Bǐbɛ́mɛ 26

Izáki kpódó Abimɛlɛ́ki kpó

1Adɔ ɖěvo lɛ́ tɔ́n ɖo to ɔ́ mɛ, ɖo éé tɔ́n ɖo Ablaxámu hwenu ɔ́ gúdo, bɔ Izáki yi axɔ́sú Filisitɛ́ɛn lɛ́ɛ tɔn Abimɛlɛ́ki gɔ́n ɖo Geláa. 2Mawu Mavɔmavɔ tɔ́n dó jǐ tɔn, bó ɖɔ n'i ɖɔ: “Ma yi Ejípu ó; to e xó un ná ɖɔ nú we ɔ́ mɛ wɛ a nǎ nɔ. 3 Nɔ to élɔ́ mɛ fí; un ná nɔ kpɔ́ xá we, bó ná xo ɖɛ dó jǐ towe, ɖó hwi kpó kúnkan towe lɛ́ɛ kpó wɛ un ná ayǐkúngban élɔ́ bǐ, bɔ akpá e un dó nú tɔ́ towe Ablaxámu, bó xwlé nyɛ ɖésú d'é jí ɔ́, un ná ɖe. 4Un ná bló bɔ kúnkan towe ná sukpɔ́ sunví e ɖo jǐnukúnsin lɛ́ɛ ɖɔhun. Un ná ná ayǐkúngban élɔ́ bǐ kúnkan towe lɛ́ɛ, bó ná xo ɖɛ dó akɔta e ɖo ayǐkúngban jí lɛ́ɛ bǐ jí gbɔn yě jí. 5Đó Ablaxámu se tónú nú mì; é xwedó nǔ e un ɖɔ lɛ́ɛ; é bló nǔ e un zɔ́n lɛ́ɛ; é xwedó tito ce lɛ́ɛ; é nyi sɛ́n ce lɛ́ɛ.”

6Énɛ́ ɔ́, Izáki cí Geláa. 7 Nú mɛ e ɖo fínɛ́ lɛ́ɛ kan nǔ byɔ́ ɛ dó asi tɔn wú ɔ́, é nɔ́ ɖɔ nú yě ɖɔ nɔví émítɔn wɛ, ɖó é ɖo xɛsi ɖi wɛ ɖɔ nú émí ɖɔ nú yě ɖɔ asi émítɔn wɛ ɔ́, yě táá hu émí, ɖó Hlebeka nyɔ́ ɖɛkpɛ ɖésú.

8Ée Izáki ka ɖo to ɔ́ mɛ bɔ é lín ɔ́, é wá ɖo ayihún da xá asi tɔn wɛ gbe ɖokpó, bɔ axɔ́sú Filisitɛ́ɛn lɛ́ɛ tɔn Abimɛlɛ́ki mɔ ɛ gbɔn flɛtɛ́li nu. 9Bɔ Abimɛlɛ́ki ylɔ́ Izáki bó ɖɔ n'i ɖɔ: “Hǔn nyɔ̌nu ɔ́, asi towe wɛ! Bɔ a ka ɖɔ nɔví émítɔn wɛ.” Bɔ é yí gbe n'i ɖɔ: “Un ɖɔ mɔ̌, ɖó un ɖo xɛsi ɖi wɛ ɖɔ yě táá hu mì ɖó éyɛ́ wú.” 10Abimɛlɛ́ki ɖɔ: “Étɛ́ wɛ a wa xá mǐ nɛ́? Kpɛví ɖé wɛ kpo bɔ toví ce lɛ́ɛ ɖě ná kó ɖó xó xá asi towe ɖo to ɔ́ mɛ, bɔ a nǎ kó dɔn mǐ dó hwɛ mɛ.”

11Bɔ Abimɛlɛ́ki ɖe gbeta élɔ́ tɔ́n ɖɔ: “Mɛ ɖěbǔ ɖ'alɔ nya élɔ́ abǐ asi tɔn wú ɔ́, è nǎ hu i.”

