Proverbionan 18
18
1Hende ku ta isolá nan mes ta sigui solamente nan mes kièr;
nan ta oponé kontra tur bon konseho.
2Hende bobo n' ta apresiá komprenshon;
ta solamente nan opinion nan ke laga tende.
3Ku maldat ta bini bèrgwensa,
ku orguyo, despresio.
4Palabra di bon hende ta fuente di sabiduria,
hundu manera laman,
refreskante manera un riu.
5No ta bon pa privilegiá un hende kulpabel,
ni pa retené derechi di un hende inosente.
6Ta palabra di hende bobo ta hinka nan den problema
i ta nan boka ta pidi un bon halá di sota.
7Palabra di hende bobo ta bira nan pèrdishon,
nan palabranan mes ta horka nan.
8Hende ta guli redu manera pan kayente,
e ta baha bai te nos paden aya.#Proverbionan 26:22
9Hende floho i hende destruktivo
ta resultá asta di ta ruman.
10Nòmber di SEÑOR ta manera un toren poderoso,
ei hende hustu ta akudí pa haña protekshon.
11Forsa di hende riku ta nan rikesa,
den nan pensamentu nan propiedat ta un fòrti, un muraya inkapturabel.
12Tras di orguyo ta bini frakaso;
pa risibí honor, mester ta humilde promé.
13Rospondé promé ku kaba di skucha
ta ko'i bobo i un bèrgwensa.
14Ora di malesa, ánimo ta tene hende riba pia,
pero si un hende no tin ánimo, kon e ta hasi lant'ariba?
15Hende sabí ta haña komprenshon,
komo nan ta tene nan kurason i nan orea habrí p'e.
16Regalo ta habri porta,
laga bo drenta serka hende importante.
17Esun ku presentá su kaso promé ta parse di tin rason,
te ora un otro hende bini dilanti i hasi pregunta.
18Tiramentu di lòt ta pone fin na un diskushon,
e ta kita e partidonan ku ta bringa otro, fo'i otro.
19Ta mas fásil pa penetrá drenta un fòrti,
ku pa aserká un bon konosí ku ta sintié ofendí.
Ta mas trabou pa resolvé diferensia di opinion
ku pa kita e balki ku ta tene porta di un fòrti será.
20Barika di kada hende ta yená
ku loke su palabranan produsí.#Proverbionan 12:14; 13:2
21Palabra tin poder riba bida i morto;
hende ku gusta papia, mester karga e konsekuensianan.#Sirag 37:18
22Es ku a haña un esposa, a kai den bon:
el a risibí muestra di Dios su bondat.#Sirag 26:1-4
23Hende pober ta papia pidi;
hende riku ta rospondé brutu.
24Hende ku hopi amigu ta haña nan den problema,
amigu berdadero ta nifiká mas ku ruman.
Currently Selected:
Proverbionan 18: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
