Proverbionan 9
9
1Sabiduria a traha su kas,
un kas ku shete pilá.
2El a mata bestia pa e bankete,
prepará biña
i tambe drecha mesa.
3Sabiduria a manda su sirbidónan sali bai
i e ta grita for di e puntonan mas altu di e siudat:
4‘Esnan ku mester siña hopi ainda,
esnan ku ainda no tin eksperensia di kosnan di bida,
bin, bin akí!
5Bini, bin kome mi pan,
bin bebe e biña ku mi a meskla.#Sirag 24:19-21
6Evitá di ta den kompania di hende bobo,
e ora ei lo bo biba;
skohe kaminda di komprondementu!’
7Es ku koregí un chèrchadó
ta buska despresio,
es ku koregí un hende ku no ta tene kuenta ku Dios òf mandamentu,
ta buska problema pa su kurpa.
8No koregí un chèrchadó,
pasobra lo e kuminsá odia bo;
koregí un sabí,
e sí lo apresiá bo.
9Un sabí ta bira mas sabí di e loke bo bisa,
un hende hustu ta siña di e loke bo instruí e.
10Si ke bira sabí, mester tin rèspèt di SEÑOR,#Job 28:28; Salmo 111:10; Proverbionan 1:7
si ke haña komprondementu, mester konosé e úniko Dios.
11Pa mi motibu lo bo biba largu,
lo agregá aña na bo bida.
12Si bo ta sabí, bo tin probecho,
si bo ta un chèrchadó, karga konsekuensia.
13Shon Bobedat ta grosero,
un muhé lawai i
ignorante ku no sa nada.
14Shon Bobedat ta sinta den un stul na porta di su kas,
aya riba muraya di siudat.
15I tur hende di bon boluntat ku pasa ei banda,
e ta grita bisa pa desviá nan:
16‘Esnan ku mester siña hopi ainda,
esnan ku ainda no tin eksperensia di kosnan di bida,
bini, bini akí!
17Awa hòrtá ta smak bon,
pan komé na skondí ta baha bon.’
18Pero e hendenan akí no sa ku esnan ku a aseptá invitashon di Shon Bobedat,
awor akí ta wéspet den profundidat di reino di morto.
Currently Selected:
Proverbionan 9: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