12Xwe énɛ́ ɔ́ xwe ɔ́, Izáki dó nǔkún ɖo to ɔ́ mɛ, bó ya nǔ e é dó ɔ́ mɔ̌hunkɔtɔn donu kanwe ko, ɖó Mawu Mavɔmavɔ xo ɖɛ dó jǐ tɔn. 13Dɔkun ɖo dɔkun jí jɛ n'i wɛ káká bɔ é húzú dɔkunnɔ ɖaxó. 14É ɖó gbɔ̌ kpó nyibú kpó kɔn nyi kpɔ́, bó ɖó mɛsɛntɔ́ kpɔ́ gégé.

Izáki nu alɛ xá Abimɛlɛ́ki

Énɛ́ ɔ́, nǔ tɔn jɛ Filisitɛ́ɛn lɛ́ɛ nukún mɛ su jí. 15Tɔ e tɔ́ tɔn Ablaxámu sín mɛsɛntɔ́ lɛ́ɛ kó kun ɖ'ayǐ hwenu e tɔ́ ɔ́ ɖo gbɛ lɛ́ɛ ɔ́, Filisitɛ́ɛn lɛ́ɛ bɛ́ kɔ́ dó sú bǐ. 16Énɛ́ ɔ́, Abimɛlɛ́ki ɖɔ nú Izáki ɖɔ: “Gosín to mǐtɔn mɛ, ɖó a hǔ gǎn mǐ dín.”

17Bɔ Izáki gosín fínɛ́, bó yi ɖó gɔnu ɖó tɔdo Geláa tɔn ɔ́ mɛ, bó nɔ fínɛ́. 18Bɔ tɔ e tɔ́ tɔn Ablaxámu kun hwenu e é ɖo gbɛ bɔ Filisitɛ́ɛn lɛ́ɛ sú ɖo kú tɔn gúdo lɛ́ɛ ɔ́, é vɔ́ bǐ kun. Nyǐkɔ e tɔ́ tɔn kó ɖó nú tɔ énɛ́ lɛ́ɛ ɖ'ayǐ ɔ́ jɛ́n é nɔ́ lɛ́ ylɔ́ yě.

19Mɛsɛntɔ́ Izáki tɔn lɛ́ɛ lɛ́ kun tɔ ɖokpó dó tɔdo ɔ́ mɛ, bó mɔ sin ɖ'é mɛ, bɔ sin ɔ́ nɔ́ sa. 20Lɛ̌ngbɔ́nyitɔ́ Geláa tɔn lɛ́ɛ ká wá jɛ nǔ dɔn xá lɛ̌ngbɔ́nyitɔ́ Izáki tɔn lɛ́ɛ jí ɖɔ émítɔn wɛ nyí sin ɔ́, bɔ Izáki ɖó nyǐkɔ nú tɔ ɔ́ ɖɔ: “Esɛ́ki” tínmɛ tɔn wɛ nyí “adɔn”, ɖó yě dɔn nǔ xá ɛ. 21Mɛsɛntɔ́ Izáki tɔn lɛ́ɛ lɛ́ kun tɔ ɖěvo; yě lɛ́ dɔn nǔ xá ɛ ɖó tɔ énɛ́ ɔ́ lɔ wú, bɔ é ɖó nyǐkɔ nú tɔ ɔ́ ɖɔ “Sitina”; tínmɛ tɔn wɛ nyí “zalili”. 22Énɛ́ ɔ́ wú wɛ é gosín fínɛ́, bó lɛ́ kun tɔ ɖěvo. È sɔ́ dɔn nǔ xá ɛ ɖo tɔ énɛ́ ɔ́ kɔn ǎ, bɔ é ɖó nyǐkɔ nú tɔ ɔ́ ɖɔ “Hlexɔvɔ́ti”; tínmɛ tɔn wɛ nyí “Tɛnmɛ”; ɖó é ɖɔ: “Mawu Mavɔmavɔ ná tɛnmɛ mǐ ɖo fí lo, bɔ nǔ e wa wɛ mǐ ɖe lɛ́ɛ ná yi nukɔn ɖo to ɔ́ mɛ.”

