Proverbionan 19
19
1Mihó hende pober ku ningun hende no por mustra dede riba dje,
ku hende bobo ku ta trose bèrdat.#Proverbionan 28:6
2Si no tin saber di algu, zelo tampoko n' ta yuda;
sòpi purá ta sali salu.
3Bobedat di hende mes ta pon'é dualu,
pero hende ke kulpa Dios.
4Ora bo ta riku bo ta atraé kantidat di amigu,
pero hende pober ta pèrdè esunnan ku e tin.
5Testigu falsu n' ta keda sin haña kastigu,
un gañadó n' ta sali liber.#Proverbionan 19:9
6Tur hende ta purba bira amigu di hende generoso.
Tur kende ke ta amigu di esun ku ta duna regalo.
7Si asta ruman di un hende pober ta despresi'é,
ku kuantu mas rason su amigunan lo no lag'é na kaya?
Ounke e ta persiguí nan, roga nan,
no por haña nan niun kaminda.#19:7 no por…kaminda: tradukshon probabel; hebreo no ta kla.
8Es ku siña i apliká loke e siña,
ta krese i mustra k'e ta stima su mes.
9Testigu falsu n' ta keda sin haña kastigu,
un gañadó ta buska su morto.#Proverbionan 19:5
10No ta pas pa un hende bobo bida den luho,
pió ainda pa un katibu goberná su shon.
11Hende huisioso no ta rabia lihé;
ta respetá nan pasobra nan no ta tuma nada na malu.
12Ora rei rabia ta manera ora leon grita,
pero su bon boluntat ta manera serena riba yerba.
13Un yu hòmber bobo ta kaba ku su tata,
i muhé ku gusta pleita ta manera dak ku ta lèk.#Proverbionan 27:15
14Hende por heredá kas i kapital di su mayornan,
pero un esposa huisioso ta un regalo di SEÑOR.
15Flohera ta pone hende drumi duru,
hende floho ta pasa hamber.
16Hende ku hasi loke manda nan, ta keda na bida,
hende orea duru lo muri.#Sirag 32:24
17Es ku demostrá amor pa hende pober ta honra SEÑOR,
i SEÑOR lo pag'é pa loke el a hasi.
18Tanten bo ta disipliná bo yu, tin speransa ainda,
no sea kómplise di su morto.
19Hende ku ta rabia muchu lihé ta hañ'é den problema,
defend'é kontra kastigu ta hasi kos pió.
20Skucha bon konseho, guli un skual mand'abou,
t'asina so lo bo bira sabí.
21Plannan den kurason di hende ta hopi,
pero ta plan di SEÑOR ta prevalesé.#Proverbionan 16:1,9; Predikador 9:1
22Loke ta spera di hende ta lealtat,
mihó hende pober i no ladron.
23Rèspèt di SEÑOR ta pone hende biba,
e ora ei hende ta sosegá trankil, sin ku problema ta molesti'é.
24Un hende floho ta hinka su man den panchi,
ma e n' ta ni hiba e kuminda na su boka.#Proverbionan 26:15
25Hende sin eksperensia den kosnan di bida ta siña
ora kastigá esun ku a bira lomba pa hasi bondat,
hende sabí ta siña ora koregié.#Proverbionan 21:11
26Maltratá tata i saka mama fo'i kas,
ta aktonan bergonsoso i reprobabel pa un yu.
27Mi yu, si bo keda sin tende ora skual bo,
bo ta alehá bo di bon konseho.
28Testigu falsu ta hasi chèrchè di hustisia,
for di mal hende ta brota maldat.#Proverbionan 15:28
29Kastigu pa e chèrchadó ta fihá kaba;
e palu pa dal riba lomba di hende bobo ta kla poné.
Currently Selected:
Proverbionan 19: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
