, 63bɔ é byɔ́ nǔ e jí è nɔ wlán nǔ dó é ɖokpó, bó wlán ɖɔ: “Jǎan wɛ nyǐkɔ tɔn nyí.” Bɔ é kpácá yě bǐ. 64Azɔn ɖokpó ɔ́, ɖɛ̌ tɔn tún kan, bɔ é hun nu, bó jɛ xó ɖɔ jí, bó jɛ susu kpa nú Mawu jí. 65Xɛsi jɛ mɛ e ɖo xwé yětɔn kpá lɛ́ɛ bǐ jí. Mɛ bǐ nɔ́ ɖo nǔ e jɛ nɛ́ lɛ́ɛ sín xó ɖɔ wɛ ɖo Judée toxo e ɖo sókan ɔ́ mɛ lɛ́ɛ bǐ mɛ. 66Mɛ e se lɛ́ɛ ká nɔ́ hɛn dó ayi mɛ, bó nɔ́ ɖo ɖiɖɔ wɛ ɖɔ: “Ani nyí gbé wɛ vǐ élɔ́ ká ja?” Nǔgbó nǔgbó ɔ́, Aklúnɔ sín hlɔ̌nhlɔ́n ɖo kpɔ́ xá ɛ.
Zakalíi kpa susu nú Mawu
67Yɛsinsɛn gɔ́ ayi mɛ nú tɔ́ tɔn Zakalíi, bɔ é jɛ Mawuxó ɖɔ jí ɖɔ:
68“È nǐ kpa susu nú Aklúnɔ, Mawu Izlayɛ́li tɔn, ɖó é wá ba togun tɔn kpɔ́n, lobo hwlɛ́n ɛ gán.
69É sɛ́ Mɛhwlɛ́ngántɔ́ hlɔ̌nhlɔ́nnɔ ɖé dó mǐ. Mɛhwlɛ́ngántɔ́ énɛ́ jɔ ɖo mɛsɛntɔ́ tɔn axɔ́sú Davídi hɛ́nnu mɛ.
70Nǔ e é ko ɖɔ ɖ'ayǐ xóxó, gbɔn gbeyíɖɔ mímɛ́ tɔn lɛ́ɛ jí é nɛ́.
71É dó akpá, ɖɔ émí ná hwlɛ́n mǐ gán ɖo kɛntɔ́ mǐtɔn lɛ́ɛ sí, bó ná ɖe mǐ sín mɛ e gbɛ́ wǎn nú mǐ lɛ́ɛ sín acɛ mɛ.
72É ná ɖe nǔbláwǔkúnúmɛ tɔn xlɛ́ tɔ́gbó mǐtɔn lɛ́ɛ, bó ná flín akɔjijɛ tɔn ma ɖó blɔ̌ ɖo wǔ ɔ́.
73Đó Mawu dó akpá nú tɔ́gbó mǐtɔn Ablaxámu,
74ɖɔ émí ná bló, bɔ mǐ ná gló kɛntɔ́ mǐtɔn lɛ́ɛ, bó ná gbó adɔ, bó wa azɔ̌ nú émí;
75bɔ mǐ ná ɖó ayi mímɛ́ kpódó ayijlɔ́jlɔ́ kpán, ɖo nukɔn émítɔn, káká yi jɛ kúzán gbe mǐtɔn.
76 Vǐ ce, hwɛ ɔ́, è nǎ ylɔ́ we ɖɔ gbeyíɖɔ Mawu Ajalɔ̌nlɔn tɔn, ɖó a nǎ jɛ nukɔn nú Aklúnɔ, bó ná bló ali tɔn lɛ́ɛ ɖó n'i.
77É ná sɔ́ togun tɔn sín hwɛ lɛ́ɛ kɛ ɛ, bó ná ɖe xlɛ́ ɛ ɖɔ émí hwlɛ́n ɛ gán.
78Đó Mawu mǐtɔn ɔ́, nǔbláwǔkúnúmɛtɔ́ wɛ, bó ká lɛ́ fá xomɛ; é ná bló bɔ hwlɛngán sín wěziza ɔ́ ná hɔ́n dó mǐ jí sín jǐxwé hwesivɔ́ ɖɔhun;
79 wěziza énɛ́ ɔ́ ná hɔ́n dó mɛ e jínjɔ́n zǐnflú mɛ,
bó ɖo kúyɛmɛ lɛ́ɛ jí, bó ná kplá mǐ gbɔn fífá li jí.”
80Vǐ ɔ́ ɖo susu wɛ, bɔ nǔ e é nyí ɔ́ ɖo wěxo jɛ wɛ. É yi cí gbětótló mɛ káká jɛ gbe e gbe é wá ɖe éɖée xlɛ́ Izlayɛ́li togun ɔ́ é.
Currently Selected:
Luki 1: Fon13
Highlight
Share
Copy
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.