23É wá gosín fínɛ́ bó yi Bɛ̌-Ceva. 24Mawu Mavɔmavɔ tɔ́n dó jǐ tɔn zǎn mɛ bó ɖɔ n'i ɖɔ: “Mawu tɔ́ towe Ablaxámu tɔn wɛ un nyí; ma ɖi xɛsi ó, ɖó un ɖo kpɔ́ xá we; un ná xo ɖɛ dó jǐ we, bó ná bló bɔ kúnkan towe ná sukpɔ́ ɖó mɛsɛntɔ́ ce Ablaxámu wú.” 25Ée Mawu Mavɔmavɔ ɖɔ mɔ̌ ɔ́, é mɛ vɔ̌sákpe ɖokpó nyi fínɛ́, bó xomlá Mawu Mavɔmavɔ, bó dó goxɔ tɔn ɖó fínɛ́; bɔ mɛsɛntɔ́ tɔn lɛ́ɛ jɛ dotɔ ɖokpó kun jí ɖó fínɛ́.

26 É su gbe ɖokpó, bɔ Abimɛlɛ́ki gosín Geláa wá gɔ̌n tɔn, é kpódó xɔ́ntɔn tɔn Ahuzáti kpó, kpódó ahwangán tɔn Pikɔ́lu kpó. 27Izáki kanbyɔ́ yě ɖɔ: “Aniwú mi wá gɔ̌n ce? Mi ɖíe gbɛ́ wǎn nú mì bó nya mì sín gɔ̌n mitɔn e.” 28Bɔ yě yí gbe n'i ɖɔ: “Mǐ mɔ ɖɔ Mawu Mavɔmavɔ ɖo kpɔ́ xá we; énɛ́ ɔ́ wú wɛ mǐ ɖɔ mǐ ná xwlé nǔ ɖo mǐɖée tɛ́ntin, bɔ hwi kpó mǐ kpó ná nu alɛ. 29Énɛ́ ɔ́, a nǎ wa nǔ nyanya ɖěbǔ xá mǐ ǎ, lě e mǐ lɔ ma dó tagba nú we ǎ, bó wa ɖagbe kɛ́ɖɛ́ nú we, lobo jó we dó bɔ a wa yi dó fífá mɛ ɔ́ ɖɔhun. Égbé din ɔ́, Mawu Mavɔmavɔ ka xo ɖɛ dó jǐ we.” 30Izáki ylɔ́ agɔ̌ ɖokpó ɖó ta yětɔn mɛ, bɔ yě ɖu nǔ bó nu ahan. 31Yě fɔ́n zǎnzǎn tɛɛn bó xwlé nǔ nú yěɖée. Bɔ Izáki nyi yě, bɔ yě yi dó fífá mɛ.

32Gbe énɛ́ ɔ́ gbe ɖokpó ɔ́, mɛsɛntɔ́ Izáki tɔn lɛ́ɛ wá ɖɔ tɔ e kun wɛ yě ɖe ɔ́ sín xó n'i ɖɔ: “Mǐ mɔ sin”. 33É ɖó nyǐkɔ nú tɔ ɔ́ ɖɔ: “Civɛa”; tínmɛ tɔn wɛ nyí “È xwlé nǔ”. Énɛ́ ɔ́ wú wɛ è nɔ ylɔ́ toxo ɔ́ ɖɔ Bɛ̌-Ceva káká wá jɛ égbé. Bɛ̌-Ceva sín tínmɛ wɛ nyí “tɔ”.

Esawu da asi

34Esawu ɖó xwe kanɖé (40) bó da asi we. É da Yexuditi, Beeli sín vǐ kpódó Basimáti, Elɔ́ni sín vǐ ɔ́ kpó. Nyɔ̌nu we lɛ́ɛ bǐ wɛ jɔ ɖo Hitíti kún mɛ. 35Nyɔ̌nu énɛ́ lɛ́ɛ e Esawu da ɔ́ nyí akpɔ nú Izáki kpó Hlebeka kpó.

Currently Selected:

Bǐbɛ́mɛ 26: Fon13

Highlight

Copy