Proverbionan 14
14
1Ku sabiduria hende muhé ta konstruí su kas,
pero ku bobedat e ta bash'é abou.
2Es ku biba segun Dios su palabra tin rèspèt di Dios,
es ku no hasi loke Dios bisa ta despresi'É.
3Hende bobo ta kastigá su mes, ora e papia pa loko,
pero salbashon di e hende sabí ta den su palabranan.
4Si bo n' tin bestia pa traha, bo mangasina ta keda bashí,
pero forsa di bue ta sòru pa bon kosecha.
5Testigu hustu ta odia mentira,
pero testigu falsu ta daña nòmber di hende.
6Hende ku gusta chèrchè di sabiduria nunka n' ta hañ'é,
hende habrí pa sabiduria ta deskubrié fásilmente.
7Si ta palabra ku por yuda bo bo ke tende,
keda leu for di hende bobo.
8Sabiduria ta: sa kon aktua,
bobedat ta: no sa ku ta gaña bo ta gaña bo mes.
9Hende bobo ta hasi chèrchè ora mustra nan nan kulpabilidat,
pero entre hende honrado tin bon boluntat.
10Ta bo so ta sinti bo tristesa kompletamente,
meskos bo alegria: niun otro hende no por kompartié.
11Famia di mal hende ta keda destruí,
famia di hende rekto ta prosperá.
12Tin kaminda ku parse règt,
pero na final, morto ta warda.#Proverbionan 16:25; Sirag 21:10
13Asta ora di hari, kurason por hasi due,
i fin di alegria por ta doló.#Predikador 2:2
14Hende perverso ta kosechá fruta di su mes echonan,
pero bon hende tambe.
15Hende sin eksperensia ta kere tur kos ku bis'é,
hende sabí mes ta pensa.
16Hende sabí ta sòru pa malu no influensi'é i ta keda leu,
hende kabes habrí ta hasi kos sin pensa.
17Hende kabes kayente ta hasi kos di bobo,
hende cha tiger ta pone hende haña rabia riba dje.
18Hende ku biba sin usa su sintí ta keda bobo,
hende ku usa su sintí ta haña komprondementu.
19Mal hende lo baha kabes den presensia di bon hende,
hende perverso na porta di bon hende.
20Asta bisiña di e hende pober ta odi'é,
pero hende riku tin mashá hopi amigu mes.
21Es ku despresiá su próhimo ta hasi piká,
felis esun ku tin duele di hende pober.#Salmo 41:1
22Hende ku plania maldat, n' ta dualu nan lo dualu?
Hende ku plania bondat, ta kosechá amor i fieldat.
23For di tur esfuerso hende ta saka probecho,
di djis papia pa numa solamente mizeria.
24Korona di hende sabí ta nan rikesa,
pero korona di hende bobo ta nan bobedat.
25Palabra di un testigu konfiabel por skapa bida di un hende,
loke sali fo'i boka di un gañadó ta engaño.
26Es ku tin rèspèt di SEÑOR por tin konfiansa fuerte,
e sa ku su yunan ta seif.
27Rèspèt di SEÑOR ta fuente di bida,
e ta salba bo fo'i gara di morto.#Proverbionan 13:14
28Mas hopi siudadano un rei tin, mas grandi su honor,
falta di súpdito ta ruina di un hefe di pueblo.
29Tene pasenshi ta muestra di hopi inteligensia,
no tene pasenshi ta muestra di gran bobedat.
30Hende trankil ta keda salú,
pero envidia ta kome bai paden.
31Es ku oprimí hende pober ta ofendé Kreador,
es ku demostrá amor pa hende pober ta honra Dios ku esei.
32Mal hende ta keda ruiná pa su mes maldat,
hende hustu ta sintié trankil, asta ora morto yega.
33Sabiduria ta sintié na kas den mente di hende ku komprondementu,
den profundo di nan kurason asta hende bobo mester rekonosé esei.
34Hustisia ta hasi un nashon famoso,
inhustisia ta bèrgwensa pa un nashon.
35Un rei ta gosa un sirbidó sabí,
pero su furia ta baha riba e sirbidó ku pone su kara na bèrgwensa.
Currently Selected:
Proverbionan 14: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
